Story Dated: Thursday, February 26, 2015 03:15
മണ്ണാരക്കാട്‌: മണ്ണാര്‍ക്കാട്‌ പൂരം പുറപ്പാട്‌ ഇന്ന്‌ നടക്കും. ഒരാഴ്‌ചയിലധികം നീണ്ടു നില്‍ക്കുന്ന മണ്ണാര്‍ക്കാട്ടുകാരുടെ ദേശീയ ഉത്സവം മാര്‍ച്ച്‌ 5ന്‌ സാംസ്‌കാരിക ഘോഷയാത്രയോടെ സമാപിക്കും. ഇന്ന്‌ രാവിലെ ക്ഷേത്രം തന്ത്രി ഈക്കാട്ട്‌മനക്കല്‍ നാരായണന്‍ നമ്പൂതിരിപ്പാടിന്റെ കാര്‍മ്മികത്വത്തില്‍ നടക്കുന്ന പ്രത്യേക താന്ത്രിക ചടങ്ങുകളോടെയാണ്‌ ഈ വര്‍ഷത്തെ പൂരാഘോഷങ്ങള്‍ക്ക്‌ ആരംഭം കുറിക്കുക. തുടര്‍ന്ന്‌ വൈകുന്നേരം ക്ഷേത്രാങ്കണത്തില്‍ നടക്കുന്ന സാംസ്‌കാരിക സന്ധ്യയില്‍ പൂരാഘോഷത്തിന്റെ ഭാഗമായി നല്‍കുന്ന ആലിപ്പറമ്പ്‌ ശിവരാമപ്പൊതുവാള്‍ സ്‌മാരകാ വാദ്യപ്രവീണ പുരസ്‌കാരം നല്‍കും. കവി വി. മധുസൂദനന്‍ നായര്‍ തായമ്പക വിദഗ്‌ധന്‍ മഞ്ചേരി ഹരിദാസന്‌ പുരസ്‌കാരം നല്‍കും. തുടര്‍ന്ന്‌ പൂരം പുറപ്പാടും ആറാട്ട്‌ എഴുന്നളളിപ്പും നടക്കും. രണ്ടാം പൂരദിവസം ആറാട്ട്‌ എഴുന്നള്ളിപ്പോടെ ആഘോങ്ങള്‍ക്ക്‌ തുടക്കമാവും. 28നാണ്‌ പൂരം കൊടിയേറ്റം. തുടര്‍ന്ന്‌ ഓട്ടന്‍തുളളല്‍, നാദസ്വരം എന്നിവയും നടക്കും. മാര്‍ച്ച്‌ 2ന്‌ കൂട്ടുവിളക്ക്‌, തുടര്‍ന്ന്‌ ചാക്യാര്‍ക്കൂത്ത്‌, തായമ്പക എന്നിവ നടക്കും. മാര്‍ച്ച്‌ 3നാണ്‌ പൂരാഘോഷത്തിന്റെ ചെറിയ ആറാട്ട്‌. 4ന്‌ നടക്കുന്ന വലിയ ആറാട്ടിനോടനുബന്ധിച്ച്‌ കുന്തിപ്പുഴ ആറാട്ടുകടവില്‍ കഞ്ഞിപ്പാര്‍ച്ച ഉണ്ടാവും. തുടര്‍ന്ന്‌ ചാക്യാര്‍ക്കൂത്ത്‌, തായമ്പക, നാദസ്വരം എന്നിവ നടക്കും. പൂരാഘോഷത്തിന്റെ സമാപന ദിനമായ 5ന്‌ ദേശവേലകളുടെ സംഗമത്തോടെയും സാംസ്‌കാരിക ഘോഷയാത്രയോടെയും കൂടി പ്രസിദ്ധമായ ചെട്ടിവേല നടക്കും. തുടര്‍ന്ന്‌ ദീപാരാധനക്കുശേഷം 21 പ്രദക്ഷിണത്തോടെ ഉത്സവാഘോഷങ്ങള്‍ക്ക്‌ കൊടിയിറങ്ങും.
from kerala news edited
via IFTTT
