ജനറേഷൻ സെഡിന് ലോൺ പ്രേമം

ഇരുപത്തിയഞ്ചു വയസ്സിന് താഴെയുള്ള ചെറുപ്പക്കാർക്ക് ഒരു ഓമനപ്പേരുണ്ട് - 'ജനറേഷൻ സെഡ്'. ഈ വിഭാഗത്തിൽപ്പെട്ട യുവാക്കൾ ധാരാളമായി വായ്പയെടുക്കാൻ തുടങ്ങിയിരിക്കുകയാണ്. ട്രാൻസ്യൂണിയന്റെ റിപ്പോർട്ടാണ് ഇക്കാര്യം ചൂണ്ടിക്കാട്ടുന്നത്. 1995-ലോ അതിന് ശേഷമോ ജനിച്ച 90 ലക്ഷത്തിലേറെ ഉപഭോക്താക്കളാണ് ഇന്ത്യൻ വായ്പാമേഖലയിൽ സജീവമായുള്ളത്. ഇരുചക്ര വാഹനങ്ങൾക്കാണ് ഇവർ കൂടുതലായി വായ്പ എടുത്തിട്ടുള്ളത്. 21 ശതമാനം വരും ഈ മേഖലയുടെ വിഹിതം. ഇതിന് പിന്നിലായി ഉപഭോക്തൃ വസ്തുക്കളും (13 ശതമാനം) ക്രെഡിറ്റ് കാർഡുകളുമാണ് (11 ശതമാനം) ഉള്ളത്. ഇന്ത്യ, കൊളംബിയ, ദക്ഷിണാഫ്രിക്ക തുടങ്ങിയ വികസിച്ചുവരുന്ന വായ്പാ വിപണികളും കാനഡ, ഹോങ് കോങ്, അമേരിക്ക പോലുള്ള ഇതിനകംതന്നെ ശക്തമായിട്ടുള്ള വിപണികളും ട്രാൻസ്യൂണിയൻ പഠനത്തിന് വിധേയമാക്കിയിരുന്നു. 25 വയസ്സിന് താഴെയുള്ള 60.9 കോടി പേർ ഇന്ത്യയിലുണ്ട്. അതിൽ 18 വയസ്സ് കഴിഞ്ഞ അർഹരായ 14.7 കോടി പേരുണ്ട്. എന്നാൽ, ഇതിന്റെ വെറും ആറു ശതമാനം വരുന്ന 90 ലക്ഷം പേർ മാത്രമാണ് വായ്പാസൗകര്യങ്ങൾ പ്രയോജനപ്പെടുത്തുന്നതെന്നും ട്രാൻസ്യൂണിയൻ പഠനം ചൂണ്ടിക്കാട്ടുന്നു. ഇവരിൽ 80 ശതമാനം പേരും ഏതെങ്കിലും ഒരു വായ്പാപദ്ധതി മാത്രമേ പ്രയോജനപ്പെടുത്തിയിട്ടുള്ളൂ.

from money rss http://bit.ly/38ltfVO
via IFTTT