Story Dated: Tuesday, January 27, 2015 09:17
തിരുവനന്തപുരം: ബാര്‍കോഴ വിവാദത്തില്‍ മാണിയുടെ രാജി ആവശ്യപ്പെട്ട്‌ ബിജെപി ആഹ്വാനം ചെയ്‌ത ഹര്‍ത്താല്‍ പൂര്‍ണ്ണം. മൂന്ന് മണിക്കൂര്‍ പിന്നിടുമ്പോള്‍ ജനജീവിതം പൂര്‍ണ്ണമായി സ്തംഭിച്ചു. പ്രധാന കേന്ദ്രങ്ങളിലെല്ലാം സ്വകാര്യ, ഇരുചക്ര വാഹനങ്ങള്‍ മാത്രമാണ് ഓടിയത്. കെഎസ്ആര്‍ടിസി ബസുകള്‍ പൂര്‍ണ്ണമായും സര്‍വീസ് നിര്‍ത്തിവെച്ചതോടെ ജനങ്ങള്‍ വലഞ്ഞു.
റെയില്‍ മാര്‍ഗ്ഗം എത്തിയവരാണ് ഏറ്റവും കുടുങ്ങിയത്. ഇന്നലെ രാത്രി സ്റ്റേഷനിലെത്തിയവര്‍ എത്തേണ്ടിടത്ത് എത്താതെ സ്റ്റേഷനില്‍ കഴിയാന്‍ നിര്‍ബ്ബന്ധിതമായിരിക്കുകയാണ്. കട കമ്പോളങ്ങളും അടഞ്ഞുകിടക്കുകയാണ്. കര്‍ശനമായ പോലീസ് പരിശോധനകളും നടക്കുന്നുണ്ട്. നഗരത്തിലെ ഇരുചക്രവാഹനക്കാരെ പോലീസ് പരിശോധന നടത്തുന്നുണ്ട്. ചിലയിടങ്ങളില്‍ രാവിലെ പോലീസ് ജനസേവനത്തിനായി വാഹനം എത്തിച്ചിരുന്നു. ഇപ്പോള്‍ അതും നിര്‍ത്തിയിരിക്കുകയാണ്. നഗരങ്ങളിലെല്ലാം പൊതുവേ തിരക്ക് കുറവാണ്. അനിഷ്ട സംഭവങ്ങളൊന്നും ഇതുവരെ റിപ്പോര്‍ട്ട് ചെയ്തിട്ടില്ല.
രാവിലെ ആറു മുതല്‍ വൈകിട്ട്‌ ആറു മണി വരെയാണ്‌ ഹര്‍ത്താല്‍. ഇതേ തുടര്‍ന്ന്‌ ദേശീയ ഗെയിംസിലെ ദീപശിഖ പ്രയാണം ഉള്‍പ്പെടെ സര്‍ക്കാര്‍ ഇന്ന്‌ നടത്താനിരുന്ന പൊതു പരിപാടികള്‍ പലതും നീക്കിവെച്ചിട്ടുണ്ട്‌. സര്‍വകലാശാല പരീക്ഷകളും റേഷന്‍കാര്‍ഡുമായി ബന്ധപ്പെട്ട ഫോട്ടോയെടുപ്പും നീക്കി വെച്ചിട്ടുണ്ട്‌. ഈ ഹര്‍ത്താല്‍ കൂടിയായതോടെ കെ എം മാണിയുടെ സ്വന്തം പ്രദേശമായ പാലായില്‍ മൂന്നാം ദിവസമാണ്‌ ജനങ്ങള്‍ ദുരിതം അനുഭവിക്കുന്നത്‌.
കഴിഞ്ഞയാഴ്‌ച എല്‍ഡിഎഫും യുഡിഎഫും രണ്ടു ദിവസങ്ങള്‍ പാലായില്‍ ഹര്‍ത്താല്‍ ആചരിച്ചിരുന്നു. അനാവശ്യ വിവാദങ്ങളിലേക്ക്‌ മാണിയെ വലിച്ചിഴയ്‌ക്കുന്നു എന്നാരോപിച്ചായിരുന്നു യുഡിഎഫ്‌ ഹര്‍ത്താല്‍ നടത്തിയതിന്‌ തൊട്ടുപിന്നാലെ മാണി രാജി വെയ്‌ക്കണമെന്ന്‌ എല്‍ഡിഎഫും സമരം നടത്തി. ഇതിന്‌ ശേഷമാണ്‌ ഇപ്പോള്‍ മൂന്നാമത്തെ ഹര്‍ത്താലും ഉണ്ടായിട്ടുള്ളത്‌.
from kerala news edited
via IFTTT
