പാഠം 118| ഐ.പി.ഒയുമായി കളംപിടിക്കാൻ കമ്പനികൾ: സ്വീകരിക്കേണ്ട നിക്ഷേപതന്ത്രങ്ങൾ അറിയാം

കഴിഞ്ഞവർഷം ഏപ്രിലിലാണ് റൂബിൻ ജോസഫ് ഓഹരി വിപണിയിൽ നിക്ഷേപിക്കാൻ തുടങ്ങിയത്. അന്നുമുതൽ ഇന്നുവരെ നേട്ടംകൊയ്തുമുന്നേറുന്ന അദ്ദേഹത്തിന് ഭാവിയിലുണ്ടായേക്കാനിടയുള്ള തകർച്ചയെക്കുറിച്ചൊന്നും അശങ്കയില്ല. കമ്പനികളെക്കുറിച്ച് ആഴത്തിലൊന്നും അറിവില്ലെങ്കിലും പുതിയതായി വിപണിയിലെത്തുന്നവയിലാണ് റൂബിന്റെ പ്രധാനനിക്ഷേപം. ഐപിഒയുമായി ഒരു കമ്പനി എത്തിയെന്നറിഞ്ഞാൽ സാമ്പത്തിക പോർട്ടലുകളിലെ വിശകലനങ്ങൾ പരിശോധിച്ച് നിക്ഷേപത്തിനായി തയ്യാറെടുക്കും. റൊസാരി ബയോടെകിലായിരുന്നു തുടക്കം. 425 രൂപയായിരുന്നു ഇഷ്യുവില. ലിസ്റ്റ്ചെയ്തതാകട്ടെ 670 രൂപയ്ക്കും. 650 രൂപവിലയിൽ 50ശതമാനത്തിലേറെ നേട്ടത്തിൽ അന്നുതന്നെ അദ്ദേഹം ഓഹരി വിറ്റൊഴിഞ്ഞു. അടുത്തതായി ഭാഗ്യംപരീക്ഷിച്ചത് ഹാപ്പിയെസ്റ്റ് മൈൻഡ്സിലായിരുന്നു. 166 രൂപയ്ക്ക് വാങ്ങിയ ഓഹരി ലിസ്റ്റെചെയ്ത അന്നുതന്നെ 340 രൂപയ്ക്ക് ഒഴിവാക്കി. നേട്ടം 100ശതമാനത്തിലേറെ. റൂട്ട് മൊബൈലും ബെർഗർ കിങും വൻതുകതന്നെ സമ്മാനിച്ചു. അതേസമയം, ഐപിഒവഴി നിക്ഷേപം നടത്തിയ കാംസിന്റെ ഓഹരികൾ വിറ്റൊഴിയാനായില്ല. 1230 രൂപയ്ക്ക് രണ്ട് ലോട്ട് (24 ഓഹരികൾ) ലഭിച്ച അദ്ദേഹം മികച്ചവിലയ്ക്കായി കാത്തിരുന്നു. അത് ഗുണകരമാകുകയുംചെയ്തു. 1518 രൂപയ്ക്ക് വിപണിയിലെത്തിയ കമ്പനിയുടെ ഓഹരി വില 2000 രൂപയിലേറെ ഉയർന്നു. ഓരോദിവസവും വില ഉയരുന്നതുകണ്ടപ്പോൾ ദീർഘകാലത്തേയ്ക്ക് കൈവശംവെയ്ക്കാമെന്ന തീരുമാനിത്തിലെത്തുകയായിരുന്നു. താൽപര്യമില്ലതെയാണെങ്കിലും അന്നെടുത്ത തീരുമാനംഗുണംചെയ്തുവെന്ന് റൂബിന് മനസിലായി. ഐ.പി.ഒ മാനിയ ആഗോളതലത്തിൽ പണലഭ്യത വർധിച്ചതും ഓഹരി വിപണിയിലെ മുന്നേറ്റവും ഐപിഒയുമായി രംഗത്തുവരാൻ മറ്റൊരുകാലത്തുമുണ്ടായിട്ടില്ലാത്തവിധം കമ്പനികൾക്ക് പ്രചോദനമായി. റീട്ടെയിൽ നിക്ഷേപകരുടെ ആധിപത്യം അക്ഷരാർഥത്തിൽ വിപണിയെ ഞെട്ടിക്കുകതന്നെചെയ്തു. പുതിയതലമുറയിൽനിന്ന് നിരവധി പുതുനിക്ഷേപകർ സജീവമായി ഇടപെടാൻ തുടങ്ങിയത് വിപണിയിൽ ചലനമുണ്ടാക്കി. സ്ഥിര നിക്ഷേപ പലിശയിൽ കുറവുണ്ടായപ്പോൾ മികച്ച ആദായംലഭിക്കുന്ന നിക്ഷേപസാധ്യതകളാണ് ചെറുപ്പക്കാരെ വിപണിയിലെത്തിച്ചത്. രാജ്യത്തെ രണ്ട് പ്രധാന ഡെപ്പോസിറ്ററികളായ എൻഎസ്ഡിഎൽ, സിഡിഎസ്എൽ എന്നിവയിലെ കണക്കുപ്രകാരം ഓഹരി വിപണിയിൽ സജീവമായി ഇടപെടുന്നവരുടെ അക്കൗണ്ടകുളുടെ എണ്ണത്തിൽ 2020ൽ ഒരുകോടിയിലേറെ വർധനവാണുണ്ടായത്.എന്നിട്ടും രാജ്യത്തെ 136 കോടി ജനങ്ങളിൽ 3.7ശതമാനത്തിനുമാത്രമാണ് ഓഹരി നിക്ഷേപമുള്ളത്. ചൈനയിൽ 12.7ശതമാനംപേർക്ക് ഓഹരി നിക്ഷേപമുണ്ട്(ഒരാൾക്ക് ഒരു അക്കൗണ്ട് പ്രകാരമുള്ള ശരാശരി കണക്ക്, ബ്ലൂംബർഗ് പുറത്തുവിട്ടത്) യുഎസിൽ 55പേർക്കും ഓഹരിയിൽ നേരിട്ടോ മ്യൂച്വൽ ഫണ്ടുകൾവഴിയോ നിക്ഷേപമുണ്ട്. അഞ്ചുമുതൽ പത്തുവർഷത്തിനുള്ളിൽ രാജ്യത്തെ ഓഹരി നിക്ഷേപകരുടെ എണ്ണത്തിൽ വൻകുതിപ്പുണ്ടാകുമെന്നാണ് വിലയിരുത്തൽ. സമാഹരിച്ചത് 32,000 കോടിയിലേറെ 2020-21 സാമ്പത്തികവർഷത്തിൽ 30 കമ്പനികളാണ് ഐപിഒവഴി 32,000 കോടി രൂപയിലേറെ സമാഹരിച്ചത്. 2021-22 സാമ്പത്തികവർഷവും കൂടുതൽ കമ്പനികൾ രംഗത്തുവരുമെന്ന് വ്യക്തമായിക്കഴിഞ്ഞു. 28ലേറെ കമ്പനികൾ 28,700 കോടിയോളം രൂപ സമാഹരിക്കാൻ ലക്ഷ്യമിട്ട് കാത്തിരിക്കുകയാണ്. എൽ.ഐ.സി, എച്ച്ഡിബി ഫിനാൻഷ്യൽ സർവീസസ്, ഇസാഫ് സ്മോൾ ഫിനാൻസ് ബാങ്ക് തുടങ്ങിയവ അവയിൽ ചിലതുമാത്രം. 2020-21ലെ ഐപിഒ ചാർട്ട് പരിശോധിക്കുകയാണെങ്കിൽ ഗ്ലാൻഡ് ഫാർമ (4536 കോടി), ഇന്ത്യൻ റെയിൽവെ ഫിനാൻസ് കോർപറേഷൻ (4,633 കോടി), കാംസ് (2,244 കോടി), യുടിഐ അസറ്റ് മാനേജുമെന്റ് കമ്പനി(1,515 കോടി), കല്യാൺ ജൂവലേഴ്സ് (1,170കോടി)തുടങ്ങിയവയാണ് സമാഹരിച്ചതുകയുടെ കാര്യത്തിൽമുന്നിലുള്ളത്. ഇവയിൽ റൂട്ട് മൊബൈൽ, ഹാപ്പിയെസ്റ്റ് മൈൻഡ്സ് ടെക്നോളജീസ്, റോസാരി ബയോടെക്, കെംകോൺ സ്പെഷാലിറ്റി, ബർഗർ കിങ് തുടങ്ങിയ കമ്പനികൾ ലിസ്റ്റ്ചെയ്ത ദിവസംതന്നെ100ശതമാനത്തിലേറെ ആദായം നിക്ഷേപകർക്ക് സമ്മാനിച്ചു. IPOs of the Last One Year* Company Issue Price Listing Date Listing Price Listing Gain(%) Current Price Rossari Biotech 425 23-07-2020 670 57.6 1050 Happiest Minds 386 17-09-2020 351 111.4 536 Route Mobile 350 21-09-2020 708 102.3 1477 Chemcon Speciality 340 01-10-2020 731 115 413 Burger King India 60 14-12-2020 115 92.3 131 Mrs. Bectors 288 24-12-2020 501 74 334 Indigo Pains 1490 02-02-2021 2,608 75 2324 Nureca 400 25-02-2021 635 58.7 613 MTAR Technologies 575 10-03-2021 1067 85 1033 *Based on listing gains over 50 percent ലിസ്റ്റ്ചെയ്യുമ്പോഴുള്ളനേട്ടം ഐപിഒയ്ക്ക് അപേക്ഷിക്കാൻ നിക്ഷേപകരെ പ്രേരിപ്പിക്കുന്ന പ്രധാനഘടകം വിപണിയിൽ ലിസ്റ്റ്ചെയ്യുമ്പോഴുള്ള നേട്ടമാണ്. ഐപിഒയ്ക്ക് അപേക്ഷിച്ചാലും ഓഹരികൾ കിട്ടുന്നത് ലോട്ടറി പോലെയായതിനാൽ ഇത്തരത്തിൽ നേട്ടമുണ്ടാക്കുക എളുപ്പവുമല്ല. ഇരട്ടിയിലേറെ അപേക്ഷകൾ ലഭിക്കുന്നതിനാൽ പലർക്കും ഓഹരികൾ അലോട്ട്ചെയ്ത് ലഭിക്കാറില്ലെന്നതാണ് വാസ്തവം. ഈയിടെ വിപണിയിലെത്തിയ എംടിഎആർ ടെക്നോളജീസിന്റെ ഐപിഒയ്ക്ക് 201 മടങ്ങ് അപേക്ഷകളാണ് ലഭിച്ചത്. ഓഹരി ലിസ്റ്റ്ചെയ്തതാകട്ടെ 85ശതമാനംനേട്ടത്തിലും. ഈ ഓഹരിക്കായി അപേക്ഷിച്ചവരിൽ ഭൂരിഭാഗംപേർക്കും അലോട്ട്മെന്റ് കിട്ടിയില്ല. അതുകൊണ്ടുതന്നെ ഐപിഒകൾക്കുള്ള അപേക്ഷകൾ വൃഥാവ്യായാമമായി മാറുകയുംചെയ്യുന്നു. എളുപ്പത്തിൽ അപേക്ഷിക്കാം മുമ്പുള്ളതിനേക്കാൾ എളുപ്പത്തിൽ ഇപ്പോൾ ഐപിഒയ്ക്ക് അപേക്ഷിക്കാമെന്നതാണ് ചെറുപ്പക്കാരായ നിക്ഷേപകരെ ആകർഷിക്കുന്നത്. ചെക്ക് നൽകി അപേക്ഷിക്കുന്നകാലമൊക്കെ എന്നേഅവസാനിച്ചു. ബ്രോക്കറുടെ സൈറ്റ് വഴിയോ മൊബൈൽ ആപ്പുവഴിയോ നിമിഷനേരംകൊണ്ട് ഐപിഒയ്ക്ക് അപേക്ഷിക്കാൻ ഇപ്പോൾകഴിയും. അതുമാത്രമല്ല, നിക്ഷേപതുക ഏറെക്കാലം ബ്ലോക്ക് ആകുകയുമില്ല. ഓഹരി അലോട്ട് ചെയ്തില്ലെങ്കിൽ ലിസ്റ്റുചെയ്യുന്നതിനുമുമ്പേ പണം അക്കൗണ്ടിൽതിരിച്ചെത്തുകയുംചെയ്യും. ഐപിഒകളിൽനിന്ന് നേട്ടമുണ്ടാക്കാമോ? ലിസ്റ്റ്ചെയ്യുന്ന ദിവസത്തെനേട്ടം നിക്ഷേപകരെ ആകർഷിക്കുമെന്നകാര്യത്തിൽ സംശയമില്ല. ലിസ്റ്റ്ചെയ്യുന്ന ദിവസംതന്നെ വിറ്റ് ലാഭമെടുക്കുകയെന്ന ലക്ഷ്യത്തോടെയാണ് മിക്കവാറുംപേർ ഐ.പി.ഒയ്ക്ക് അപേക്ഷിക്കുന്നത്. അതിലുപരി പരമാവധി നേട്ടമുണ്ടാക്കാൻ ദീർഘകാലത്തേയ്ക്ക് നിക്ഷേപം നിലനിർത്തുകയാണ് ചെയ്യേണ്ടത്. സമയാസമയങ്ങളിൽ പോർട്ട്ഫോളിയോയിലെ കമ്പനികളുടെ അടിത്തറ വിലയിരുത്തുക. വാങ്ങുക സൂക്ഷിക്കുക നേട്ടമുണ്ടാക്കുക എന്നരീതിയാകും ഗുണകരം. ഐപിഒകൾ നിക്ഷേപത്തിനുള്ള മികച്ച അവസരംകൂടിയാണ് തുറന്നുതരുന്നത്. വിപണിയിൽ നവാഗതരാണെങ്കിലും മറ്റേതുകമ്പനികളെയുംപോലെ മികച്ചപ്രവർത്തനവും അറ്റാദായവും നൽകുന്നവയുമാകാം അവ. ലിസ്റ്റ് ചെയ്യുന്ന ദിവസത്തെ നേട്ടത്തിൽ ഒടുങ്ങുന്നതുമല്ല അത്തരംകമ്പനികളുടെ പ്രകടനം. ഭാവിയിൽ മികച്ച ഉയരത്തിൽകുതിക്കാൻ കമ്പനികൾക്ക് കഴിയുമെന്നകാര്യവും മറക്കേണ്ട.സമാന ബിസിനസ് നടത്തുന്ന കമ്പനികളുടെ ഒരുകൂട്ടംതന്നെ രൂപപ്പെടാൻ ഐ.പി.ഒകൾ ഇടയാക്കുന്നു. ഒരേകാറ്റഗറിയിൽ കമ്പനികളുടെ എണ്ണംകൂടുമ്പോൾ വൈവിധ്യവത്കരണത്തിന്റെ ഭാഗമായി മികച്ച ഓഹരി തിരഞ്ഞെടുക്കാനുള്ള അവസരംലഭിക്കും. feedbacks to: antonycdavis@gmail.com കുറിപ്പ്: കമ്പനികളുടെ ബിസിനസ് മോഡലും അടിത്തറയും ഭാവി സാധ്യതയും വിലയിരുത്തിമാത്രം നിക്ഷേപംനടത്തുക. മുകളിൽ വ്യക്തമാക്കിയതുപോലെ, വാങ്ങുക-ഘട്ടംഘട്ടമായി നിക്ഷേപിക്കുക-ദീർഘകാലം സൂക്ഷിക്കുക-നേട്ടമുണ്ടാക്കുക എന്നരീതി സ്വീകരിക്കാം. നിക്ഷേപിക്കുംമുമ്പ് ഹോംവർക്ക് അനിവാര്യമാണ്. വികാരങ്ങളെ നിയന്ത്രിക്കുക. അത്യാഗ്രഹവും ഭയവും ഓഹരി നിക്ഷേപകർക്ക് പറഞ്ഞിട്ടുള്ളതല്ല. വിവേകത്തോടെയുള്ള നീക്കമാണ് പ്രധാനം.

from money rss https://bit.ly/3u9P1q6
via IFTTT