ഫോക്കസ് ദേശീയ യുവജനസംഗമം
Posted on: 29 Dec 2014
റിയാദ്: ന്യൂജനറേഷന്‍ സമരങ്ങളോടുള്ള പൊതുസമൂഹത്തിന്റെ എതിര്‍പ്പിനെ സമര്‍ത്ഥമായി ഉപയോഗപ്പെടുത്തിക്കൊണ്ടുള്ള ഫാസിസ്റ്റ് കടന്നു കയറ്റങ്ങളെക്കുറിച്ച് സമൂഹം ബോധവാന്മാരാകണമെന്നും അവരുടെ ഒളിയജണ്ടകള്‍ തിരിച്ചറിയപ്പെടണമെന്നും ഫോക്കസ് ദേശീയ യുവജന സംഗമം അഭിപ്രായപ്പെട്ടു. സമൂഹത്തിന്റെ നൈതിക സങ്കല്പങ്ങളേയും സംസ്‌കാരത്തേയും അവമതിച്ചു കൊണ്ടുള്ള ന്യൂ ജനറേഷന്‍ സമരങ്ങളോട് വിയോജിക്കുമ്പോള്‍ തന്നെ അവയെ കായികമായി നേരിട്ട്‌കൊണ്ടുള്ള സംഘ പരിവാര്‍ നീക്കങ്ങളെ അംഗീകരിക്കാനാവില്ല. ഫാസിസ്റ്റ് അജണ്ടകളെയും ആശയങ്ങളെയും എന്നും തിരസ്‌കരിച്ചിട്ടുള്ള കേരളം പോലെയുള്ള സംസ്ഥാനങ്ങളില് പൊതുസമൂഹത്തിന്റെ മനസ്സില്‍ ഇടം നേടുക എന്ന ലക്ഷ്യമാണ് ഇത്തരം ശാക്തിക പ്രതികരണങ്ങളിലൂടെ ഫാസിസ്റ്റ് സംഘടനകള്‍ ലക്ഷ്യമിടുന്നത്.
ഫോക്കസ് മെമ്പര്‍ഷിപ്പ് ക്യാമ്പയിനിന്റെ സമാപനം കുറിച്ചു കൊണ്ടു നടന്ന സംഗമത്തില്‍ ഡോ.ഹുസൈന്‍ മടവൂര്‍ മുഖ്യാതിഥിയായിരുന്നു. വിവിധ ഫോക്കസ് ചാപ്റ്ററുകളുടെ കഴിഞ്ഞ കാലയളവിലെ റിപ്പോര്‍ട്ട് ഷബീര്‍ വെള്ളാടത്ത് അവതരിപ്പിച്ചു. വിവിധ ചപ്റ്ററുകളെ പ്രതിനിധീകരിച്ചു കൊണ്ട്, മുഹമ്മദ് ഹുസൈന്‍ മക്ക, റാഫി അല്‍ കോബാര്‍, സാജിദ് ജുബൈല്‍, ഷംസുദ്ദീന്‍ റിയാദ്, സഹീര്‍ ബാബു ദമ്മാം, ഷക്കീല്‍ ബാബു ജിദ്ദ, ഫയാസ് റിയാദ്, ജരീര്‍ വേങ്ങര തുടങ്ങിയവര്‍ സംസാരിച്ചു. സൗദി ഇന്ത്യന്‍ ഇസ്ലാഹി സെന്റര്‍ ഭാരവാഹികളായ സലാഹ് കാരാടന്‍, നഈം കണ്ണൂര്‍, സൈനുല്‍ ആബിദീന്‍, ഡോ. അബൂബക്കര്‍ സിദ്ധിഖ്, അബ്ദുല്‍ ഗഫൂര്‍ വളപ്പന്‍ ആശംസകളര്‍പ്പിച്ചു. ഫോക്കസ് സൗദി കോഡിനേഷന്‍ കമ്മറ്റി ചെയര്‍മാന്‍ യുസ്ഫ് കൊടിഞ്ഞി അധ്യക്ഷത വഹിച്ച സംഗമത്തില്‍ പ്രിന്‍സാദ് പാറായി സ്വഗതം പറഞ്ഞു.
അക്ബര്‍ പൊന്നാനി
from kerala news edited
via IFTTT
