Story Dated: Sunday, December 28, 2014 02:03
മാനന്തവാടി: തേറ്റമല ഗവ. ഹൈസ്‌കൂളിനായി സ്‌ഥലം വിലക്കുവാങ്ങാനായി ജനുവരി 16 മുതല്‍ തേറ്റമല എസ്‌റ്റേറ്റ്‌ മിനി സ്‌റ്റേഡിയത്തില്‍ സെവന്‍സ്‌ ഫുട്‌ബോള്‍ ടൂര്‍ണമെന്റ്‌ സംഘടിപ്പിക്കുമെന്ന്‌ സംഘാടകര്‍ വാര്‍ത്താസമ്മേളനത്തില്‍ അറിയിച്ചു. മുന്‍വര്‍ഷങ്ങളില്‍ നിര്‍ധനരായ രോഗികളെ സഹായിക്കാനും പുതിയഫുട്‌ബോള്‍ പ്രതിഭകള്‍ക്ക്‌ പരിശീലനം നല്‍കാനും വേണ്ടി ലേബര്‍ക്ലബ്ബ്‌ എ.കെ.ജി. സ്‌മാരക പ്രൈസ്‌ മണി ടൂര്‍ണമെന്റുകള്‍ സംഘടിപ്പിക്കുകയും വന്‍വിജയമാവുകയും ചെയ്‌തിരുന്നു. ഈ വര്‍ഷം മുതല്‍ ഹൈസ്‌കൂളായി ഉയര്‍ത്തപ്പെട്ട തേറ്റമല ഹൈസ്‌കൂളിന്‌ സ്‌ഥലം വാങ്ങിക്കാനായി പി.ടി.എ.യുടെയും നാട്ടുകാരുടെയും സഹകരണത്തോടെ ആറു ലക്ഷം രൂപ സമാഹരിച്ചിരുന്നു. ഇനിയും ലക്ഷങ്ങള്‍ ആവശ്യമുള്ളതിനാലാണ്‌ ടൂര്‍ണമെന്റില്‍ നിന്നും ലഭിക്കുന്ന വരുമാനം സ്‌കൂള്‍ സ്‌ഥലമെടുപ്പിന്‌ നല്‍കാന്‍ തീരുമാനിച്ചത്‌. ഇതിന്റെ നടത്തിപ്പിനായി കെ പി ഷണീര്‍ ചെയര്‍മാനും കെ ഖാലിദ്‌ കണ്‍വീനറുമായ 101 അംഗ കമ്മിറ്റി രൂപീകരിച്ചതായും ടൂര്‍ണമെന്റില്‍ പങ്കെടുക്കാന്‍ താല്‍പര്യമുള്ളവര്‍ 9656053946 എന്ന നമ്പറില്‍ ബന്ധപ്പെടണമെന്നും സംഘാടകര്‍ അറിയിച്ചു. പത്രസമ്മേളനത്തില്‍ ആര്‍. രവീന്ദ്രന്‍, വി.പി മൊയ്‌തീന്‍, കെ. ഖാലിദ്‌, കെ.പി ഷമീര്‍ എന്നിവര്‍ പങ്കെടുത്തു.
from kerala news edited
via IFTTT
