Story Dated: Wednesday, December 24, 2014 01:14
ജയ്പൂര്‍: നിഷ്ഠൂരമായ ഉത്തരവുകളിലൂടെ വിവാദമായ ജാതി പഞ്ചായത്ത് ഉത്തരവ് വീണ്ടും. മാനഭംഗത്തിന് ഇരയായ ദളിത് പെണ്‍കുട്ടിയുടെ മൂക്ക് ഛേദിക്കാനാണ് രാജസ്ഥാനിലെ ഒരു സമുദായ സംഘം ഉത്തരവിട്ടത്. ബാര്‍മര്‍ ഗ്രാമത്തിലാണ് സംഭവം. ജാതി നേതാക്കളില്‍ നിന്നു സംരക്ഷണം തേടി പെണ്‍കുട്ടി ജില്ലാ പോലീസ് മേധാവിയെ സമീപിച്ചിരിക്കുകയാണ്.
തന്റെ ഭര്‍തൃ പിതാവാണ് തന്നെ മാനഭംഗപ്പെടുത്തിയതെന്നും പെണ്‍കുട്ടി പറഞ്ഞു. വിവാഹം കഴിഞ്ഞ നാള്‍ മുതല്‍ ഭര്‍തൃപിതാവ് തന്നെ ശല്യപ്പെടുത്തിയിരുന്നു. സെപ്തംബറില്‍ അദ്ദേഹം തന്നെ മാനഭംഗപ്പെടുത്തി. പോലീസില്‍ പരാതിപ്പെട്ടതോടെ ഭര്‍തൃപിതാവ് അറസ്റ്റിലായെങ്കിലും നാലു ദിവസത്തിനു ശേഷം ജാമ്യത്തില്‍ വിട്ടു. ഇയാള്‍ ഇപ്പോള്‍ വിചാരണ നേരിടുകയാണ്.
ജാമ്യത്തില്‍ പുറത്തിറങ്ങിയ ഭര്‍തൃപിതാവ് സമുദായ നേതാക്കളെ വിളിച്ചുകൂട്ടി തനിക്കെതിരെ നീക്കം നടത്തുകയാണെന്ന് പെണ്‍കുട്ടി പരാതിപ്പെടുന്നു. ഇക്കഴിഞ്ഞ 19ന് സമുദായത്തിലെ ചിലര്‍ തന്നെ ആക്രമിക്കാന്‍ ശ്രമിച്ചിരുന്നു. മാതാപിതാക്കളാണ് തന്നെ രക്ഷിച്ചത്. ഇതേതുടര്‍ന്ന് കുടുംബത്തിനു നേരെയും അവര്‍ ഭീഷണിയുയര്‍ത്തുന്നുണ്ടെന്നും പെണ്‍കുട്ടി പരാതിപ്പെട്ടു. സംഭവത്തില്‍ അന്വേഷണം ആരംഭിച്ചതായി പോലീസ് അറിയിച്ചു.
from kerala news edited
via IFTTT
