Story Dated: Monday, March 2, 2015 02:49
കൊല്ലപ്പള്ളി: റോഡരുകില്‍ നിന്ന മരം വെട്ടി മാറ്റുന്നതിനിടയില്‍ ഓടുന്ന കാറിനു മുകളില്‍ വീണ്‌ കാര്‍ യാത്രികരായ രണ്ട്‌ യുവാക്കള്‍ക്ക്‌ പരുക്കേറ്റു. ഇന്നലെ രാവിലെ പത്തുമണിയോടെ പാലാ-തൊടുപുഴ റോഡില്‍ അന്തീനാട്‌ കുരിശുപള്ളിയ്‌ക്കു മുന്‍വശമായിരുന്നു അപകടം. കടുത്തുരിത്തി പുഞ്ചത്തലയ്‌ക്കല്‍ ജോമോന്‍, ബന്ധു സിറിള്‍ എന്നിവര്‍ക്കാണ്‌ പരുക്കേറ്റത്‌. ഇവരെ പ്രവിത്താനത്തെ സ്വകാര്യ ആശുപത്രിയില്‍ പ്രവേശിപ്പിച്ചു.
കെ.എസ്‌.ടി.പി. റോഡ്‌ വികസനത്തിന്റെ ഭാഗമായി റോഡരുകില്‍ നിന്ന തെങ്ങ്‌ വെട്ടിമാറ്റുന്നതിനിടയിലായിരുന്നു സംഭവം. തെങ്ങ്‌ പകുതി വെട്ടിയശേഷം വടം ഉപയോഗിച്ച്‌ ലോറിയുമായി ബന്ധിച്ചശേഷം വലിച്ചു താഴെയിടുന്നതിനിടയില്‍ കാറിനു മുകളില്‍ പതിക്കുകയായിരുന്നു. പാലായില്‍നിന്ന്‌ തൊടുപുഴയ്‌ക്ക്‌ പോവുകയായിരുന്നു ഇവര്‍. മരം മുറിച്ചുമാറ്റിയശേഷമാണ്‌ യുവാക്കളെ കാറില്‍നിന്നും പുറത്തെടുത്തത്‌. കാര്‍ നിശേഷം തകര്‍ന്നു. ഇവിടെയാതൊരു മുന്നറിയിപ്പും ഏര്‍പ്പെടുത്തിയിരുന്നില്ലെന്ന്‌ നാട്ടുകാര്‍ പറഞ്ഞു.
from kerala news edited
via IFTTT
