Story Dated: Friday, December 19, 2014 03:08
കാഞ്ഞങ്ങാട്‌: സ്വകാര്യ വ്യക്‌തിയുടെ പറമ്പില്‍ കെട്ടിയിട്ട 16 പോത്തിന്‍ കുഞ്ഞുങ്ങളെ മോഷ്‌ടിച്ച്‌ വില്‍പ്പന നടത്തിയ കേസില്‍ സഹോദരങ്ങള്‍ അറസ്‌റ്റില്‍. കുണിയ പരിയാരം ഹൗസിലെ എം. ഷംസീര്‍ (22), സഹോദരന്‍ എം. സാഹിര്‍ (21) എന്നിവരെയാണ്‌ ബേക്കല്‍ പോലീസ്‌ അറസ്‌റ്റ് ചെയ്‌തത്‌.
ഇരുവരെയും ഹൊസ്‌ദുര്‍ഗ്‌ ജുഡീഷ്യല്‍ ഒന്നാം ക്ലാസ്‌ മജിസ്‌ട്രേറ്റ്‌ (രണ്ട്‌) കോടതി 14 ദിവസത്തേക്ക്‌ റിമാന്‍ഡ്‌ ചെയ്‌തു. പെരിയ മൂന്നാംകടവിലെ അനീഷയുടെ പറമ്പില്‍ നിന്ന്‌ പോത്തിന്‍ കുട്ടികളെ മോഷ്‌ടിച്ച കേസിലാണ്‌ ഇരുവരെയും പിടികൂടിയത്‌. നവംബര്‍ 16നാണ്‌ കേസിനാസ്‌പദമായ സംഭവം.
പോത്തിന്‍ കുഞ്ഞുങ്ങളെ മിനിലോറിയില്‍ കടത്തി കണ്ണൂരില്‍ കൊണ്ടുപോയി വില്‍പന നടത്തുകയായിരുന്നു. ഇതുസംബന്ധിച്ച്‌ അനീഷ പോലീസില്‍ പരാതി നല്‍കിയെങ്കിലും കേസെടുത്തിരുന്നില്ല. തുടര്‍ന്ന്‌ യുവതി സ്വന്തം നിലയില്‍ നടത്തിയ അന്വേഷണത്തില്‍ ഷംസീറും സാഹിറുമാണ്‌ പോത്തിന്‍ കുഞ്ഞുങ്ങളെ മോഷ്‌ടിച്ചതെന്നും അവയെ കണ്ണൂരില്‍ വില്‍പന നടത്തിയെന്നും മനസിലായി. പിന്നീട്‌ അനീഷ ഇരുവര്‍ക്കുമെതിരെ ഹൊസ്‌ദുര്‍ഗ്‌ കോടതിയില്‍ ഹര്‍ജി നല്‍കുകയും കോടതി ഇവര്‍ക്കെതിരെ കേസെടുക്കാന്‍ നിര്‍ദേശം നല്‍കുകയുമായിരുന്നു.
from kerala news edited
via IFTTT
