പഴക്കമേറിയ കോച്ചുകള്‍ മാറ്റണം- കേരളസമാജം
Posted on: 19 Feb 2015
ബെംഗളൂരു: എക്‌സ്പ്രസ്സ് തീവണ്ടികളില്‍ പഴക്കമേറിയ കോച്ചുകള്‍ ഉപയോഗിക്കുന്നത് അവസാനിപ്പിക്കണമെന്ന് ബെംഗളൂരുവിലെ കേരളസമാജം ആവശ്യപ്പെട്ടു. ആനേക്കല്‍ തീവണ്ടിയപകടത്തെപ്പറ്റി അന്വേഷിക്കുന്ന റെയില്‍വേ സുരക്ഷാകമ്മീഷണര്‍ക്ക് സമര്‍പ്പിച്ച പ്രതികരണത്തിലാണ് ഇതുപറഞ്ഞിട്ടുള്ളത്.
ബെംഗളൂരുവിലേക്കുള്ളവ ഉള്‍പ്പെടെ കേരളത്തിലൂടെ ഓടുന്ന മിക്ക തീവണ്ടികളിലും പഴക്കമേറിയ കോച്ചുകളാണെന്ന് സമാജം പ്രസിഡന്റ് സി.പി. രാധാകൃഷ്ണനും സെക്രട്ടറി റെജികുമാറും പറഞ്ഞു.
കോച്ചുകളുടെ കാലപ്പഴക്കം ആനേക്കല്‍ സംഭവത്തില്‍ മരണങ്ങള്‍ക്കിടയാക്കിയിട്ടുണ്ടെന്ന് അവര്‍ അഭിപ്രായപ്പെട്ടു. ഡി 8 കോച്ച് ഡി 9-ലേക്കു തുളച്ചുകയറി. ഒന്നുമുതല്‍ ഇരുപതുവരെ സീറ്റുകളില്‍ ഇരുന്നവര്‍ക്കാണ് ക്ഷതമേറ്റത്. നിലവാരം കുറഞ്ഞ കോച്ചുകളാണെന്നതാണ് ഇത് സൂചിപ്പിക്കുന്നത്. 1993-ല്‍ നിര്‍മിച്ച ഇവയ്ക്ക് 22 കൊല്ലമായി. ശരിയായ അറ്റകുറ്റപ്പണികള്‍ ഉണ്ടായതുമില്ല. ബലമേറിയ ആന്റി ടെലസ്‌കോപ്പിക് കോച്ചുകളായിരുന്നെങ്കില്‍ അപകടത്തില്‍ മരണമുണ്ടാകുമായിരുന്നില്ല.
പാളത്തിന്റെയോ കോച്ചുകളുടെയോ എന്‍ജിന്റെയോ പ്രശ്‌നമാണ് അപകടമുണ്ടാക്കിയത്. പാളത്തില്‍ പാറക്കല്ല് വീഴാന്‍ അവിടെ സാധ്യതയില്ല. പാറക്കല്ലുകള്‍ ഉള്ള സ്ഥലമല്ല. സമൂഹദ്രോഹികള്‍ അവിടെ അതിടാനും സാധ്യത കുറവാണ് -സമാജം പ്രതികരണത്തില്‍ പറഞ്ഞു.
from kerala news edited
via IFTTT
