Story Dated: Friday, December 19, 2014 03:18
തൃശൂര്‍: ശക്‌തന്‍സ്‌റ്റാന്‍ഡില്‍നിന്നു കാത്സ്യം കാര്‍ബൈഡ്‌ കലര്‍ത്തിയതിനെത്തുടര്‍ന്നു പിടികൂടിയ ഒരു ലോഡ്‌ ചെറുനാരങ്ങ കുരിയച്ചിറ അറവുശാലയ്‌ക്കടുത്ത്‌ കുമ്മായം ചേര്‍ത്ത്‌ കുഴിച്ചു മൂടി. ഭക്ഷ്യസുരക്ഷാ വിഭാഗത്തിന്റെ നേതൃത്വത്തിലായിരുന്നു നടപടി. ഭക്ഷ്യസുരക്ഷ കമ്മിഷണറുടെ നിര്‍ദേശം ലഭിക്കാത്തതിനാല്‍ രണ്ടാഴ്‌ചയായി ഈസ്‌റ്റ് സ്‌റ്റേഷനടുത്തുള്ള പാര്‍ക്കിംഗ്‌ ഏരിയയില്‍ ചെറുനാരങ്ങ ലോറി നിര്‍ത്തിയിട്ടിരിക്കുകയായിരുന്നു. കുമ്മായം ചേര്‍ക്കുന്നതോടെ നാരങ്ങയിലെ സിട്രിക്‌ ആസിഡിന്റെ വീര്യം ഇല്ലാതാകും. നാരങ്ങ സംസ്‌കരിച്ചതിനെ തുടര്‍ന്ന്‌, കസ്‌റ്റഡിയിലായിരുന്ന ലോറി ഡ്രൈവറെയും സഹായിയേയും വിട്ടയച്ചു. ഡ്രൈവര്‍ക്കെതിരേ കേസെടുത്തിട്ടുണ്ട്‌. രണ്ടാഴ്‌ച മുമ്പാണ്‌ ആന്ധ്രയില്‍നിന്നു കാര്‍ബൈഡ്‌ പാക്കറ്റുകള്‍ നിറച്ച ലോറിയില്‍ ഒമ്പതു ടണ്‍ ചെറുനാരങ്ങ ശക്‌തന്‍ മാര്‍ക്കറ്റിലെത്തിയത്‌. തൊഴിലാളികളുടെ പരാതിയെത്തുടര്‍ന്നാണ്‌ ലോറി ഈസ്‌റ്റ് പോലിസ്‌ കസ്‌റ്റഡിയിലെടുത്തത്‌. ഭക്ഷ്യസുരക്ഷാ വിഭാഗത്തിന്റെ സാമ്പിള്‍ പരിശോധനയില്‍ കാത്സ്യം കാര്‍ബൈഡ്‌ ഉപയോഗിച്ചതായി സ്‌ഥിരീകരിച്ചിരുന്നു. തൃശൂരിലെ മൂന്നു കടകളിലേക്കാണു നാരങ്ങ എത്തിച്ചത്‌. ആന്ധ്രയില്‍ ലോഡ്‌ കയറ്റി അയച്ചവരെപ്പറ്റി അന്വേഷണ സംഘത്തിനു വിവരം ലഭിച്ചിട്ടുണ്ട്‌. ലാബ്‌ റിപ്പോര്‍ട്ട്‌ ഫുഡ്‌ സേഫ്‌റ്റി കമ്മിഷണര്‍ക്ക്‌ അയച്ചെങ്കിലും നടപടി ഇഴയുകയായിരുന്നു. നിയമനടപടി പൂര്‍ത്തിയാകാതിരുന്നതിനാലാണ്‌ നാരങ്ങ സംസ്‌കരണം വൈകിയതെന്നാണു കമ്മിഷണറുടെ ഓഫിസ്‌ നല്‍കുന്ന വിശദീകരണം.
from kerala news edited
via IFTTT
