കേരളത്തില്‍ ആന കൊല്ലപ്പെട്ട സംഭവം സുപ്രീംകോടതിയുടെ മേല്‍നോട്ടത്തിലുള്ള പ്രത്യേക അന്വേഷണ സംഘമോ സിബിഐയോ അന്വേഷിക്കണമെന്ന് ആവശ്യപ്പെട്ട് പൊതുതാല്‍പര്യ ഹരജി. അവ്ധ് ബിഹാരി കൗശിക് എന്നയാളാണ് ഈ ഹരജി നല്‍കിയിരിക്കുന്നത്. ഭീകരവും ക്രൂരവും മനുഷ്യത്വരഹിതവുമായ ഈ നടപടിക്കെതിരെ കോടതിയുടെ ഇടപെടല്‍ ആവശ്യമാണെന്ന് ഹരജിക്കാരന്‍ വാദിക്കുന്നു.
കാട്ടുപന്നികളെ നേരിടാനായി കര്‍ഷകര്‍ വെച്ച പടക്കക്കെണിയില്‍ ആന കുടുങ്ങുകയായിരുന്നു. പാലക്കാട്ടെ സൈലന്റ് വാലി നാഷണല്‍ പാര്‍ക്കിനടുത്ത് മണ്ണാര്‍ക്കാട് നടന്ന സംഭവത്തെ മലപ്പുറത്ത് സംഭവിച്ചതെന്ന് വരുത്തിത്തീര്‍ക്കാനും കേരളത്തിനെതിരെ വിദ്വേഷ പ്രചാരണം നടത്താനും കേന്ദ്രമന്ത്രിമാരടക്കമുള്ള ബിജെപി നേതാക്കള്‍ ശ്രമിച്ചിരുന്നു. ഈ വിവാദം കെട്ടടങ്ങും മുമ്പെയാണ് പൊതുതാല്‍പര്യ ഹരജിയുമായി ഒരാളെത്തിയിരിക്കുന്നത്. ഇയാള്‍ അഭിഭാഷകനാണെന്നും അറിയുന്നു.
കേരളത്തില്‍ ഒരു കൊലപാതക റാക്കറ്റ് മൃഗങ്ങള്‍ക്കെതിരെ പ്രവര്‍ത്തിക്കുന്നുണ്ടെന്നും ഹരജി ആരോപിക്കുന്നു. ഇത്തരം കൊലപാതകങ്ങള്‍ നടക്കുന്നത് തടയാന്‍ സര്‍ക്കാരിന് സാധിക്കുന്നില്ല. നിയമങ്ങള്‍ ലംഘിക്കപ്പെടുകയാണെന്നും ഹരജി ആരോപിക്കുന്നു.
ആന ചെരിഞ്ഞ സംഭവം കൊലപാതകമെന്ന് വിശേഷിപ്പിച്ച് ബിജെപി എംപി മേനകാ ഗാന്ധി നടത്തിയ പ്രതികരണമാണ് വിഷയം മറ്റൊരു തലത്തിലേക്ക് വളർത്തിയത്. മലപ്പുറം ഇത്തരം സംഭവങ്ങൾക്ക് കുപ്രസിദ്ധമാണെന്നും രാജ്യത്തെ ഏറ്റവും കൂടുതൽ അക്രമം നടക്കുന്ന ജില്ലയാണെന്നും അവർ ആരോപിച്ചിരുന്നു. എന്തുകൊണ്ടാണ് രാഹുൽ ഗാന്ധി വിഷയത്തിൽ നടപടിയൊന്നുമെടുക്കാത്തതെന്നു കൂടി ചോദിച്ചതോടെ രാഷ്ട്രീയ വിവാദവുമായി.
കേന്ദ്രമന്ത്രി പ്രകാശ് ജാവദേഡേക്കറും മലപ്പുറത്തു നടന്ന സംഭവം എന്ന രീതിയിലാണ് വിശേഷിപ്പിച്ചത്. ഇരുവരുടെയും സമൂഹ മാധ്യമ പോസ്റ്റുകൾക്കു താഴെ മലയാളികൾ സംഭവം പാലക്കാട്ടാണ് നടന്നതെന്ന വിശദീകരണവുമായി വന്നിരുന്നെങ്കിലും പോസ്റ്റുകൾ പിൻവലിച്ചിരുന്നില്ല. ഇതോടെയാണ് പ്രതിഷേധമുയർന്നത്.
ആന കൊല്ലപ്പെട്ട സംഭവത്തിൽ കേന്ദ്രമന്ത്രിമാർ ഉൾപ്പെടെയുള്ളവർ വസ്തുതാവിരുദ്ധ പ്രചാരണം നടത്തുകയാണെന്നും സംസ്ഥാനത്തിന്റെ ആത്മാഭിമാനത്തെ ചോദ്യം ചെയ്യാനുള്ള ഇത്തരം ശ്രമങ്ങൾ അംഗീകരിക്കാനാകില്ലെന്നും മുഖ്യമന്ത്രി പിണറായി വിജയൻ പ്രതികരിച്ചു.
* This article was originally published here
