Story Dated: Friday, January 16, 2015 11:13
മുംബൈ: മഹാരാഷ്ട്ര ജയിലുകളില്‍ കഴിയുന്ന മുസ്ലീം തടവുകാരുടെ എണ്ണമെടുക്കാന്‍ തുനിഞ്ഞ ന്യുനപക്ഷ കമ്മീഷന്‍ ചെയര്‍മാന്‍ മുനാഫ് ഹക്കീം തെറിച്ചു. പുതിയ ചെയര്‍മാനെ നിയമിക്കുന്നതു സംബന്ധിച്ച് മുഖ്യമന്ത്രി ദേവേന്ദ്ര ഫഡ്‌നവീസിന്റെ ഓഫീസ് തീരുമാനത്തിലെത്തിയെന്നാണ് റിപ്പോര്‍ട്ട്. എന്നാല്‍ ഇതുസംബന്ധിച്ച് ഇതുവരെ ഔദ്യോഗികമായ ഉത്തരവുകളൊന്നും പുറത്തുവന്നിട്ടില്ല. വെള്ളിയാഴ്ച വൈകിട്ടോടെ ഉത്തരവ് ഇറങ്ങുമെന്നാണ് സൂചന.
മഹാരാഷ്ട്രയിലെ മുന്‍ കോണ്‍ഗ്രസ്- എന്‍.സി.പി സര്‍ക്കാരാണ് 2012ല്‍ ഹക്കീമിനെ ന്യുനപക്ഷ കമ്മിഷന് ചെയര്‍മാനായി നിയമിച്ചത്. അഞ്ചു വര്‍ഷം കാലാവധിയുണ്ടായിരിക്കേയാണ് ഹക്കീമിന് സ്ഥാനചലനം. എന്നാല്‍ പുതിയ സര്‍ക്കാരുകള്‍ അധികാരത്തിലെത്തുമ്പോള്‍ ഇത്തരം പ്രക്രിയകള്‍ സ്വാഭാവികമാണെന്നും മുന്‍ സര്‍ക്കാരുകളും ഇത് നടത്തിയിട്ടുണ്ടെന്നും സര്‍ക്കാരുമായി അടുത്ത വൃത്തങ്ങള്‍ അറിയിച്ചു.
അതേസമയം, തന്റെ സ്ഥാനത്ത് ആരു വന്നാലും സമുദായത്തിന്റെ ക്ഷേമത്തിനായി പ്രവര്‍ത്തിക്കുമെന്ന പ്രതീക്ഷയുണ്ടെന്ന് മുനാഫ് ഹക്കീം പറഞ്ഞു. സമാനമായ റിപ്പോര്‍ട്ട് അഞ്ചു വര്‍ഷം മുന്‍പും വന്നിരുന്നു. പുതിയ റിപ്പോര്‍ട്ട് തയ്യാറാക്കാന്‍ മാത്രമാണ് താന്‍ ശ്രമിച്ചത്. അത്തരമൊരു സര്‍വെ നടത്താന്‍ കമ്മിഷന് അവകാശമുണ്ടെന്നും ഹക്കീം കൂട്ടിച്ചേര്‍ത്തു.
സംസ്ഥാനത്തെ ജയിലുകളില്‍ കഴിയുന്ന മുസ്ലീം തടവുകാരെയും അവര്‍ക്കെതിരെ ചുമത്തിയിരിക്കുന്ന കുറ്റങ്ങളെ കുറിച്ചും പരിശോധിക്കാന്‍ മുനാഫ് ഹക്കീം ആലോചിക്കുന്നതായി ഒരു ദേശീയ ദിനപത്രം ഇക്കഴിഞ്ഞ 12ന് റിപ്പോര്‍ട്ടു ചെയ്തിരുന്നു.
from kerala news edited
via IFTTT
