Story Dated: Sunday, April 5, 2015 02:02
പെരിങ്ങോട്ടുകര: ജനതാദള്‍ യു നേതാവ്‌ പി.ജി. ദീപക്കിനെ കൊലപ്പെടുത്തിയ കേസില്‍ പ്രത്യേക അന്വേഷണസംഘത്തെയും കുടുംബം ആവശ്യപ്പെടുന്ന പ്രോസിക്യൂട്ടറെയും നിയോഗിക്കുമെന്ന്‌ ആഭ്യന്തരമന്ത്രി രമേശ്‌ ചെന്നിത്തല. ഇന്നലെ രാവിലെ പെരിങ്ങോട്ടുകര കരുവാന്‍കുളത്തെ ദീപക്കിന്റെ വീട്ടിലെത്തി മാധ്യമപ്രവര്‍ത്തകരോട്‌ സംസാരിക്കുകയായിരുന്നു അദ്ദേഹം.
കൊലപാതകത്തില്‍ ഗൂഢാലോചനയുണ്ടെന്നുകാട്ടി ദീപക്കിന്റെ ഭാര്യ വര്‍ഷ മന്ത്രിക്ക്‌ പരാതി നല്‌കിയതിനെ തുടര്‍ന്നാണ്‌ പ്രത്യേക അന്വേഷണസംഘത്തെ നിയോഗിക്കാമെന്ന്‌ അദ്ദേഹം വ്യക്‌തമാക്കിയത്‌. ചേര്‍പ്പ്‌ സി.ഐ ക്കാണ്‌ നിലവില്‍ അന്വേഷണ ചുമതല. കഴിഞ്ഞ മാര്‍ച്ച്‌ 24ന്‌ രാത്രി എട്ടരയോടെ പഴുവില്‍വച്ചാണ്‌ സംഭവം. കൊലപാതകത്തില്‍ പിടിയിലായ പ്രതികളില്‍ രണ്ടുപേര്‍ ജാമ്യത്തില്‍ ഇറങ്ങാന്‍ സാധ്യതയുണ്ടെന്ന്‌ ദീപക്കിന്റെ ബന്ധുക്കള്‍ സംശയം പ്രകടിപ്പിച്ചെങ്കിലും അതുണ്ടാകില്ലെന്നും പഴുതുകള്‍ അടച്ചായിരിക്കും കുറ്റപത്രം തയ്യാറാക്കുകയെന്നും ചെന്നിത്തല പറഞ്ഞു. ദീപക്കിന്റെ ഭാര്യയ്‌ക്ക് ജോലിയും കുടുംബത്തിന്‌ ധനസഹായവും നല്‍കുന്ന കാര്യം മന്ത്രിസഭായോഗം പരിഗണിക്കുമെന്നും അദ്ദേഹം കൂട്ടിച്ചേര്‍ത്തു.
പെരിങ്ങോട്ടുകരയില്‍ പോലീസ്‌ ഔട്ട്‌ പോസ്‌റ്റ് തുടങ്ങാന്‍ ഉടന്‍ നടപടി ആരംഭിക്കുമെന്നും കെട്ടിടം പണിയാണ്‌ ആദ്യം വേണ്ടതെന്നും ആഭ്യന്തരമന്ത്രി പറഞ്ഞു. എം.പി. വിന്‍സെന്റ്‌ എം.എല്‍എ., ജനതാദള്‍ യു ജില്ലാ പ്രസിഡന്റ് യൂജിന്‍ മോറേലി, ജോസഫ്‌ ചാലിശേരി, ജോസ്‌ വള്ളൂര്‍, സുനില്‍ അന്തിക്കാട്‌ എന്നിവരും മന്ത്രിക്കൊപ്പമുണ്ടായിരുന്നു.
from kerala news edited
via IFTTT
