അഴകിയ രാവണന് സിനിമയിലെ കോടീശ്വരനായ ശങ്കര്ദാസിന്റെ സുഹൃത്തായ നോവലിസ്റ്റ് എന്.പി അംബുജാക്ഷനും അദ്ദേഹത്തിന്റെ നോവലിലെ കഥാപാത്രങ്ങളായ സുമതിയും തയ്യല്ക്കാരനും വിറകുവെട്ടുകാരനും എല്ലാവരും വീണ്ടും വരുന്നു. അംബുജാക്ഷന്റെ കഥ 'ചിറകൊടിഞ്ഞ കിനാവുകള്' എന്ന പേരില് ഒടുവില് സിനിമയാകുകയാണ്. എണ്ണതേച്ച് ചീകിയൊതുക്കിയ തലമുടിയും നെറ്റിയില് ചുവന്ന കുറിയുമായി അംബുജാക്ഷനായി ശ്രീനിവാസന് തന്നെ അഭിനയിക്കുന്നു.
സന്തോഷ് വിശ്വനാഥന് സംവിധാനം ചെയ്യുന്ന സിനിമ മാജിക് ഫ്രെയിംസിന്റെ ബാനറില് ലിസ്റ്റിന് സ്റ്റീഫനാണ് നിര്മ്മിക്കുന്നത്. നവാഗതനായ പ്രവീണ് എഡ്വിന്റേതാണ് തിരക്കഥ.
ശങ്കര്ദാസ് സമ്മതിച്ചില്ലെങ്കിലും വര്ഷങ്ങള് കഴിഞ്ഞ് അംബുജാക്ഷന്റെ നോവല് സിനിമയാകുമ്പോള് ആ സിനിമയില് കുഞ്ചോക്കോ ബോബനും റിമ കല്ലിങ്ങലും ജോയ് മാത്യുവും അടക്കമുള്ളവര് അഭിനയിക്കുന്നുമുണ്ട്. തയ്യല്ക്കാരന്റെ വേഷം ചെയ്യുന്ന കുഞ്ചാക്കോ ബോബന് ഇരട്ടറോളിലാണ് സിനിമയിലെത്തുന്നത്.
തയ്യല്ക്കാരനെ പ്രേമിക്കുന്ന സുമതിയായി റിമ കല്ലിങ്ങലും വിറകുവെട്ടുകാരനായി ജോയ് മാത്യുവും അഭിനയിക്കുന്നു. ലാലു അലക്സ്, സൈജു കുറുപ്പ്, ഇന്നസെന്റ്, മാമുക്കോയ, ചാലി പാല തുടങ്ങിയവരെല്ലാം വിവിധ കഥാപാത്രങ്ങളായി സിനിമയിലുണ്ട്.
ഹരിനാരായണന്റെ വരികള്ക്ക് ദീപക് ദേവിന്റേതാണ് ഈണങ്ങള്. ആലപ്പുഴയില് ചിത്രീകരണം തുടങ്ങിയ ചിത്രം എറണാകുളം, ഒറ്റപ്പാലം എന്നിവടങ്ങളിലായി പൂര്ത്തിയാകും.
from kerala news edited
via IFTTT