Story Dated: Wednesday, December 24, 2014 02:19
വഡോദര: രഞ്ജി ട്രോഫി ക്രിക്കറ്റ് ടൂര്‍ണമെന്റിനിടെ യൂസഫ് പഠാന്‍ കളികാണാനെത്തിയ യുവാവിന്റെ മുഖത്തടിച്ചു. റിലയന്‍സ് ക്രിക്കറ്റ് സ്‌റ്റേഡിയത്തില്‍ ബറോഡയും ജമ്മുകാശ്മീരും തമ്മില്‍ നടന്ന മത്സരത്തിനിടെയാണ് സംഭവം.
ജമ്മു കശ്മീരിനെതിരെ ബാറ്റ് ചെയ്യുകയായിരുന്ന യൂസഫ് പഠാനെയും ഒപ്പം ക്രീസിലുണ്ടായിരുന്ന അമ്പാട്ടി റായിഡുവിനെയും കാണിയായ യുവാവ് കുകി വിളിക്കുകയും അസഭ്യം വിളിക്കുകയും ചെയ്തു. ഇതിനെത്തുടര്‍ന്ന് രോക്ഷാകുലനായ യൂസഫ് ഡ്രസിംഗ് റൂമിലെത്തിയ ഉടന്‍ കാണിയെ മുറിയിലേക്ക് വിളിപ്പിക്കുകയും, രണ്ട് പ്രാവശ്യം മുഖത്തടിക്കുകയുമായിരുന്നുവെന്ന് ബറോഡ ക്രിക്കറ്റ് അസോസിഷേന്‍ സെക്രട്ടറി സ്‌നേഹല്‍ പരീഖ് പറഞ്ഞു.
സംഭവത്തെ തുടര്‍ന്ന് പഠാന്റെ സഹോദരനും മുന്‍ ഇന്ത്യന്‍ ക്രിക്കറ്റ് താരവുമായ ഇര്‍ഫാന്‍ പഠാന്‍ എത്തി സ്ഥിതി ശാന്തമാക്കുകയായിരുന്നു. യുവാവിന്റെ അടുത്ത ബന്ധു ക്ഷമ ചോദിച്ചതോടെ പ്രശ്‌നം പരിഹരിച്ചു. തുടര്‍ നടപടികള്‍ക്കായി റിപ്പോര്‍ട്ട് ബി.സി.സി.ഐക്ക് അയച്ചതായി സ്‌നേഹല്‍ പരീഖ് പറഞ്ഞു.
from kerala news edited
via IFTTT
