Story Dated: Tuesday, March 24, 2015 05:32
പാരീസ്‌: വീണ്ടും ആകാശ ദുരന്തം. ഫ്രാന്‍സില്‍ വിമാനം തകര്‍ന്നുവീണ്‌ 148 പേര്‍ മരിച്ചതായി റിപ്പോര്‍ട്ട്‌. 142 യാത്രക്കാരും ആറ്‌ ജീവനക്കാരുമായി ബാഴ്‌സലോണയില്‍ നിന്ന്‌ ഡസില്‍ഡോര്‍ഫിലേക്ക്‌ പോകുകയായിരുന്ന എയര്‍ബസ്‌ എ 320 വമാനമാണ്‌ തകര്‍ന്നു വീണത്‌. 24 വര്‍ഷം പഴക്കമുള്ള വിമാനമാണ്‌ തകര്‍ന്നുവീണത്‌. ലുഫ്‌തന്‍സ എയര്‍ലൈന്‍സിന്റെ ഉപസ്‌ഥാപനമായ ജര്‍മ്മന്‍ വിംഗ്‌സിന്റെ ഉടമസ്‌ഥതയിലുള്ള വിമാനമാണിത്‌. യാത്രക്കാരില്‍ ആരും രക്ഷപെട്ടിരിക്കാന്‍ സാധ്യതയില്ലെന്ന്‌ ഫ്രഞ്ച്‌ പ്രസിഡന്റ്‌ ഫ്രാങ്കോയിസ്‌ ഒലാണ്ടെ പ്രതികരിച്ചു.
ആല്‍പ്‌സ് പര്‍വതനിരയിലാണ്‌ വിമാനം തകര്‍ന്നുവീണത്‌. വിമാനാവശിഷ്‌ടങ്ങള്‍ കണ്ടെത്തിയതായി ഫ്രഞ്ച്‌ ആഭ്യന്തര മന്ത്രാലയം സ്‌ഥിരീകരിച്ചു. ബാഴ്‌സിലോണയില്‍ നിന്ന്‌ നൂറ്‌ കിലോമീറ്റര്‍ അകലെ ഫ്രഞ്ച്‌ റിവെര നഗരത്തിന്റെ വടക്ക്‌ മാറിയാണ്‌ വിമാനാവശിഷ്‌ടങ്ങള്‍ കണ്ടെത്തിയത്‌. ആഭ്യന്തര മന്ത്രി ബെര്‍ണാഡ്‌ കാസ്‌നെവുവിനെ ദുരന്ത സ്‌ഥലത്തേക്ക്‌ അയച്ചതായി ഫ്രാന്‍സ്‌ പ്രധാനമന്ത്രി മാനുവല്‍ വാല്‍സ്‌ അറിയിച്ചു.
പ്രാദേശിക സമയം 8.55ന്‌ പുറപ്പെട്ട വിമാനത്തില്‍ നിന്ന്‌ പ്രാദേശിക സമയം രാവിലെ 10.47ന്‌ പൈലറ്റ്‌ അടിയന്തര സന്ദേശം അയച്ചിരുന്നു. തകര്‍ന്നു വീഴുന്നതിന്‌ തൊട്ടുമുന്‍പ്‌ 38,000 അടി ഉയരത്തില്‍ പറന്നു കൊണ്ടിരുന്ന വിമാനം 5000 അടി താഴ്‌ചയിലേക്ക്‌ താഴ്‌ന്ന് പറന്നതായും റിപ്പോര്‍ട്ടുകളുണ്ട്‌. അപകടകാരണം വ്യക്‌തമല്ല. മൃതദേഹങ്ങള്‍ അപകടസ്‌ഥലത്ത്‌ നിന്ന്‌ മാറ്റിക്കൊണ്ടിരിക്കുന്നതായി ഫ്രാന്‍സ്‌ ഏവിയേഷന്‍ അധികൃതരെ ഉദ്ധരിച്ച്‌ അന്താരാഷ്‌ട്ര വാര്‍ത്താ ഏജന്‍സികള്‍ റിപ്പോര്‍ട്ട്‌ ചെയ്യുന്നു.
from kerala news edited
via IFTTT
