Story Dated: Monday, December 22, 2014 12:30
തിരുവനന്തപുരം: മദ്യനയത്തില്‍ കെപിസിസി പ്രസിഡന്റും മുഖ്യമന്ത്രിയും രണ്ടു വഴിക്കായതോടെ സര്‍ക്കാരിന്റെ നയത്തിന്‌ പിന്തുണതേടി പാര്‍ലമെന്ററി പാര്‍ട്ടിയോഗം തുടങ്ങി. എ, ഐ ഗ്രൂപ്പുകളില്‍ പെട്ട എംഎല്‍എമാരും മന്ത്രിമാരും മുഖ്യമന്ത്രിയുടെ നേതൃത്വത്തിലാണ്‌ വിഷയം ചര്‍ച്ച ചെയ്യുന്നത്‌.
ഐ ഗ്രൂപ്പിലെ 40 ല്‍ 30 പേരോളം യോഗത്തില്‍ പങ്കെടുക്കുന്നുണ്ട്‌. മന്ത്രിമാരില്‍ ചിലരും മൂന്‍കൂറായി അവധി വാങ്ങിയിട്ടുള്ള ജനപ്രതിനിധികളും മാത്രമാണ്‌ വിട്ടു നില്‍ക്കുന്നത്‌. അസാന്നിദ്ധ്യത്തില്‍ പ്രധാനി സുധീരനെ പിന്തുണയ്‌ക്കുന്ന ടി. എന്‍. പ്രതാപനാണ്‌. വിദേശത്ത്‌ പോയിരിക്കുന്നതിനാലാണ്‌ പ്രതാപന്‍ വിട്ടു നില്‍ക്കുക. സര്‍ക്കാരിന്റെ മദ്യനയം സംബന്ധിച്ച പുതിയ തീരുമാനം അനുകൂലിക്കുന്നവരാണ്‌ ഭൂരിപക്ഷം ഐ ഗ്രൂപ്പുകാരും. ഇക്കാര്യത്തില്‍ ഗ്രൂപ്പ്‌ വിഭജനം ഇല്ലാതെ തന്നെ എ ഐ ഗ്രൂപ്പുകള്‍ ഒന്നിച്ചിട്ടുണ്ട്‌. ഇതോടെ പൂര്‍ണ്ണമായ മദ്യനിരോധനം എന്ന അഭിപ്രായത്തില്‍ ഉറച്ചു നില്‍ക്കുന്ന കെപിസിസി പ്രസിഡന്റ്‌ ഒറ്റപ്പെടുമെന്ന്‌ ഉറപ്പായി.
മദ്യനയം തിരുത്തിയ തീരുമാനത്തിന്‌ ശേഷം സര്‍ക്കാര്‍ മദ്യലോബിക്ക്‌ കീഴടങ്ങിയെന്നും സര്‍ക്കാരിന്‌ ഭരണ തുടര്‍ച്ച ഉണ്ടാകാന്‍ സാധ്യതയില്ലെന്നും സുധീരന്‍ പറഞ്ഞിരുന്നു. പാര്‍ലമെന്ററിപാര്‍ട്ടി യോഗത്തില്‍ ഈ വിഷയം ചര്‍ച്ചയില്‍ വരുമെന്നാണ്‌ കരുതുന്നത്‌. പാര്‍ലമെന്ററി പാര്‍ട്ടി യോഗം ഉടന്‍ വിളിക്കണമെന്നും യോഗത്തില്‍ കെപിസിസി പ്രസിഡന്റിനെ പങ്കെടുപ്പിക്കണമെന്നും നേരത്തേ ടി എന്‍ പ്രതാപന്‍ മുഖ്യമന്ത്രിക്ക്‌ കത്തയച്ചിരുന്നു.
from kerala news edited
via IFTTT
