ലേബര്‍ കാര്‍ഡ് പിഴ: കുടിശ്ശിക അടച്ചുതീര്‍ക്കാന്‍ നിര്‍ദേശം
Posted on: 01 Feb 2015
ഇ-കാര്‍ഡിന് അപേക്ഷിക്കാത്തവര്‍ക്ക് 500 ദിര്‍ഹം പിഴ ചുമത്തും
തൊഴില്‍കാര്‍ഡ് പിഴകള്‍ അടച്ചുതീര്‍ക്കാനുള്ള അവസരം ഉപയോഗപ്പെടുത്തണമെന്ന് തൊഴില്‍ മന്ത്രാലയത്തിന്റെ നിര്‍ദേശം. പിഴ കുടിശ്ശിക എത്ര തന്നെയായാലും ആയിരം ദിര്‍ഹം അടച്ചുതീര്‍ക്കാവുന്ന പദ്ധതി ജനവരി നാലിനാണ് പ്രാബല്യത്തില്‍ വന്നത്. പദ്ധതി ജൂണ്‍ 30 വരെ തുടരുമെന്നും ഇക്കാലയളവിനുള്ളില്‍ കമ്പനികള്‍ അവസരം ഉപയോഗപ്പെടുത്തണമെന്നും അസി. അണ്ടര്‍ സെക്രട്ടറി ഹുമൈദ് ബിന്‍ ദീമാസ് ചൂണ്ടിക്കാട്ടി. ജൂലായ് മുതല്‍ ഓരോ പിഴ കുടിശ്ശികയും തീര്‍ക്കുന്നതിനുള്ള തുക 4,000 ദിര്‍ഹമാകും. 2016 തുടങ്ങുന്നതോടെ കുടിശ്ശിക അടച്ചുതീര്‍ക്കാനുള്ള തുക 10,000 ദിര്‍ഹമാകുമെന്നും ഹുമൈദ് ബിന്‍ ദീമാസ് വ്യക്തമാക്കി.
ലേബര്‍കാര്‍ഡ് നിയമലംഘനവുമായി ബന്ധപ്പെട്ട് മാര്‍ച്ച് അഞ്ച് മുതല്‍ പുതുക്കിയ പിഴനിരക്ക് പ്രാബല്യത്തില്‍ വരുമെന്നും അദ്ദേഹം അറിയിച്ചു. ജീവനക്കാര്‍ രാജ്യത്തെത്തി 60 ദിവസത്തിനുള്ളില്‍ ഇലക്ട്രോണിക് ലേബര്‍ കാര്‍ഡിന് അപേക്ഷ നല്‍കുകയോ കാലാവധി കഴിഞ്ഞവ പുതുക്കാന്‍ അപേക്ഷ നല്‍കുകയോ ചെയ്യാത്തവര്‍ക്ക് 500 ദിര്‍ഹമാണ് പിഴ ചുമത്തുക. അപേക്ഷ നല്‍കാന്‍ വൈകുന്ന ഓരോ മാസത്തിനും 500 ദിര്‍ഹം വീതം അധികമായി ചുമത്തപ്പെടും. ഈയിടെ മന്ത്രിസഭ അംഗീകരിച്ച തീരുമാനപ്രകാരമാണ് പുതിയ പിഴ ചുമത്തുന്നത്. ഇളവ് കാലാവധി തുടങ്ങി 15 ദിവസത്തിനുള്ളില്‍ 3,800 കമ്പനികള്‍ തങ്ങള്‍ക്ക് കീഴിലുള്ള ആറായിരം ജീവനക്കാരുടെ പിഴ കുടിശ്ശികകള്‍ അടച്ചുതീര്‍ത്തതായും ബിന്‍ ദീമാസ് പറഞ്ഞു.
from kerala news edited
via IFTTT
