Story Dated: Tuesday, December 2, 2014 07:57
ന്യൂഡല്‍ഹി: നിയമസഭാ തെരഞ്ഞെടുപ്പിന്റെ രണ്ടാം ഘട്ട വോട്ടെടുപ്പില്‍ ജമ്മു കാശ്‌മീരിലും ജാര്‍ഖണ്ഡിലും കനത്തപോളിംഗ്‌ രേഖപ്പെടുത്തി. ജമ്മുവില്‍ 71 ശതമാനവും ജാര്‍ഖണ്ഡില്‍ 65 ശതമാനവുമാണ്‌ പോളിംഗ്‌ രേഖപ്പെടുത്തിയത്‌. ജാര്‍ഖണ്ഡില്‍ മാവോയിസ്‌റ്റുകളും ജമ്മു കാശ്‌മീരില്‍ വിഘടന വാദികളും വോട്ടെടുപ്പ്‌ ബഹിഷ്‌കരിക്കാന്‍ ആഹ്വാനം ചെയ്‌തിരുന്നെങ്കിലും ജനപങ്കാളിത്തം ശ്രദ്ധേയമായി.
വിഘടനവാദികളുടെ ഭീഷണിയുടെ പശ്‌ചാത്തലത്തില്‍ തെരഞ്ഞെടുപ്പിന്‌ കനത്ത സുരക്ഷ ഏര്‍പ്പെടുത്തിയിരുന്നു. ജമ്മുവില്‍ 18 നിയമസഭാ മണ്ഡലങ്ങളിലേക്കും ജാര്‍ഖണ്ഡില്‍ 20 നിയമ സഭാ മണ്ഡലങ്ങളിലേക്കുമാണ്‌ തിരഞ്ഞെടുപ്പ്‌ നടന്നത്‌. രണ്ട്‌ സംസ്‌ഥാനങ്ങളിലും ആദ്യ ഘട്ടത്തിലും മികച്ച പോളിംഗ്‌ രേഖപ്പെടുത്തിരുന്നു. ആദ്യ ഘട്ട വോട്ടെടുപ്പും സമാധാനപരമായിരുന്നു.
ജമ്മുവില്‍ പിഡിപി, ബിജെപി, നാഷണല്‍ കോണ്‍ഫറന്‍സ്‌, കോണ്‍ഗ്രസ്‌ കക്ഷികളാണ്‌ മത്സരത്തിനുള്ളത്‌. ജാര്‍ഖണ്ഡില്‍ ഭരണകക്ഷിയായ ജെഎംഎം ഒറ്റയ്‌ക്ക് മത്സരിക്കുമ്പോള്‍ എജെഎസ്‌യുവുമായി സഖ്യമുണ്ടാക്കിയാണ്‌ ബിജെപി രംഗത്തുവന്നത്‌. കോണ്‍ഗ്രസ്‌-ആര്‍ജെഡി-ജെഡി(യു) കക്ഷികളും സഖ്യത്തില്‍ മത്സര രംഗത്തുണ്ട്‌.
from kerala news edited
via IFTTT
