Story Dated: Friday, December 26, 2014 08:27
തിരുവനന്തപുരം: സര്‍ക്കാര്‍ ചീഫ്‌വിപ്പ്‌ പി സി ജോര്‍ജ്‌ജിന്റെ പ്രൈവറ്റ്‌ സെക്രട്ടറിയുടെ മകന്റെ വാഹനമിടിച്ച്‌ ഓട്ടോ ഡ്രൈവര്‍ക്ക്‌ ഗുരുതര പരിക്ക്‌. പി സി ജോര്‍ജ്‌ജിന്റെ പി എ സണ്ണിയുടെ മകന്‍ ബിജിന്‍ കെ തോമസും സുഹൃത്തുക്കളും സഞ്ചരിച്ച ബിഎംഡബ്‌ള്യൂ കാറാണ്‌ അപകടം ഉണ്ടാക്കിയത്‌.
ഇന്നലെ രാത്രി 11.30 ന്‌ തിരുവനന്തപുരം നഗരത്തില്‍ നടന്ന സംഭവത്തില്‍ രണ്ട്‌ ഓട്ടോകളാണ്‌ തകര്‍ന്നത്‌. മദ്യലഹരിയില്‍ അമിത വേഗത്തില്‍ പോയ കാര്‍ ശാസ്‌തമംഗലത്ത്‌ ഡിവൈഡറില്‍ തട്ടി രണ്ടു ഓട്ടോകളില്‍ ഇടിക്കുകയായിരുന്നു. ഇടിയുടെ ആഘാതത്തില്‍ ഒരു ഓട്ടോ പൂര്‍ണ്ണമായും തകര്‍ന്നു. ഗുരുതരാവസ്‌ഥയിലായ ഓട്ടോ ഡ്രൈവറെ മെഡിക്കല്‍ കോളേജില്‍ പ്രവേശിപ്പിച്ചു.
സംഭവത്തിന്‌ ശേഷം നിര്‍ത്താതെ ഓടിച്ചു പോയ കാര്‍ ടയര്‍ പൊട്ടിയതിനെ തുടര്‍ന്ന്‌ വഴിയില്‍ ഉപേക്ഷിച്ചു ബിജിനും കൂട്ടുകാരും ഇറങ്ങിയോടി. തുടര്‍ന്ന്‌ നാട്ടുകാര്‍ കാര്‍ തടഞ്ഞിട്ടു. കാര്‍ കസ്‌റ്റഡിയില്‍ എടുക്കുന്നത്‌ തടഞ്ഞതിനെ തുടര്‍ന്ന്‌ പോലീസും നാട്ടുകാരും തമ്മില്‍ നേരിയ വാക്കേറ്റമുണ്ടാക്കി.
ഒടുവില്‍ നടപടിയെടുക്കാമെന്ന്‌ പോലീസ്‌ ഉറപ്പ്‌ നല്‍കിയതോടെയാണ്‌ നാട്ടുകാര്‍ പിരിഞ്ഞത്‌. നേരത്തേ പോലീസ്‌ കാര്‍ സ്‌ഥലത്തു നിന്നും മാറ്റാന്‍ ശ്രമിച്ചത്‌ സംഘര്‍ഷത്തിന്‌ കാരണമായിരുന്നു. നേരത്തേയും ബിജിത്തും കൂട്ടരും ഈ ബിഎംഡബ്ല്യൂ കാര്‍ അമിതവേഗത്തില്‍ ഓടിച്ച്‌ അപകടമുണ്ടാക്കിയിട്ടുണ്ട്‌. ബിജിനെതിരേ കേസെടുത്തിട്ടുണ്ട്‌.
from kerala news edited
via IFTTT
