Story Dated: Tuesday, February 17, 2015 07:30
തിരുവനന്തപുരം: മദ്യലഹരിയില്‍ യുവാവ്‌ പ്രതിശുത വധുവിനെ വെട്ടിപ്പരുക്കേല്‍പ്പിച്ചു. സംഭവുമായി ബന്ധപ്പെട്ട്‌ കുലശേഖരം സ്വദേശി വിജയകുമാറിനെ പോലീസ്‌ അറസ്‌റ്റ് കസ്‌റ്റഡിയിലെടുത്തു. പരുക്കേറ്റ യുവതിയെ തിരുവനന്തപുരം മെഡിക്കല്‍ കോളജില്‍ പ്രവേശിപ്പിച്ചു.
Story Dated: Tuesday, February 17, 2015 07:20
ന്യൂഡല്‍ഹി: നിലവിലെ ലോകചാമ്പ്യന്‍മാരായ ഇന്ത്യയ്‌ക്ക് കിരീടം നിലനിര്‍ത്താനുള്ള ശേഷിയുണ്ടെന്ന്‌ മുന്‍ കോച്ച്‌ ഗ്യാരി ക്രിസ്‌റ്റണ്‍. എല്ലാവരും ഇന്ത്യയെ എഴുതിത്തള്ളിയിരിക്കുകയാണ്‌. എന്നാല്‍ അത്‌ അത്ര നിസാരമായി എഴുതിത്തള്ളാനാകുന്ന ടീമല്ല ഇന്ത്യയെന്ന്‌ ഗ്യാരി ക്രിസ്‌റ്റണ്‍ പറഞ്ഞു. നോക്കൗട്ട്‌ ഗെയിമുകള്‍ കളിക്കേണ്ടത്‌ എങ്ങനെയെന്ന്‌ ഇന്ത്യയ്‌ക്ക് അറിയാം.
കോഹ്ലി, റെയ്‌ന, ധോണി എന്നിവര്‍ ലോകകിരീടം നേടിയതിന്റെ അനുഭവ പരിചയമുള്ള താരങ്ങളാണ്‌. സമ്മര്‍ദ്ദ സാഹചര്യങ്ങള്‍ എങ്ങനെ നേരിടണമെന്ന്‌ അവര്‍ക്ക്‌ അറിയാമെന്നും അദ്ദേഹം കൂട്ടിച്ചേര്‍ത്തു. കഴിവുള്ള യുവതാരങ്ങള്‍ ഇന്ത്യന്‍ ടീമിന്റെ ശക്‌തിയാണെന്നും ക്രിസ്‌റ്റണ്‍ പറഞ്ഞു.
എല്ലാ ടീമിനും ശക്‌തിയും ദൗര്‍ബല്യമുണ്ട്‌. അത്‌ തിരിച്ചറിഞ്ഞ്‌ ഗെയിം പ്ലാന്‍ തയ്യാറാക്കുകയാണ്‌ വേണ്ടതെന്ന്‌ അദ്ദേഹം പറഞ്ഞു. ഈ ലോകകപ്പില്‍ ഇന്ത്യയ്‌ക്ക് പുറമെ ഓസ്‌ട്രേലിയ, സൗത്ത്‌ ആഫ്രിക്ക, ന്യൂസിലന്‍ണ്ട്‌ എന്നീ രാജ്യങ്ങള്‍ക്കും ഗ്യാരി ക്രിസ്‌റ്റണ്‍ കീരീട സാധ്യത കല്‍പ്പിക്കുന്നു.
Story Dated: Tuesday, February 17, 2015 06:59
സെന്റ്‌ പീറ്റേഴ്‌സ്ബര്‍ഗ്‌: വിമാനത്താവളത്തിലെ കര്‍ശന സുരക്ഷാ പരിശോധനയില്‍ മനംമടുത്ത്‌ യുവാവ്‌ വസ്‌ത്രങ്ങള്‍ ഊരിയെറിഞ്ഞു. റഷ്യയിലെ സെന്റ്‌ പീറ്റേഴ്‌സ്ബര്‍ഗിലെ പുല്‍കോവോ വിമാനത്താവളത്തിലാണ്‌ സംഭവം. ആവര്‍ത്തിച്ചുള്ള ചോദ്യം ചെയ്യലും പരിശോധനയും സഹിക്കാനാകാതെയാണ്‌ യുവാവ്‌ വസ്‌ത്രങ്ങള്‍ ഊരിയെറിഞ്ഞത്‌. ഇതോടെ സുരക്ഷാ പരിശോധന നടത്തുകയായിരുന്ന ഉദ്യോഗസ്‌ഥര്‍ പോലും ഒരു നിമിഷം സ്‌തബ്‌ദരായി.
യുവാവിന്റെ അപ്രതീക്ഷിതമായ പെരുമാറ്റത്തില്‍ ഞെട്ടി നില്‍ക്കുന്ന ഉദ്യോഗസ്‌ഥരെയും നാണം മറയ്‌ക്കാനുള്ള മുഴുവന്‍ വസ്‌ത്രവും വലിച്ചൂരി എറിയുന്ന യുവാവിനെയും സി.സി.ടി.വി ദൃശ്യങ്ങളില്‍ വ്യക്‌തമാണ്‌. ഇയാള്‍ ധരിച്ചിരുന്ന ഷൂസ്‌ അഴിച്ചു മാറ്റാനാണ്‌ ഉദ്യോഗസ്‌ഥര്‍ ആദ്യം ആവശ്യപ്പെട്ടത്‌. ഇതിന്‌ പിന്നാലെ വന്ന മറ്റ്‌ നിര്‍ദ്ദേശങ്ങളില്‍ അസ്വസ്‌ഥത പ്രകടിപ്പിച്ച യുവാവ്‌ അപ്രതീക്ഷിതമായി തുണിയുരിയുകയായിരുന്നു.
യാത്രക്കാരനായ യുവാവ്‌ ബര്‍ത്ത്‌ ഡേ സ്യൂട്ടിലായതോടെ ഇനി എന്ത്‌ പരിശോധന നടത്താനാണെന്ന ഭാവത്തില്‍ ഉദ്യോഗസ്‌ഥരുടെ ഭാഗത്തും ചെറിയ നിസംഗത പ്രകടമായി. വിമാനത്താവളങ്ങളിലെ സുരക്ഷാ പരിശോധനയുടെ പേരില്‍ സുരക്ഷാ ജീവനക്കാര്‍ അനാവശ്യ ഇടപെടല്‍ നടത്തുന്നതായി നേരത്തെയും പരാതി ഉയര്‍ന്നിട്ടുണ്ട്‌. ഇത്തരത്തില്‍ പ്രതിഷേധമുള്ള യാത്രക്കാരുടെയെല്ലാം വികാരം മനസിലാക്കിയാകാം ഈ അഞ്‌ജാത യുവാവ്‌ പ്രതിഷേധിച്ചത്‌. സെന്റ്‌ പീറ്റേഴ്‌സ്ബര്‍ഗ്‌ പോലീസ്‌ അന്വേഷണം ആരംഭിച്ചു.
സുരക്ഷാ ജീവനക്കാരുടെ അനാവശ്യ ചോദ്യം ചെയ്യലില്‍ പ്രതിഷേധിച്ച്‌ 2013ല്‍ ബ്രിട്ടനിലെ മാഞ്ചസ്‌റ്റര്‍ എയര്‍പോര്‍ട്ടില്‍ രണ്ട്‌ പേര്‍ വസ്‌ത്രമുരിഞ്ഞ്‌ പ്രതിഷേധിച്ചിരുന്നു. ഇവരെ പിന്നീട്‌ പൊതുസ്‌ഥലത്ത്‌ ശല്യമുണ്ടാക്കിയതിന്‌ ശിക്ഷിച്ചിരുന്നു.
Story Dated: Tuesday, February 17, 2015 06:24
കോഴിക്കോട്‌: കക്കോടിയില്‍ ഡി.വൈ.എഫ്‌.ഐ പ്രവര്‍ത്തകനെ കൊലപ്പെടുത്തിയ സംഭവത്തില്‍ ആറ്‌ പേര്‍ അറസ്‌റ്റില്‍. കോയമ്പത്തൂരില്‍ നിന്നാണ്‌ അക്രമി സംഘത്തെ പിടികൂടിയത്‌. വ്യക്‌തി വൈരാഗ്യമാണ്‌ കൊലപാതകത്തിലേക്ക്‌ നയിച്ചതെന്നാണ്‌ പോലീസ്‌ ഭാഷ്യം.
കോഴിക്കോട്‌ കക്കോടി ചെറിയാല ശ്രീപദ്‌മയില്‍ റിട്ട. എ.എസ്‌.ഐ ശ്രീധരന്‍ നായരുടെ മകന്‍ ശ്രീജിത്തിനെ കഴിഞ്ഞ ദിവസമാണ്‌ ഒരു സംഘം തലയ്‌ക്കടിച്ച്‌ കൊലപ്പെടുത്തിയത്‌. മാളിക്കടവ്‌ കോഴിപ്പറമ്പത്ത്‌ ഭഗവതി ക്ഷേത്രത്തില്‍ ഉത്സവത്തിനിടെയാണ്‌ ശ്രീജിത്തിനെ കൊലപ്പെടുത്തിയത്‌. പ്രതികള്‍ ആര്‍.എസ്‌.എസ്‌ ബന്ധമുള്ളവരാണെന്ന്‌ സി.പി.എം ആരോപിച്ചിരുന്നു.
Story Dated: Tuesday, February 17, 2015 06:05
കോട്ടയം: തിരുവല്ലയ്‌ക്കും കോട്ടയത്തിനുമിടയില്‍ ട്രാക്കില്‍ അറ്റകുറ്റപ്പണി നടക്കുന്നതിനാല്‍ നാളെ മുതല്‍ മാര്‍ച്ച്‌ 23 വരെ കോട്ടയം വഴിയുള്ള ട്രെയിന്‍ ഗതാഗതത്തിന്‌ നിയന്ത്രണം. വെള്ളി, ശനി ദിവസങ്ങളില്‍ അറ്റകുറ്റപ്പണി ഇല്ലാത്തതിനാല്‍ ഈ ദിവസങ്ങളില്‍ ട്രെയിന്‍ പതിവ്‌ സമയക്രമം പാലിക്കും.
തിരുവനന്തപുരത്തുനിന്നും രാത്രി 8.40ന്‌ പുറപ്പെടേണ്ട 16347 നമ്പര്‍ മംഗലാപുരം എക്‌സ്പ്രസ്‌ രാത്രി 10.20നേ പുറപ്പെടുകയുള്ളു. തിരുവനന്തപുരത്തുനിന്നും പാലക്കാട്ടേക്കുള്ള അമൃത എക്‌സ്പ്രസ്‌(16343), മംഗലാപുരം- തിരുവനന്തപുരം എക്‌സ്പ്രസ്‌(16348) എന്നിവ അരമണിക്കൂറും ബിക്കാനീര്‍- കൊച്ചുവേളി(16311), ഭാവ്‌നഗര്‍-കൊച്ചുവേളി(19260) എന്നിവ ഒരു മണിക്കൂര്‍ മുതല്‍ രണ്ടുമണിക്കൂര്‍ വരെയും ഈ ദിവസങ്ങളില്‍ കോട്ടയത്തെ വിവിധ സ്‌റ്റേഷനുകളില്‍ പിടിച്ചിടാനും സാധ്യത.
Story Dated: Tuesday, February 17, 2015 05:46
കോഴിക്കോട്‌: കണ്ണൂര്‍-എറണാകുളം ഇന്റര്‍സിറ്റി എക്‌സ്പ്രസ്‌ ട്രെയിനില്‍ നിന്നും പുക ഉയര്‍ന്നതിനെ തുടര്‍ന്ന്‌ ട്രെയിന്‍ പിടിച്ചിട്ടു. കോഴിക്കോട്ട്‌ ഫറൂഖില്‍ എത്തിയപ്പോഴാണ്‌ ട്രെയിന്റെ അടിയില്‍ നിന്നും പുക ഉയരുന്നത്‌ ശ്രദ്ധയില്‍ പെട്ടത്‌. ബാറ്ററിയില്‍ ഉണ്ടായ തകരാറാണ്‌ സംഭവത്തിന്‌ പിന്നിലെന്ന്‌ റെയില്‍വേ വ്യക്‌തമാക്കി.
Story Dated: Tuesday, February 17, 2015 01:39
പുല്‍പ്പള്ളി: കുരങ്ങുപനിമൂലം മൂന്നുപേര്‍ മരണപ്പെടുകയും, നിരവധിപേര്‍ രോഗബാധിതരാവുകയും ചെയ്‌ത ചീയമ്പം-73 കോളനിയിലും, ദേവര്‍ഗദ്ധ കോളനിയിലും ആരോഗ്യവകുപ്പ്‌ മന്ത്രി വി.എസ്‌. ശിവകുമാര്‍ സന്ദര്‍ശനം നടത്തി. 73 കോളനിയില്‍ കുരങ്ങുപനിമൂലം മരണപ്പെട്ട മാധവന്‍, കുള്ളന്‍, കാളി എന്നിവരുടെ വീടുകളിലും മന്ത്രി സന്ദര്‍ശനം നടത്തി. കുരങ്ങുപനിയുമായി കോഴിക്കോട്‌ മെഡിക്കല്‍ കോളേജ്‌ ആശുപത്രിയില്‍ ഒരുമാസം ചികിത്സിച്ച്‌ തിരികെയെത്തിയ ബാബുവിനെയും മന്ത്രി സന്ദര്‍ശിച്ചു. ബാബു ഫോറസ്റ്റ് ഫയര്‍ലൈന്‍ വാച്ചറായിരുന്നു.
കുരങ്ങുപനിമൂലം ആദ്യം മരണപ്പെട്ട ദേവര്‍ഗദ്ദ കോളനിയിലെ ഓമനയുടെ വീട്ടിലും മന്ത്രി സന്ദര്‍ശനം നടത്തി. കോളനിവാസികളുടെ പരാതികള്‍ കേട്ട മന്ത്രി അവര്‍ക്കാവശ്യമായ എല്ലാ ചികിത്സാ സഹായങ്ങളും ഒരുക്കുമെന്നും റവന്യൂ ഫോറസ്റ്റ് വകുപ്പുകളുമായി സഹകരിച്ച്‌ നടപടിക്രമങ്ങള്‍ വേഗത്തിലാക്കുമെന്നും അറിയിച്ചു. വനത്തിനുള്ളില്‍ കഴിയുന്ന ആദിവാസികളെ വനത്തിന്‌ പുറത്ത്‌ പുനരധിവസിപ്പിക്കാന്‍ വേണ്ട നടപടികള്‍ സ്വീകരിക്കുമെന്നും അദേഹം പറഞ്ഞു. കൂടാതെ ഈ കോളനികളുടെ മേല്‍നോട്ടത്തിലേക്ക്‌ കൂടുതലായ ട്രൈബല്‍ പ്രമോട്ടര്‍മാരുടെ സേവനംകൂടി ലഭ്യമാക്കുമെന്നും അദേഹം അറിയിച്ചു.
മന്ത്രിയോടൊപ്പം ഐ.സി. ബാലകൃഷ്‌ണന്‍ എം.എല്‍.എ, ജില്ലാ കലക്‌ടര്‍ വി. കേശവേന്ദ്രകുമാര്‍, ജില്ലാ പഞ്ചായത്തംഗം കെ.എല്‍. പൗലോസ്‌, ഡി.എം.ഒ നിതാ വിജയന്‍, ഡെപ്യൂട്ടി ഡി.എം.ഒ ഡോ. വിദ്യ, റവന്യൂ, ഫോറസ്റ്റ്, പോലീസ്‌ വകുപ്പുകളിലെ മറ്റുദ്യോഗസ്‌ഥര്‍, വാര്‍ഡംഗം അപ്പി ബോളന്‍,
ടി.എസ്‌. ദിലീപ്‌ കുമാര്‍ എന്നിവരുമുണ്ടായിരുന്നു.
Story Dated: Tuesday, February 17, 2015 01:39
ഗൂഡല്ലൂര്‍: സര്‍ക്കാര്‍ ബസ്‌ ഡ്രൈവര്‍ക്ക്‌ നേരെ വധഭീഷണിമുഴക്കിയ സംഭവത്തില്‍ സ്വകാര്യ ബസ്‌ ജീവനക്കാരെ പൊലിസ്‌ അറസ്‌റ്റു ചെയ്‌തു. ഗൂഡല്ലൂര്‍ സ്വദേശിയും കോയമ്പത്തൂര്‍-മേട്ടുപാളയം റൂട്ടിലോടുന്ന സര്‍ക്കാര്‍ ബസ്‌ ഡ്രൈവറുമായ സുബ്ബനെ (37)തിരെയാണ്‌ മേട്ടുപാളയത്ത്‌ വച്ച്‌ സ്വകാര്യ ബസ്‌ ജീവനക്കാര്‍ വധഭീഷണി മുഴക്കിയത്‌. സുബ്ബന്റെ പരാതിയുടെ അടിസ്‌ഥാനത്തില്‍ സ്വകാര്യ ബസ്‌ ഡ്രൈവര്‍ രഞ്‌ജിത്ത്‌കുമാര്‍ (38), കണ്ടക്‌ടര്‍ ശിവകുമാര്‍ (25) എന്നിവരെ മേട്ടുപാളയം പോലിസ്‌ അറസ്‌റ്റു ചെയ്‌തു. ഒരെ റൂട്ടിലോടുന്ന സര്‍ക്കാര്‍ ബസും, സ്വകാര്യ ബസും സമയ സംബന്ധമായ പ്രശ്‌നങ്ങളെത്തുടര്‍ന്നുണ്ടായ വഴക്കിനിടെയായിരുന്നു സംഭവം.
Story Dated: Tuesday, February 17, 2015 01:39
ബത്തേരി: രണ്ടുപേരെ കൊന്ന നരഭോജി കടുവയെ വെടിവച്ച്‌ പിടിക്കാന്‍ കേരള- തമിഴ്‌നാട്‌ വനപാലകര്‍ നീക്കം ഊര്‍ജിതമാക്കി. ഇതിനിടെ ഗൂഡല്ലൂര്‍ വനമേഖലയില്‍ ഇന്നലെ രാവിലെ കടുവയെ കണ്ടെത്തി. എന്നാല്‍ വെടിവെക്കാന്‍ സാഹചര്യമൊത്തില്ല. സ്‌പെഷ്യല്‍ ടാസ്‌ക്ക്ഫോഴ്‌സ്, പോലീസ്‌, വനംവകുപ്പ്‌ ഉദ്യോഗസ്‌ഥര്‍ എന്നിവരടക്കം 400 ഓളം സേനാംഗങ്ങളാണ്‌ തമിഴ്‌നാട്ടില്‍ കടുവയുടെ പുറകെയുള്ളത്‌. അതേ സമയം കടുവ വയനാടന്‍ വനത്തിലേക്ക്‌ കടന്നാല്‍ വെടിവെക്കാനായി 80 അംഗങ്ങളടങ്ങുന്ന പ്രത്യേക ദൗത്യ സംഘത്തിന്‌ കേരളവും രൂപം നല്‍കി.
മയക്കുവെടി വിദഗ്‌ധരായ ഡോ. അരുണ്‍ സക്കറിയ, ഡോ. ജിജിമോന്‍ എന്നിവര്‍ കേരള സംഘത്തോടൊപ്പമുണ്ട്‌. വെടിവെക്കാന്‍ വിദഗ്‌ധരായ ആളുകളെയാണ്‌ കേരളം പ്രത്യേക സംഘത്തില്‍ ഉള്‍പ്പെടുത്തിയിരിക്കുന്നത്‌. എട്ട്‌ തോക്കുകളും ഇവര്‍ക്ക്‌ നല്‍കിയിട്ടുണ്ട്‌. തമിഴ്‌നാട്‌ അതിര്‍ത്തിയോടു ചേര്‍ന്ന ചെട്ട്യാലത്തൂരിലും മറ്റ്‌ അതിര്‍ത്തി വനങ്ങളും ഗ്രാമങ്ങളും കേന്ദ്രീകരിച്ചാണ്‌ കേരള സംഘം നിലയുറപ്പിച്ചിരിക്കുന്നത്‌. ഗൂഡല്ലൂര്‍ വനമേഖലയില്‍ നിന്ന്‌ കേവലം ഒരു കിലോമീറ്റര്‍ ദൂരം മാത്രമേയുള്ള വയനാടന്‍ വനത്തിലേക്ക്‌. അതിനാല്‍ ചെട്ട്യാലത്തൂര്‍ ഉള്‍പ്പെടെയുള്ള വനാതിര്‍ത്തി ഗ്രാമങ്ങളില്‍ ഗ്രാമീണരുടെ സുരക്ഷക്കായി വനംവകുപ്പ്‌ കാവല്‍ ഏര്‍പ്പെടുത്തിയിട്ടുണ്ട്‌. ഇന്നലെ രാത്രി ഒരു സംഘം വനപാലകര്‍ ചെട്ട്യാലത്തൂരില്‍ തങ്ങി.
വീടുകള്‍ക്കു സമീപം തീ കൂട്ടിയാണ്‌ നാട്ടുകാരും വനപാലകരും കാവലിരുന്നത്‌. ബെണ്ണ വനമേഖലയിലാണ്‌ ഇന്നലെ തമിഴ്‌നാട്‌ സംഘം കടുവയെ കണ്ടത്‌. എന്നാല്‍ ഇത്‌ നരഭോജി കടുവയാണോ എന്ന്‌ സ്‌ഥിരീകരിക്കാന്‍ കഴിഞ്ഞിട്ടില്ല. നരഭോജി കടുവയുടെ ശരീരത്തില്‍ മുറിവുകളുണ്ടെന്നാണ തമിഴ്‌നാട്‌ വനംവകുപ്പിന്റെ നിഗമനം. അതുകൊണ്ട്‌ ഏറെദൂരം സഞ്ചരിക്കാന്‍ കടുവക്ക്‌ കഴിയുകയില്ലെന്നാണ്‌ ഇവരുടെ നിഗമനം. തന്‍മൂലം വെടിവെച്ചു കൊല്ലുന്നതിനു പകരം മയക്കുവെടിവെച്ച്‌ ജീവനോടെ കടുവയെ പിടിക്കാനാണ്‌ തമിഴ്‌നാട്‌ വനംവകുപ്പിന്റെ നീക്കമെന്ന്‌ സൂചനയുണ്ട്‌. എന്നാല്‍ ജനരോക്ഷം ഭയന്ന്‌ ഇക്കാര്യം അവര്‍ പരസ്യമാക്കുന്നില്ല. കടുവ മനുഷ്യനെ കൊന്നതിനെതുടര്‍ന്ന്‌ വ്യാപകമായ അക്രമമാണ്‌ പന്തല്ലൂര്‍ താലൂക്കിലെ വിവിധ ഭാഗങ്ങളില്‍ കഴിഞ്ഞദിവസം ഉണ്ടായത്‌.
കടുവയുടെ ആക്രമണത്തില്‍ മരിച്ച യുവതിയുടെ വീടും, മറ്റിടങ്ങളും തമിഴ്‌നാട്‌ വനം വകുപ്പ്‌ മേധാവി ശിവകുമാര്‍, ഡോ. മല്‍ക്കാനി തുടങ്ങിയവയുടെ നേതൃത്വത്തില്‍ സന്ദര്‍ശിച്ചു. മുതുമല കടുവാ സങ്കേതം ഫീല്‍ഡ്‌ ഡയറക്‌ടര്‍ രഘുറാംസിംഗാണ്‌ തമിഴ്‌നാട്‌ വനംവകുപ്പിന്റെ പ്രവര്‍ത്തനങ്ങള്‍ക്ക്‌ നേതൃത്വം നല്‍കുന്നത്‌.
കടുവയുടെ കാല്‍പാദങ്ങളും പലയിടത്തും കണ്ടെത്തിയിട്ടുണ്ട്‌. കടുവയുടെ സാന്നിധ്യം മനസിലാക്കാന്‍ വനത്തില്‍ പലഭാഗങ്ങളിലായി 15 ക്യാമറകള്‍ സ്‌ഥാപിച്ചിട്ടുണ്ട്‌. സംഘര്‍ഷാവസ്‌ഥ ഭയന്ന്‌ ബിദര്‍ക്കാട്‌, പാട്ടവയല്‍ എന്നിവിടങ്ങളില്‍ മൂന്ന്‌ ദിവസത്തേക്ക്‌ നീലഗിരി ജില്ലാ കലക്‌ടര്‍ പി. ശങ്കര്‍ നിരോധനാജ്‌ഞ പ്രഖ്യാപിച്ചിട്ടുണ്ട്‌.
ഉന്നത ഉദ്യോഗസ്‌ഥര്‍ പ്രദേശത്ത്‌ തമ്പടിച്ചാണ്‌ തിരച്ചിലിന്‌ നേതൃത്വം നല്‍കുന്നത്‌. ജില്ലാ കലക്‌ടര്‍ പി.ശങ്കര്‍, തമിഴ്‌നാട്‌ ഫോറസ്റ്റ് ചീഫ്‌ കണ്‍സര്‍വേറ്റര്‍ അന്‍വറുദീന്‍, ഡി.ആര്‍.ഒ ഭാസ്‌കരപാണ്ഡ്യന്‍, മുതുമല കടുവാ സങ്കേതം ഡെപ്യുട്ടി ഡയറക്‌ടര്‍ ചന്ദ്രന്‍, ആര്‍.ഡി.ഒ: വി.ജൈ ബാബു, ഗൂഡല്ലൂര്‍, പന്തല്ലൂര്‍ തഹസില്‍ദാര്‍മാരായ രാമചന്ദ്രന്‍, ഹാരി, ഗൂഡല്ലൂര്‍ ഡി.എഫ്‌.ഒ തേജസ്വി, ഊട്ടി സൗത്ത്‌ ഡി.എഫ്‌. ഒ ഭദ്രസ്വാമി, സത്യമംഗലം ഡി.എഫ്‌.ഒ രാജ്‌കുമാര്‍, ഹാസനൂര്‍ ഡി.എഫ്‌.ഒ പത്മ, ഈറോഡ്‌ ഡി.എഫ്‌.ഒ നാഗരാജ്‌ തുടങ്ങിയവര്‍ സംഭവസ്‌ഥലത്ത്‌ ക്യാമ്പ്‌ ചെയ്യുന്നുണ്ട്‌. ബിദര്‍ക്കാട്‌ ടൗണില്‍ പോലീസ്‌ വന്‍സുരക്ഷാക്രമീകരണം ഏര്‍പ്പെടുത്തിയിട്ടുണ്ട്‌. ഇവിടെ കഴിഞ്ഞദിവസം വ്യാപകമായ അക്രമം നടന്നിരുന്നു.
ഡി.വൈ.എസ്‌.പി.മാരായ ജി.ഗോപി, എസ്‌.എം സുബ്രഹ്‌മണ്യന്‍ എന്നിവരുടെ നേതൃത്വത്തിലാണ്‌ സുരക്ഷ ഏര്‍പ്പെടുത്തിയിരിക്കുന്നത്‌. ഐ.ജി ശങ്കര്‍, ഡി.ഐ.ജി മണിദിവാരി എന്നിവര്‍ സംഭവസ്‌ഥലം സന്ദര്‍ശിച്ചിരുന്നു. കടുവാ ഭീതിനിലനില്‍ക്കുന്നതിനാല്‍ ബിദര്‍ക്കാട്‌, പാട്ടവയല്‍, ബെണ്ണ എന്നിവിടങ്ങളിലെ സ്‌കൂളുകള്‍ക്ക്‌ സര്‍ക്കാര്‍ മൂന്ന്‌ ദിവസത്തെ അവധി നല്‍കിയിരിക്കുകയാണ്‌. പ്രാദേശിക തലത്തില്‍ രണ്ട്‌ ദിവസത്തേക്ക്‌ മ്രദസക്കും അവധി നല്‍കിയിട്ടുണ്ട്‌. അതിനിടെ ഗൂഡല്ലൂര്‍- ബത്തേരി അന്തര്‍സംസ്‌ഥാന പാതയിലെ ഗതാഗതം ഇന്നലെ പുനസ്‌ഥാപിച്ചു. ജനജീവിതം സാധാരണ നിലയിലായി.
Story Dated: Tuesday, February 17, 2015 01:39
കല്‍പ്പറ്റ: പാവപ്പെട്ടവരുടെ ആശ്രയമായിരുന്ന ഡോ. ഷാനവാസിന്റെ മരണത്തിലെ ദുരൂഹതകളും മാനസിക പീഡനത്തിന്റെ ചുരുളുകളും പുറത്തു കൊണ്ടുവരുന്നതിനായി സമഗ്ര അന്വേഷണം ആവശ്യപ്പെട്ട്‌ മനുഷ്യാവകാശ പ്രവര്‍ത്തകനും ഡോക്‌ടരുടെ അടുത്ത സുഹൃത്തുമായിരുന്നു അഡ്വ. ശ്രീജിത്ത്‌ പെരുമന കേന്ദ്ര സംസ്‌ഥാന മനുഷ്യാവകാശ കമ്മീഷനുകള്‍ക്ക്‌ പരാതികള്‍ സമര്‍പ്പിച്ചു. ഡോക്‌ടറുടെ ശബ്‌ദ രേഖകളും ഫെയിസ്‌ബുക്ക്‌ പോസ്‌റ്റുകളും പത്ര വാര്‍ത്തകളും മറ്റ്‌ തെളിവുകളുടെയും അടിസ്‌ഥാനത്തിലാണ്‌ പരാതി നല്‍കിയത്‌. ഹൈക്കോടതിയെ സമീപിക്കുന്നതുമായി ബന്ധപ്പെട്ട്‌ മുന്‍ എം.പി.യും നിയമ വിദഗ്‌ധനുമായ അഡ്വ. സെബാസ്‌റ്റ്യന്‍ പോളുമായി കൂടിക്കാഴ്‌ച നടത്തിയതായി അഡ്വ. ശ്രീജിത്ത്‌ പെരുമന പറഞ്ഞു.
Story Dated: Tuesday, February 17, 2015 01:39
പുല്‍പ്പള്ളി: വയനാട്ടിലെ കുരങ്ങുപനി നിയന്ത്രണ പ്രവര്‍ത്തനങ്ങള്‍ക്ക്‌ 25 ലക്ഷം രൂപ അടിയന്തിരമായി അനുവദിച്ചതായി ആരോഗ്യ മന്ത്രി വി.എസ്‌. ശിവകുമാര്‍ പറഞ്ഞു. പൂതാടി പഞ്ചായത്ത്‌ കമ്മ്യൂണിറ്റി ഹാളില്‍ ജനപ്രതിനിധികളുടെയും വിവിധ വകുപ്പുദ്യോഗസ്‌ഥരുടെയും അവലോകന യോഗത്തില്‍ സംസാരിക്കുകയായിരുന്നു അദ്ദേഹം.
കുരങ്ങ്‌ പനി പരത്തുന്ന കീടങ്ങള്‍, ചെള്ള്‌ എന്നിവയെ നശിപ്പിക്കുന്നതിനുള്ള മലാത്തിയോണ്‍ പൊടി, ആരോഗ്യ പ്രവര്‍ത്തകര്‍ക്കാവശ്യമായ സുരക്ഷ ഉപകരണങ്ങള്‍ എന്നിവ വാങ്ങുന്നതിനായി അഞ്ചുലക്ഷം രൂപയും വനമേഖലയുമായി ബന്ധപ്പെട്ട്‌ ഉപജീവനം കഴിക്കുന്നവര്‍ക്ക്‌ രണ്ട്‌ ഡോസ്‌ വാക്‌സിന്‍ നല്‍കുന്നതിന്‌ 10 ലക്ഷം രൂപയും അനുവദിച്ചു. വനം വകുപ്പ്‌ ജീവനക്കാര്‍ക്ക്‌ പരിശീലനം, തദ്ദേശീയര്‍ക്ക്‌ ബോധവല്‍ക്കരണം നല്‍കുന്നതിന്‌ മൂന്നു ലക്ഷം രൂപ, വനാതിര്‍ത്തികളില്‍ മുന്നറിയിപ്പ്‌ ബോര്‍ഡുകളും മറ്റും സ്‌ഥാപിക്കുന്നതിന്‌ നാലു ലക്ഷം രൂപ, രോഗ ബാധിതരെ ആശുപത്രിയിലെത്തിക്കുന്നതിന്‌ ഒരു ലക്ഷം രൂപ എന്നാങ്ങനെയും തുക അനുവദിച്ചതായി മന്ത്രി അറിയിച്ചു.
കൂടാതെ പ്രതിരോധ പ്രവര്‍ത്തനങ്ങളുടെ ഭാഗമായി താല്‍ക്കാലികമായി ജീവനക്കാരെ നിയമിക്കുന്നതിന്‌ രണ്ടു ലക്ഷം രൂപയും അനുവദിച്ചു. കൂടാതെ ട്രൈബല്‍ കോര്‍പ്പസ്‌ ഫണ്ടില്‍ നിന്നും അഞ്ചുലക്ഷം രൂപ മരുന്നുകളും മറ്റും വാങ്ങുന്നതിന്‌ ആരോഗ്യ വകുപ്പിന്‌ നല്‍കും. ആശുപത്രികളില്‍ പ്രവേശിപ്പിച്ചവര്‍ക്ക്‌ കൂടെ നില്‍ക്കുന്നതിനും മറ്റുമായി അഞ്ച്‌ ട്രൈബല്‍ പ്ര?മോട്ടര്‍മാരെ പുതുതായി ഉടന്‍ നിയമിക്കുമെന്നും അദ്ദേഹം പറഞ്ഞു.
കുരങ്ങ്‌ പനി ബാധിതരെ സൗജന്യമായി ചികിത്സിക്കുന്നതിന്‌ മാത്രമായി വിംസ്‌ മെഡിക്കല്‍ കോളേജില്‍ പ്രത്യേക വാര്‍ഡ്‌ തയ്യാറാക്കും. സര്‍ക്കാര്‍ ആശുപത്രികളില്‍ നിന്നുള്ള റഫറന്‍സ്‌ കാര്‍ഡ്‌ സഹിതം രോഗികളെ നേരിട്ട്‌ അത്യാസന്ന വിഭാഗത്തില്‍ എത്തിക്കാം. കോഴിക്കോട്‌ മെഡിക്കല്‍ കോളേജിലും പനി ബാധിതര്‍ക്കായി പ്രത്യേക സംവിധാനമൊരുക്കാന്‍ സൂപ്രണ്ടിനോട്‌ ആവശ്യപ്പെട്ടിട്ടുണ്ടെന്നും മന്ത്രി പറഞ്ഞു. 19ന്‌ ബത്തേരിയില്‍ അതിര്‍ത്തി സംസ്‌ഥാനങ്ങളിലെ ഉന്നതോദ്യോഗസ്‌ഥരുടെ യോഗം വിളിച്ചു ചേര്‍ക്കാനും മന്ത്രി നിര്‍ദ്ദേശിച്ചു.
യോഗത്തില്‍ ഐ.സി. ബാലകൃഷ്‌ണന്‍ എം.എല്‍.എ അധ്യക്ഷത വഹിച്ചു. ജില്ലാ കലക്‌ടര്‍ വി. കേശവേന്ദ്രകുമാര്‍, ആരോഗ്യ വകുപ്പ്‌ അഡീഷണല്‍ ഡയറക്‌ടര്‍ എ. പ്രദീപ്‌ കുമാര്‍, പഞ്ചായത്ത്‌ പ്രസിഡന്റ്‌ ഐ.ബി. മൃണാളിനി, വൈസ്‌ പ്രസിഡന്റ്‌ കെ.കെ. വിശ്വനാഥന്‍, ജില്ലാ പഞ്ചായത്തംഗം കെ.എല്‍. പൗലോസ്‌, ഡി.എം.ഒ ഡോ. നിത വിജയന്‍, ഫോറസ്റ്റ് റെയിഞ്ച്‌ ഓഫീസര്‍ രഞ്‌ജിത്‌ തുടങ്ങിയവര്‍ പങ്കെടുത്തു.
