Story Dated: Friday, April 3, 2015 03:31
തൃശൂര്‍: എണ്ണവിലയടക്കം വര്‍ധിപ്പിക്കുന്നതിനുള്ള നടപടിയെടുത്ത സര്‍ക്കാര്‍ അക്ഷയകേന്ദ്രങ്ങളുടെ വയറ്റത്തടിച്ചു. വോട്ടേഴ്‌സ് ലിസ്‌റ്റില്‍ പേരു ചേര്‍ക്കുന്നതിനുള്ള സേവനനിരക്ക്‌ 25 രൂപയില്‍നിന്ന്‌ 10 രൂപയാക്കി കുറച്ചത്‌ അക്ഷയസംരംഭകരെ വെട്ടിലാക്കി. 25 രൂപയില്‍നിന്ന്‌ സേവനനിരക്ക്‌ വര്‍ധിപ്പിക്കണമെന്ന ആവശ്യമുന്നയിച്ചുവരുന്നതിനിടെയാണ്‌ നിരക്ക്‌ ഏകപക്ഷീയമായി കുറച്ചത്‌. അതേസമയം അക്ഷയകേന്ദ്രങ്ങളെ തകര്‍ക്കുന്നതിനുള്ള നീക്കമാണിതെന്ന്‌ പരാതിയുണ്ട്‌. വോട്ടേഴ്‌സ് ലിസ്‌റ്റില്‍ പേര്‌ ചേര്‍ക്കുന്നതിന്‌ 10 രൂപ സേവനനിരക്കായി സര്‍ക്കാര്‍ തീരുമാനിച്ചതോടെ അക്ഷയസംരംഭകര്‍ അതിനെതിരേ രംഗത്തിറങ്ങി. കേരളത്തിലെ അക്ഷയ കേന്ദ്രങ്ങളെ വലിയ നഷ്‌ടത്തിലേക്ക്‌ എത്തിക്കുന്ന തീരുമാനത്തില്‍നിന്ന്‌ സര്‍ക്കാര്‍ പിന്മാറണമെന്നും നിലവിലെ 25 രൂപതന്നെ സേവനനിരക്കായി തീരുമാനിച്ച്‌ ഉത്തരവ്‌ ഉണ്ടാകണമെന്നും ആവശ്യപ്പെട്ട്‌ അസോസിയേഷന്‍ ഓഫ്‌ ഐ.ടി. എംപ്ലോയീസ്‌ സംസ്‌ഥാനസമിതിയുടെ നേതൃത്വത്തില്‍ തെരഞ്ഞെടുപ്പു കമ്മിഷണര്‍, മുഖ്യമന്ത്രി, ഐ.ടി. മന്ത്രി, ഐ.ടി. സെക്രട്ടറി, ഐ.ടി. മിഷന്‍ ഡയറക്‌ടര്‍, അക്ഷയ ഡയറക്‌ടര്‍ എന്നിവര്‍ക്ക്‌ പരാതി നല്‍കി. അക്ഷയ കേന്ദ്രങ്ങളില്‍ക്കൂടി ചേര്‍ക്കുന്ന വോട്ടര്‍ ഐ.ഡിയുടെ സേവനനിരക്കായ 25 രൂപ വാങ്ങുന്നതിന്‌ സംസ്‌ഥാന കമ്മിറ്റി തീരുമാനിച്ചു. തടസം ഉണ്ടാവുകയാണെങ്കില്‍ മുഴുവന്‍ അക്ഷയ കേന്ദ്രങ്ങളും വോട്ടര്‍ ഐ.ഡി. ചേര്‍ക്കുന്ന പ്രവര്‍ത്തനം നിര്‍ത്തിവയ്‌ക്കുമെന്നും അസോസിയേഷന്‍ സംസ്‌ഥാന ജനറല്‍ സെക്രട്ടറി എ.ഡി. ജയന്‍ അറിയിച്ചു.
from kerala news edited
via IFTTT
