Story Dated: Wednesday, March 4, 2015 01:29
കോട്ടയം: വിജയപുരം നിവാസികളുടെ കുടിവെള്ള ക്ഷാമം പരിഹരിക്കാന്‍ ടാങ്കര്‍ ലോറിയില്‍ കുടിവെള്ളമെത്തിക്കാന്‍ തീരുമാനം. ഇന്നു ചേരുന്ന ജില്ലാ ആസൂത്രണ സമിതി യോഗത്തിന്റെ അനുമതി ലഭിച്ചാല്‍ നാളെ മുതല്‍ ടാങ്കര്‍ ലോറികളില്‍ കുടിവെള്ളമെത്തിക്കാന്‍ പഞ്ചായത്തു ഭരണസമിതി യോഗം തീരുമാനിച്ചു.
ഒരു ലക്ഷം രൂപയുടെ പദ്ധതിയാണ്‌ ഇതിനായി തയാറാക്കിയിരിക്കുന്നത്‌. നഗരത്തോടു ചേര്‍ന്നു കിടക്കുന്ന വിജയപുരം പഞ്ചായത്തില്‍ എല്ലാ വാര്‍ഡുകളിലും രൂക്ഷമായ കുടിവെള്ളമാണ്‌ അനുഭവപ്പെടുന്നത്‌. നഗരസഭ കഴിഞ്ഞാല്‍ ഏറ്റവും കൂടുതല്‍ ഫ്‌ളാറ്റുകള്‍ സ്‌ഥിതി ചെയ്യുന്ന പഞ്ചായത്താണിത്‌.
ഫ്‌ളാറ്റുകളുടെ എണ്ണം കൂടിയതോടെ ആവശ്യകത വര്‍ധിച്ചതും വെള്ളത്തിന്റെ ഉപയോഗം കൂടാന്‍ കാരണമായിട്ടുണ്ട്‌. ഇതിനൊപ്പം പൈപ്പ്‌ പൊട്ടല്‍ തുടര്‍ക്കഥയായതും പഞ്ചായത്തിലെ കുടിവെള്ള ക്ഷാമത്തിന്റെ ആക്കം കൂട്ടി. പഞ്ചായത്തിന്റെ മിക്ക വാര്‍ഡുകളിലും പൈപ്പ്‌ പൊട്ടല്‍ നിത്യസംഭവമാണ്‌. വടവാതൂര്‍ കടത്തുഭാഗത്തു പ്രധാന പൈപ്പ്‌ ലൈന്‍ പൊട്ടി ദിവസവും വന്‍തോതില്‍ വെള്ളം നഷ്‌ടമാകുന്നുണ്ട്‌.
പൈപ്പിലൂടെ പോകുന്ന പോകുന്ന വെള്ളത്തിന്റ 50 ശതമാനവും ഇത്തരത്തില്‍ മീനന്തറയാറ്റിലേക്കു ഒഴുകി പോകുന്നു. ഈ തകരാര്‍ 31നകം പരിഹരിക്കാമെന്ന്‌ വാട്ടര്‍ അഥോറിറ്റി അധികൃതര്‍ ഉറപ്പു നല്‍കിയതായി പഞ്ചായത്ത്‌ പ്രസിഡന്റ്‌ റോയി ജോണ്‍ ഇടയത്തറ അറിയിച്ചു.
പൈപ്പ്‌ പൊട്ടലുകളും രണ്ടാഴ്‌ചയ്‌ക്കുള്ളില്‍ പരിഹരിക്കാമെന്ന്‌ അധികൃതര്‍ ഉറപ്പു നല്‍കിയിട്ടുണ്ട്‌. കെ.കെ. റോഡില്‍ വടവാതൂര്‍ കവലയില്‍ പൈപ്പ്‌ പൊട്ടിയതിനെത്തുടര്‍ന്ന്‌ റോഡിനുണ്ടായ തകരാറും ഉടന്‍ പരിഹരിക്കുമെന്ന്‌ പഞ്ചായത്ത്‌ പ്രസിഡന്റ്‌ പറഞ്ഞു. ഇവിടെ റോഡ്‌ തകര്‍ന്നു കിടക്കുന്നതിനെതിരേ വ്യാപാരികള്‍ ഉള്‍പ്പെടെയുള്ളവര്‍ പ്രതിഷേധവുമായി രംഗത്തെത്തിയിരുന്നു.
പഞ്ചായത്തിനായി നടപ്പാക്കുന്ന 44 കോടി രൂപയുടെ പദ്ധതി പൂര്‍ത്തിയാകുന്നതോടെ കുടിവെള്ള ക്ഷാമം പൂര്‍ണമായി പരിഹരിക്കാന്‍ കഴിയുമെന്നാണ്‌ അധികൃതരുടെ പ്രതീക്ഷ. മന്ത്രി തിരുവഞ്ചൂര്‍ രാധാകൃഷ്‌ണന്റെ എം.എല്‍.എ. ഫണ്ടില്‍ ഉള്‍പ്പെടുത്തി നിര്‍മാണം നടക്കുന്ന കാര്‍മല്‍വില്ല,ഉന്നക്കുന്ന്‌ കുടിവെള്ള പദ്ധതികളും അവസാന ഘട്ടത്തിലാണ്‌.
അതേസമയം കോട്ടയം നഗരസഭയുടെ വിവിധ ഭാഗങ്ങളില്‍ കുടിവെള്ള ക്ഷാമം രൂക്ഷമായിരിക്കുകയാണ്‌. നഗരത്തിന്റെ ഓരോ ഭാഗങ്ങളില്‍ ദിവസവും പൈപ്പ്‌ ലൈനുകള്‍ പൊട്ടുന്നതാണ്‌ കുടിവെള്ള ക്ഷാമത്തിനു കാരണം. പുതിയ പദ്ധതികള്‍ പലതും പ്രഖ്യാപിക്കുന്നുണ്ടെങ്കിലും ജനങ്ങള്‍ക്ക്‌ ഇതുവരെ പ്രയോജനമൊന്നും ലഭിച്ചിട്ടില്ല.
from kerala news edited
via IFTTT
