Story Dated: Friday, January 9, 2015 03:15
ലക്കിടി: നാളികേര വില്‌പനയില്‍ വ്യാപാര തട്ടിപ്പ്‌ വ്യാപകമാകുന്നു. നാളികേരത്തിന്‌ വില കുത്തനെ ഉയര്‍ന്നതോടെയാണ്‌ മൂക്കാത്ത തേങ്ങകള്‍ വെട്ടിയിട്ട്‌ ഉണക്കി ഇടനിലക്കാരായ കച്ചവടക്കാര്‍ കടകളില്‍ എത്തിച്ച്‌ തട്ടിപ്പ്‌ നടത്തുന്നത്‌. ഇങ്ങനെ വില്‍ക്കപ്പെടുന്ന തേങ്ങകളില്‍ പലതും കേടുവന്നതാണ്‌. ജില്ലയില്‍ ഒരു കിലോ തേങ്ങയ്‌ക്ക് 30 മുതല്‍ 32 രൂപ വരെയാണ്‌ വില. ചില ഗ്രാമപ്രദേങ്ങളില്‍ ഇത്‌ 37 രൂപ വരെയുമുണ്ട്‌. ഇളനീര്‍പ്രായം കഴിഞ്ഞ്‌ മൂപ്പെത്താത്ത തേങ്ങകളില്‍ വെള്ളം കൂടുതലുണ്ടെന്നിരിക്കെ അധിക തൂക്കം ലഭിക്കുമെന്നതാണ്‌ ഈ തട്ടിപ്പിന്‌ ഇടനിലക്കാരെ പ്രേരിപ്പിക്കുന്നത്‌. കടകളില്‍ നിന്ന്‌ തേങ്ങ വാങ്ങി കഴിഞ്ഞാല്‍ കേടുണ്ടെങ്കില്‍ തിരികെ വാങ്ങാന്‍ വ്യാപാരികളും തയ്യാറല്ല. നാളികേരം വാങ്ങുമ്പോള്‍ തന്നെ കുലുക്കി നോക്കി കേടുണ്ടോയെന്ന്‌ ഉറപ്പുവരുത്തണമെന്നാണ്‌ ഇവരുടെ വാദം. ഗ്രാമ പ്രദേശങ്ങളിലെ തെങ്ങിന്‍ തോപ്പുകള്‍ കേന്ദ്രീകരിച്ചാണ്‌ മൂപ്പില്ലാത്ത തേങ്ങ ഉണക്കല്‍ കൂടുതലായും നടക്കുന്നത്‌. ഇടനിലക്കാരായ കച്ചവടക്കാര്‍ ജില്ലയ്‌ക്കകത്തും പുറത്തുമായി പല മേഖലകള്‍ കേന്ദ്രീകരിച്ചാണ്‌ ഇത്തരത്തിലുള്ള നാളികേരം വിറ്റഴിക്കുന്നത്‌. ഒറ്റപ്പാലം, ലക്കിടി, പത്തിരിപ്പാല, കോങ്ങാട്‌ പ്രദേശങ്ങളിലെ തെങ്ങിന്‍തോപ്പുകളില്‍നിന്ന്‌ കൊണ്ടുവരുന്ന മൂക്കാത്ത തേങ്ങകള്‍ ഇതര ജില്ലകളിലേക്കും കയറ്റിവിടുന്നുണ്ട്‌. കഴിഞ്ഞ ഒന്നര മാസത്തിലേറെയായി ഇത്തരത്തിലുള്ള വ്യാപാരതട്ടിപ്പ്‌ തുടങ്ങിയിട്ട്‌. ഇത്തരത്തില്‍ തേങ്ങ നല്‍കുന്ന ഉടമകള്‍ക്കും മൂത്ത തേങ്ങയേക്കാള്‍ കൂടുതല്‍ വില ഇടനില കച്ചവടക്കാര്‍ നല്‍കുന്നുണ്ട്‌. വ്യാപാരികള്‍ക്കും ലാഭവിഹി
തം കൂടുതലായി കിട്ടുന്നതുകൊണ്ട്‌ ഇവരും അറിഞ്ഞമട്ടില്ലാതെ കേടുവന്ന തേങ്ങ കച്ചവടം ചെയ്യുകയാണ്‌. ഇതിനെതിരെ ഉപഭോക്‌താക്കള്‍ക്കിടയില്‍ ആക്ഷേപം ശക്‌തമായിട്ടുണ്ട്‌.
രാജേഷ്‌ ലക്കിടി
from kerala news edited
via IFTTT
