ഗോള്‍ഡ് ബോണ്ടിലെ നിക്ഷേപം ഇപ്പോള്‍ തിരിച്ചെടുക്കാം: യൂണിറ്റിന് 4,813 രൂപ ലഭിക്കും, നേട്ടം 85%

2016ൽ പുറത്തിറക്കിയ ഗോൾഡ് ബോണ്ടിലെ നിക്ഷേപം പിൻവലിക്കാൻ റിസർവ് ബാങ്ക് അനുമതി നൽകി. എട്ടുവർഷമാണ് കാലാവധിയെങ്കിലും അഞ്ചുവർഷമെത്തിയാൽ പിൻവലിക്കാൻ ബോണ്ടിൽ വ്യവസ്ഥയുണ്ട്. ഫെബ്രുവരി എട്ടിന് അഞ്ചുവർഷം പൂർത്തിയായതിനാലാണ് നിക്ഷേപം പിൻവലിക്കാനുള്ള അവസരം ലഭിച്ചത്. ഒരു ഗ്രാമിന് തുല്യമായ ബോണ്ടിന് 4,813 രൂപയാണ് പിൻവലിക്കൽ തുകയായി നിശ്ചയിച്ചിട്ടുള്ളത്.2,600 രൂപ നിലവാരത്തിലായിരുന്നു 2016 ജനുവരിയിൽ ഈ ഗോൾഡ് ബോണ്ട് പുറത്തിറക്കിയത്. ഇതുപ്രകാരം നിക്ഷേപതുകയിൽ 85ശതമാനമാണ് വർധന. മുൻആഴ്ചയിലെ(തിങ്കൾ-വെള്ളി) 24 കാരറ്റ് സ്വർണത്തിന്റെ ക്ലോസിങ് നിരക്കിന്റെ ശരാശരിയെടുത്താണ് വില നിശ്ചയിക്കുക. ഇതുപ്രകാരമാണ് അഞ്ചുവർഷമെത്തിയ ഗോൾഡ് ബോണ്ട് യൂണിറ്റിന്റെ വില നിശ്ചയിച്ചിട്ടുള്ളത്. ഇന്ത്യ ബുള്ളിയൻ ആൻഡ് ജുവലേഴ്സ് അസോസിയേഷന്റെ വിലയാണ് ഇതിനായി പരിഗണിക്കുക. ഫിസിക്കൽ രൂപത്തിലുള്ള സ്വർണത്തിനു പകരമായാണ് സർക്കാരിനുവേണ്ടി റിസർവ് ബാങ്കാണ് ഗോൾഡ് ബോണ്ട് പുറത്തിറക്കുന്നത്. അഞ്ചുവർഷം പൂർത്തിയായാൽ അന്നത്തെ വിലയ്ക്ക് ബോണ്ട് തിരികെകൊടുത്ത് പണമാക്കാം. എട്ടുവർഷം പൂർത്തിയായശേഷമാണ് നിക്ഷേപം പിൻവലിക്കുന്നതെങ്കിൽ ലഭിക്കുന്ന ആദായം പൂർണമായും നികുതി വിമുക്തമാണ്. മൂലധനനേട്ടത്തിനുപുറമെ, 2.5ശതമാനം വാർഷിക പലിശയും നിക്ഷേപകർക്ക് ലഭിക്കും. വർഷത്തിൽ രണ്ടുതവണയായി പലിശ ബാങ്കിൽ വരവുവെയ്ക്കുകയാണ് ചെയ്യുക. ഈതുകയ്ക്ക് ആദായനികുതി ബാധ്യതയുണ്ട്. മൊത്തം വരുമാനത്തോടു ചേർത്താണ് ഓരോ വർഷവും ആദായ നികുതി നൽകേണ്ടത്.

from money rss https://bit.ly/34txke7
via IFTTT