Story Dated: Wednesday, March 18, 2015 03:09
വര്‍ക്കല: വീടിനുള്ളില്‍ പൂട്ടിയിട്ടിരുന്ന ഓട്ടോറിക്ഷ സാമൂഹ്യ വിരുദ്ധര്‍ കുത്തിക്കീറി നശിപ്പിച്ചതായി പരാതി. ചിലക്കൂര്‍ തട്ടാന്‍വിളാകം ആഷിര്‍ മന്‍സിലില്‍ ഷാനുവിന്റെ ഓട്ടോറിക്ഷയാണ്‌ നശിപ്പിച്ചത്‌.
തിങ്കളാഴ്‌ച രാത്രിയാണ്‌ സംഭവം. സവാരി നിര്‍ത്തി പതിവുപോലെ രാത്രി വീടിനു മുന്‍വശത്തെ പുരയിടത്തില്‍ പൂട്ടിയിട്ടിരുന്നതാണ്‌. ചൊവ്വാഴ്‌ച രാവിലെ വാഹനമെടുക്കാന്‍ എത്തിയപ്പോഴാണ്‌ നശിപ്പിച്ച നിലയില്‍ കാണപ്പെട്ടത്‌. അപ്‌ഹോള്‍സ്‌റ്ററി മുഴുവനും കുത്തിക്കീറിയിട്ടുണ്ട്‌. പിന്‍വശത്തെ ഗ്ലാസും തകര്‍ത്തു. മൂന്നു ടയറുകളും കത്തി ഉപയോഗിച്ച്‌ കുത്തിക്കീറിയിട്ടുണ്ട്‌. ഓട്ടോറിക്ഷ ഓടിച്ച്‌ കുടുംബം പുലര്‍ത്തുന്ന ഷാനുവിന്റെ ഉപജീവനമാര്‍ഗമാണ്‌ ഇതോടെ വഴിമുട്ടിയത്‌.
തട്ടാന്‍വിളാകം പ്രദേശത്ത്‌ സന്ധ്യകഴിഞ്ഞാല്‍ സാമൂഹ്യ വിരുദ്ധര്‍ രാവെളുക്കുവോളം മദ്യപിച്ച്‌ തമ്പടിക്കുന്നതായി ആക്ഷേപമുണ്ട്‌. പരാതിയുടെ അടിസ്‌ഥാനത്തില്‍ വര്‍ക്കല പോലീസ്‌ കേസെടുത്ത്‌ അന്വേഷണം ആരംഭിച്ചു.
from kerala news edited
via IFTTT
