യുദ്ധക്കെടുതി: സഹായമെത്തിക്കാന്‍ ശൈഖ് ഖലീഫയുടെ നിര്‍ദേശം
Posted on: 07 Jan 2015
ദേശീയ ദുരിതാശ്വാസ കാമ്പയിനില്‍ പൊതുജനങ്ങളെ പങ്കാളികളാക്കാന്‍ ആഹ്വാനം
ദുബായ്:
അറബ് മേഖലയില്‍ യുദ്ധക്കെടുതി അനുഭവിക്കുന്നവര്‍ക്ക് ശൈത്യം നേരിടുന്നതിനുള്ള സഹായമെത്തിക്കാന്‍ ശൈഖ് ഖലീഫയുടെ നിര്‍ദേശം. ജോര്‍ദാന്‍, ലെബനന്‍ എന്നിവിടങ്ങളില്‍ കഴിയുന്ന അഭയാര്‍ഥികള്‍ക്കും ഇസ്രായേല്‍ ആക്രമണത്തിന് ഇരയാക്കപ്പെട്ട പലസ്തീനികള്‍ക്കും സഹായമെത്തിക്കാനാണ് ശൈഖ് ഖലീഫ നിര്‍ദേശം നല്‍കിയത്.
രാജ്യത്തെ മുഴുവന്‍ ജനങ്ങളെയും പങ്കാളികളാക്കിക്കൊണ്ട് ഗവണ്‍മെന്റ് സ്ഥാപനങ്ങളും സംഘടനകളും ദുരിതാശ്വാസ പദ്ധതി വിജയിപ്പിക്കണമെന്ന് ശൈഖ് ഖലീഫ ആവശ്യപ്പെട്ടു. ഈ ശൈത്യകാലത്ത് ജനങ്ങളുടെ കെടുതി ശമിപ്പിക്കേണ്ടത് ധാര്‍മികമായ ഉത്തരവാദിത്വമാണ്. മതപരമായ കടമകൂടിയാണത്. ദാനധര്‍മമെന്നത് ഇമാറാത്തികള്‍ക്ക് പ്രപിതാക്കള്‍ കൈമാറിയ മൂല്യമാണ്-ശൈഖ് ഖലീഫ പ്രസ്താവനയില്‍ പറഞ്ഞു.
പ്രസിഡന്റ് പ്രഖ്യാപിച്ച ദുരിതാശ്വാസ പദ്ധതി വിജയിപ്പിക്കാന്‍ വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ശൈഖ് മുഹമ്മദ് ബിന്‍ റാഷിദ് ആഹ്വാനം ചെയ്തു. എത്രയും വേഗം സഹായങ്ങള്‍ അതത് കേന്ദ്രങ്ങളില്‍ എത്തിക്കാന്‍ ശൈഖ് മുഹമ്മദ് ഉത്തരവിട്ടു.
ശൈത്യം നേരിടുന്നതിനുള്ള പുതപ്പ്, സ്വെറ്ററുകള്‍, ഭക്ഷ്യവസ്തുക്കള്‍ അടക്കമുള്ള സഹായങ്ങള്‍ എത്തിക്കാന്‍ അടിയന്തര നടപടി കൈക്കൊള്ളാനാണ് ശൈഖ് ഖലീഫയുടെ ഉത്തരവ്. മേഖലയില്‍ ശൈത്യം കനത്തുതുടങ്ങവെ, രാജ്യത്ത് നിന്നെത്തുന്ന സഹായങ്ങള്‍ അഭയാര്‍ഥികള്‍ക്ക് വലിയ സഹായമാകും.
from kerala news edited
via IFTTT
