സൂചിക്കുഴയില്‍ ഒട്ടകത്തെ കയറ്റുന്നവര്‍
ഒ. രാധിക
ബില്‍ വേണമെങ്കില്‍ നികുതികൂട്ടും, പൈസകൂടും എന്ന വ്യാപാരിയുടെ ഭീഷണിയില്‍ ഉപഭോക്താവ് സ്വന്തം അവകാശമാണു മറക്കുന്നത്. സത്യത്തില്‍ വ്യാപാരികള്‍ ബില്‍ നല്‍കാത്തതിലൂടെ ഒരേസമയം സര്‍ക്കാറിനെയും ഉപഭോക്താവിനെയും വഞ്ചിക്കുകയാണ്.
വയനാടും ഇടുക്കിയും അറബിക്കടലോരത്താണെന്നും ആ ജില്ലയിലുള്ളവരുടെയെല്ലാം അടിസ്ഥാനതൊഴില്‍ മീന്‍പിടിത്തമാണെന്നും കരുതേണ്ടിവരും ചുരംകയറുന്ന വലകളുടെയും മീന്‍പിടിത്തക്കയറുകളുടെയും കണക്കെടുത്താല്‍. കേരളത്തില്‍ മീന്‍പിടിത്തവലയുടെയും കയറിന്റെയും നികുതി ഉപേക്ഷിച്ചതോടെ, നമ്മുടെ വീട്ടാവശ്യത്തിനുള്ളതടക്കം ഇവിടേക്കെത്തുന്ന ഏത് പ്ലാസ്റ്റിക് കയറും ഇപ്പോള്‍ മീന്‍പിടിത്തത്തിനുള്ളതാണെന്നാണു രേഖകള്‍. അപ്പോള്‍പ്പിന്നെ പരിശോധനയുമില്ല. വെള്ളവും വെയിലുമേറ്റാലും കേടാവാത്തവയാണ് മീന്‍പിടിത്തത്തിനുള്ള വലകളും കയറുകളും. മത്സ്യത്തൊഴിലാളികളുടെ പേരില്‍വന്ന ഇളവിന്റെ നേട്ടമുണ്ടായത് തമിഴ്‌നാട്ടിലെ പ്ലാസ്റ്റിക് കയര്‍ കമ്പനിക്കാണെന്ന് കേരളത്തിലെ വിതരണക്കാര്‍തന്നെ സമ്മതിക്കുന്നു.
കേരളത്തിലിപ്പോള്‍ കണക്കില്‍ 500 രൂപയ്ക്കുമുകളിലുള്ള ചെരിപ്പ് വില്‍ക്കുന്നത് അപൂര്‍വമായെന്നാണു രേഖകള്‍. കാരണം 500 രൂപയ്ക്കു താഴെയുള്ളവയുടെ നികുതി അഞ്ചുശതമാനമാണ്. അതിനുമുകളില്‍ 12.5 ശതമാനമാണ്. അപ്പോള്‍പ്പിന്നെ ഉപഭോക്താവ് എത്ര വിലകൂടിയതു വാങ്ങിയാലും എല്ലാറ്റിനും വ്യാപാരിയുടെ കൈയിലെ കണക്കില്‍ വില 500ല്‍ത്താഴെമാത്രം. അതേസമയം പാവപ്പെട്ടവന്റെയും സമ്പന്നന്റെയും ടി.വി.ക്ക് ഒറ്റനികുതിയേയുള്ളൂ14.5 ശതമാനം. ടി.വി. വില 3000 രൂപയായാലും മൂന്നുലക്ഷമായാലും നികുതി ഒന്നുതന്നെ. വാറന്റിയുള്ള സാധനങ്ങള്‍ക്ക് ഉപഭോക്താവ് ബില്‍ ചോദിച്ചുവാങ്ങും, കൃത്രിമം പറ്റില്ല. മറ്റു സാഹചര്യങ്ങളില്‍ എന്തുകൊണ്ടാണ് ബില്‍ വേണമെന്ന് ഉപഭോക്താക്കള്‍ ശഠിക്കാത്തത്? ബില്‍ വേണമെങ്കില്‍ നികുതികൂട്ടും, പൈസ കൂടും എന്ന വ്യാപാരിയുടെ ഭീഷണിയില്‍ സ്വന്തം അവകാശമാണു മറക്കുന്നത്.
സത്യത്തില്‍ വ്യാപാരികള്‍ ബില്‍ നല്‍കാത്തതിലൂടെ ഒരേസമയം സര്‍ക്കാറിനെയും ഉപഭോക്താവിനെയും വഞ്ചിക്കുകയാണ്. നികുതിയടങ്ങിയ എം.ആര്‍.പി.വിലതന്നെ വാങ്ങിയാണ് നികുതിയൊടുക്കാതെ തട്ടിക്കുന്നത്. അതേസമയം നികുതിയൊടുക്കില്ലെങ്കിലും എം.ആര്‍.പി.യില്‍ നികുതി കുറച്ച് വിലകുറച്ചുകൊടുക്കുന്നുമില്ല. ഉപഭോക്താവ് നല്‍കിയ നികുതിയും ലാഭം. വ്യാപാരിയുടെ കമ്മീഷനും വില്പനനികുതിയും ചേര്‍ന്നതാണല്ലോ എം.ആര്‍.പി. എന്ന പരമാവധിവില.
ചെറുകിടവ്യവസായത്തെ സംരക്ഷിക്കാനാണ് സര്‍ക്കാര്‍ കരകൗശല ഉത്പന്നങ്ങളുടെ നികുതി ഒഴിവാക്കിയത്. അതോടെ ഫര്‍ണിച്ചര്‍ കടകളെല്ലാം കരകൗശലശാലകളായിമാറി. ആവകയില്‍ നികുതിവെട്ടിക്കുന്നു, അത്രതന്നെ. കൈത്തറിക്ക് കൈകൊണ്ട് നിര്‍മിക്കുന്ന സര്‍ക്കാര്‍നികുതി ഒഴിവാക്കിയപ്പോള്‍ കേരളത്തിലേക്കുള്ള തുണിയെല്ലാം ഇപ്പോള്‍ കൈത്തറിയാണ്. അതല്ലാത്തതൊന്നും ചെക്‌പോസ്റ്റ് വഴി വരുന്നില്ലെന്നാണു രേഖ. എവിടെയാണ് ഇത്രയധികം തറികളും കൈവേലക്കാരുമുള്ളതെന്ന കടംകഥയില്‍ ചോദ്യമില്ല. ഇതും നികുതിചോരുംവഴികളില്‍ ഒന്നുമാത്രം.
ടെക്‌സ്‌റ്റൈല്‍ മേഖലയില്‍ ഒരുകോടിക്കുമുകളില്‍ വിറ്റുവരവുള്ളവര്‍ക്ക് വാണിജ്യനികുതി വിറ്റുവരവിന്റെ രണ്ടുശതമാനമാക്കി പ്രഖ്യാപിച്ചിട്ടുള്ളതാണ്. സ്വമേധയാ ഈ മേഖലയിലെ നികുതിയൊന്നും വാണിജ്യവകുപ്പ് ഓഫീസുകളില്‍ ഈ വര്‍ഷം ഇത്രയായിട്ടും എത്തുന്നില്ല. ലക്ഷ്യം ഒപ്പിക്കാന്‍ നികുതിയടപ്പിക്കാന്‍ തന്ത്രം പയറ്റുന്ന ഉദ്യോഗസ്ഥര്‍ക്കുകിട്ടുന്ന മറുപടിയാണു രസം. ഈ വര്‍ഷം ബജറ്റില്‍ തങ്ങള്‍ക്ക് വലിയ ആനുകൂല്യം കിട്ടുമെന്നും അതിന് മുന്‍കാലപ്രാബല്യമുണ്ടാവുമെന്നുള്ള പ്രതീക്ഷയിലാണവര്‍. ഇപ്പോള്‍ റെഡിമെയ്ഡ് വസ്ത്രങ്ങള്‍ക്കു മാത്രമാണു നികുതിയുള്ളത്. കോമ്പൗണ്ട് രീതിമാറ്റി മൊത്തം നികുതി ഒന്നോ രണ്ടോ ശതമാനമാക്കണമെന്നാണൊരാവശ്യം. അതായത് തങ്ങളുടെ വരുമാനത്തില്‍നിന്നുമാറ്റി ഉപഭോക്താവിനുമേല്‍ ചുമത്തണം. കുറ്റം പറയാനാവില്ല; ക്രഷറുകാര്‍ക്കും സ്വര്‍ണക്കാര്‍ക്കും കിട്ടിയെങ്കില്‍ എന്തുകൊണ്ടിവര്‍ക്കുമായിക്കൂടാ! ഇളവിന്റെകാര്യത്തില്‍ കച്ചവടക്കാരെ വിശ്വസിക്കുന്നതാണ് ജീവനക്കാര്‍ക്കും സൗകര്യം. ഉത്തരവുകള്‍ ഓഫീസിലെത്താന്‍ മാസങ്ങളെടുക്കുമെങ്കിലും അപ്പപ്പോള്‍ കാര്യങ്ങളറിയുന്നത് കച്ചവടക്കാരാണ്.
സംസ്ഥാനത്താകെ 60 ലക്ഷത്തിലേറെ വ്യാപാരികളുള്ളതില്‍ 2.4 ലക്ഷം മാത്രമാണ് രജിസ്‌ട്രേഷനുള്ളവര്‍. അതായത്, നികുതിബാധ്യതയുള്ള, പത്തുലക്ഷം രൂപയിലധികം വാര്‍ഷികവിറ്റുവരവുള്ളവര്‍. വാര്‍ഷികവിറ്റുവരവ് 10 ലക്ഷത്തിനു താഴെയായാല്‍ നികുതിയടയ്‌ക്കേണ്ട. ഒരിക്കലും കണക്കില്‍ തങ്ങള്‍ക്ക് അതിലേറെ വരുമാനമുണ്ടാവാതിരിക്കാനാണ് വ്യാപാരി ശ്രമിക്കുക. യഥാര്‍ഥ ബില്‍ ഭൂരിഭാഗം പേരും വെയ്ക്കില്ല. അത് അക്കൗണ്ടന്റിന്റെ കൈവശമായിരിക്കും. സാമ്പത്തികവര്‍ഷത്തിന്റെ അവസാനമാസങ്ങളില്‍ വ്യാപാരമേഖലയില്‍ മാന്ദ്യത്തോടുമാന്ദ്യമാണ്. കാരണം, വിറ്റുവരവ് കൂടാതിരിക്കാന്‍ കണക്കില്‍ കൃത്രിമം കാണിക്കും. ഒരു വ്യാപാരി ഒരൊറ്റ സ്ഥാപനത്തിനുതന്നെ നാലു രജിസ്‌ട്രേഷനെടുക്കുന്നതായും അങ്ങനെ നികുതിവലയില്‍നിന്നു സമര്‍ഥമായി രക്ഷപ്പെടുന്നതായും സി.എ.ജി. റിപ്പോര്‍ട്ടില്‍ ചൂണ്ടിക്കാണിച്ചിട്ടുണ്ട്. സ്‌റ്റോക് കണക്കെടുപ്പിലൂടെ ഉദ്യോഗസ്ഥര്‍ വിചാരിച്ചാല്‍ എളുപ്പത്തില്‍ ഈ തട്ടിപ്പ് കണ്ടുപിടിക്കാനാവും. എന്നാല്‍, അതിന് ഭൂരിഭാഗവും മിനക്കെടില്ല. മാത്രവുമല്ല, സംസ്ഥാനത്ത് കടപരിശോധനകള്‍ പൂര്‍ണമായും നിലച്ചതോടെ ഒരു ക്രമക്കേടും കണ്ടെത്താത്ത സ്ഥിതിയാണ്.
അമേരിക്കയില്‍ നികുതി നല്‍കുകയെന്നത് ദേശീയബഹുമതിയായി പൗരന്മാര്‍ കണക്കാക്കുമ്പോള്‍ നമ്മള്‍ ഇന്ത്യക്കാര്‍ കോര്‍പ്പറേറ്റുകള്‍മുതല്‍ സാധാരണക്കാര്‍വരെ നികുതിയൊഴിവാക്കലാണ് ദേശീയബഹുമതിയായി കാണുന്നത് സുപ്രീംകോടതി മുന്‍ ജസ്റ്റിസ് ജെ.എസ്. പരിപൂര്‍ണന്റേതാണ് ഈ നിരീക്ഷണം.
ഈയടുത്ത് വയനാട് ജില്ലാ ജഡ്ജി മുന്‍കൈയെടുത്ത് വാണിജ്യനികുതിവകുപ്പുമായി ബന്ധപ്പെട്ട് ഒരു അദാലത്ത് നടത്തി. നികുതികുടിശ്ശികയുള്ള വ്യാപാരികള്‍ക്കെല്ലാം നോട്ടീസയച്ചു. തൊട്ടടുത്തദിവസംതന്നെ പണവുമായി അക്കൗണ്ടന്റുമാര്‍ കുതിച്ചെത്തി. കാരണം, കൃത്യസമയത്ത് വ്യാപാരികളില്‍നിന്ന് നികുതിയും ഉദ്യോഗസ്ഥര്‍ക്കുള്ള മാമൂലും വാങ്ങി സ്വന്തം പോക്കറ്റില്‍ സൂക്ഷിക്കുകയായിരുന്നു ഇവര്‍. പിടിക്കപ്പെടുമെന്നായപ്പോഴാണ് സത്യം പുറത്തായത്.
ശരാശരി കച്ചവടക്കാരന് ഒരിക്കലും മനസ്സിലാവുന്നതല്ല, തടിച്ച ഇംഗ്ലീഷ് നിയമപുസ്തകം. ആക്ടും നോട്ടീസും മലയാളത്തിലല്ലാത്തിടത്തോളം അവരെ സംബന്ധിച്ചിത് ഭയപ്പെടുത്താനുള്ള ഉപകരണം മാത്രം. ഉദ്യോഗസ്ഥരതു ചെയ്യുന്നുമുണ്ട്. യഥാര്‍ഥബില്ലടക്കം എല്ലാം വ്യാപാരി അക്കൗണ്ടന്റിനെ ഏല്പിക്കുന്നു. അക്കൗണ്ടന്റാണ് നിയമം വ്യാഖ്യാനിക്കുന്നത്. പറ്റിക്കപ്പെട്ടാലും കച്ചവടക്കാരന് ഒന്നും ചെയ്യാനാവില്ല. ഇപ്പോള്‍ രജിസ്‌ട്രേഷനുള്ള വ്യാപാരിക്കു നല്‍കുന്ന രഹസ്യ പാസ്‌വേഡടക്കം കൈകാര്യംചെയ്യുന്നത് വ്യക്തിപരമായല്ല. ഉപഭോക്താവില്‍നിന്ന് സര്‍ക്കാറിന് നികുതിപിരിച്ചുകൊടുക്കുകയെന്ന വലിയ സേവനംചെയ്യുന്ന കച്ചവടക്കാരന് പലപ്പോഴും ഇതൊരു പീഡനമായാണനുഭവപ്പെടുക. നികുതിനിര്‍ണയം നടത്തി കച്ചവടക്കാരന് സ്വന്തമായടയ്ക്കുന്നതിന് സര്‍ക്കാറോ ജീവനക്കാരോ ഒരു പ്രോത്സാഹനവും നല്‍കുന്നില്ല. ടാര്‍ജറ്റും നികുതിയും തനിക്കുള്ള കൈക്കൂലിയും മാത്രം ഉദ്യോഗസ്ഥന്റെ ലക്ഷ്യമാവുമ്പോള്‍ പലപ്പോഴും കച്ചവടക്കാരന് എല്ലാം നഷ്ടമാവുന്നു, അല്ലെങ്കില്‍ കോടതികയറിയിറങ്ങേണ്ടിവരുന്നു.
തമിഴ്‌നാട്ടില്‍ എല്ലാ നോട്ടീസും തമിഴിലാണു നല്‍കുന്നത്. അതുകൊണ്ടുതന്നെ കച്ചവടക്കാരനോ െ്രെഡവര്‍ക്കോ തന്റെഭാഗം വ്യക്തമാക്കാനാവും. കോമ്പൗണ്ട് നികുതി വന്‍കിടക്കാര്‍ക്ക് ലാഭവും ചെറുകിടക്കാര്‍ക്ക് വന്‍നഷ്ടവുമുണ്ടാക്കുന്നുവെന്നു വിമര്‍ശമുണ്ട്. ഈ നികുതി സ്വീകരിച്ച മേഖലകളില്‍ ചെറുമത്സ്യങ്ങളെ വിഴുങ്ങി വന്‍കിടക്കാര്‍ കൊഴുക്കുന്ന പ്രതിഭാസവും കാണാനാകും. ടേണോവര്‍ നികുതി കച്ചവടക്കാര്‍ക്കുമേല്‍ മള്‍ട്ടിപ്പിള്‍ നികുതിയും അടിച്ചേല്‍പിക്കുന്നു. നികുതിനയത്തിലെ നികുതിഘടനയിലുമുണ്ട് ഒട്ടേറെ പോരായ്മകളും പിഴവുകളും.
രജിസ്‌ട്രേഷന്‍ നിയമങ്ങള്‍ ലളിതമാക്കണമെന്നാവശ്യപ്പെടുന്നു വ്യാപാരി വ്യവസായി ഏകോപനസമിതി പ്രസിഡന്റ് ടി.നസിറുദ്ദീന്‍. സര്‍ക്കാറും ഉദ്യോഗസ്ഥരും തങ്ങളെ കൊള്ളക്കാരെപ്പോലെ കാണുന്നത് അവസാനിപ്പിക്കണം. കടകയറിപ്പരിശോധന ഒരുതരത്തിലും അംഗീകരിക്കാനാവില്ല. വ്യാപാരമേഖലയില്‍ സര്‍ക്കാര്‍ ഒരാനുകൂല്യവും തന്നിട്ടില്ല. ഉദ്യോഗസ്ഥര്‍ പീഡിപ്പിച്ച് തങ്ങളെ കൈക്കൂലി കൊടുക്കുന്നവരാക്കുകയാണ്. ഇനി പുതുതായി നികുതിയേര്‍പ്പെടുത്താനാവില്ല. ഏര്‍പ്പെടുത്തിയാല്‍ വ്യാപാരമേഖല പ്രതിസന്ധിയിലാവും, കച്ചവടം മുരടിക്കും. സര്‍ക്കാര്‍ വരുമാനത്തിന് മറ്റു മേഖലകള്‍ കണ്ടെത്തട്ടെ നസിറുദ്ദീന്‍ പറയുന്നു.
മാര്‍ബിളില്‍ തിളങ്ങുന്ന മയ്യഴി,
കോഴിതിന്ന് കൊഴുക്കുന്ന ജനം
ദുര്യോധനന്‍ കണ്ട പാണ്ഡവകൊട്ടാരം ഇന്ദ്രപ്രസ്ഥംപോലെ പളപള തിളങ്ങണം മയ്യഴിയിലെ മണ്ണും തെരുവും വീടും, എന്തിന്, വീടിന്റെ മേല്‍ക്കൂരവരെ. മാഹിക്കാരാവട്ടെ മൂന്നുനേരം കോഴിമാത്രം കഴിച്ച് ജീവിക്കുന്നവരുമാവണം അവിടേക്കുള്ള സാധനങ്ങളുടെ ഒഴുക്കിന്റെ കണക്കില്‍. ഒരുദിവസം എട്ടുലക്ഷം രൂപയുടെ മാര്‍ബിളാണ് മയ്യഴിയിലെ ആവശ്യത്തിനെന്നപേരില്‍ കേരളാതിര്‍ത്തി കടക്കുന്നത്. സാനിറ്ററി, പെയിന്റ് എന്നീ വിഭാഗത്തില്‍ മൂന്നോ നാലോ ലക്ഷം രൂപയുടെ സാധനങ്ങളുമെത്തുന്നു.
ഗോപാലപുരംവഴി ശരാശരി 35,000 കിലോ കോഴിയാണ് ഒരുദിവസമെത്തുന്നത്. ഇതിന് കേരളത്തിന്റെ കണക്കില്‍ 48,200 രൂപ ഒരുദിവസം നികുതിയായി വരേണ്ടതാണ്. കോഴിയിറച്ചിയായി ഫ്രോസണ്‍ ശരാശരി ദിവസം അഞ്ചുലക്ഷത്തിന്റെ ലോഡ് എത്തുന്നുവെന്നാണ് ചെക്ക് പോസ്റ്റിലെ കണക്ക്. 72,500 രൂപ നികുതിയായിക്കിട്ടണം. ഒമ്പത് ചതുരശ്രകിലോമീറ്ററാണ് മയ്യഴിയുടെ ആകെ വിസ്തൃതി. ആകെ ജനസംഖ്യ 42,000വും. കേരളത്തില്‍ 14.5 ശതമാനം നികുതിയുള്ളപ്പോള്‍ പുതുച്ചേരിയുടെ ഭാഗമായ മയ്യഴിയില്‍ നികുതിവേണ്ട. നിത്യോപയോഗസാധനങ്ങളടക്കം സംസ്ഥാനത്ത് നികുതിയുള്ള എല്ലാം മയ്യഴിയിലേക്കുള്ള കണക്കിലാണ് ഈ മേഖലയിലേക്കു വരുന്നത്. ചെക്‌പോസ്റ്റുകളില്‍ പ്രവേശനപാസ് നല്‍കുകമാത്രമാണു നടക്കുന്നത്.
കുഞ്ഞിപ്പിള്ളി ചെക്‌പോസ്റ്റില്‍ രേഖകള്‍ സമര്‍പ്പിക്കുന്നതോടെ മയ്യഴിയിലേക്കുള്ള മാര്‍ബിള്‍, ഗ്രാനൈറ്റ് യാത്ര തുടങ്ങും. ആ വിവരം മയ്യഴിയിലെ വില്പനനികുതി ഇന്റലിജന്‍സ് സ്‌ക്വാഡിനു ലഭിക്കുന്നതോടെ അവര്‍ കാത്തുനില്പാരംഭിക്കും. കെട്ടിടങ്ങള്‍ക്കു മുകളില്‍ ഒളിച്ചും പാത്തും നില്‍ക്കും. ചിലപ്പോള്‍ ഒരുരാത്രിമുഴുവന്‍ മഴയും മഞ്ഞുമൊന്നും കൂസാതെ നില്പുതുടരേണ്ടിവരും. തൊട്ടുതൊട്ടില്ലാക്കളിയാണു പിന്നെ. ഒറ്റച്ചുവടുകൊണ്ട് കേരളത്തില്‍നിന്നു മയ്യഴിയിലെത്തും. പിന്നെ രക്ഷയില്ല. വലിയ വണ്ടിയില്‍നിന്നു മാറ്റി ചെറുവണ്ടികളിലാക്കി ഇടവഴികളിലൂടെ കേരളത്തിലേക്കു കടത്തും. തലശ്ശേരി, കണ്ണൂര്‍, വടകര എന്നിവിടങ്ങളിലേക്ക് ചെറുവഴികളിലൂടെ ഒഴുകും. രണ്ടു സ്‌ക്വാഡാണു മയ്യഴിയിലുള്ളത്. ഒരുസംഘത്തിന്റെ ജോലി ഉച്ചയ്ക്കു തുടങ്ങി പിറ്റേന്നുച്ചയ്ക്കവസാനിക്കും. രാത്രി രണ്ടിനും മൂന്നിനുമിടയിലാണ് കോഴിക്കടത്ത്.
കണ്ണൂരിലെ രാഷ്ടീയബന്ധമുള്ള ഗുണ്ടാസംഘങ്ങളുടെ കാവലോടെയാണ് കടത്ത്. വടക്കന്‍ മലബാറിലെ രാഷ്ട്രീയനേതാവിന്റെ കൊലപാതകത്തിലെ പ്രതികള്‍ കോഴിക്കടത്ത് എസ്‌കോര്‍ട്ടുകാരുമായിരുന്നു. കോഴിവില കൂടിയതോടെ ഇതിലെ ലാഭം കുറഞ്ഞിട്ടുണ്ട്. ഇപ്പോള്‍ മാര്‍ബിള്‍ കടത്തുന്നതിലാണ് സംഘങ്ങളുടെ ശ്രദ്ധ കൂടുതല്‍. കേരളത്തില്‍ പിടിച്ചാല്‍ തറവിലയുടെ 72.5 ശതമാനവും രജിസ്‌ട്രേഷന്‍ ഫീസായി 2500 രൂപയും ഒടുക്കേണ്ടിവരും. പിടിക്കപ്പെടാതിരിക്കാന്‍ സംഘം ഏതുവഴിയും നോക്കും. സ്‌ക്വാഡിനെക്കുറിച്ചുള്ള വിവരം മൊബൈല്‍വഴി ഉടന്‍ കൈമാറാന്‍ ധാരാളം എസ്‌കോര്‍ട്ടുണ്ട്. ചിലപ്പോള്‍ ഒരുവണ്ടിക്കുപിന്നാലെ സ്‌ക്വാഡിനെ ഓടിച്ച് ആ മറവില്‍ മറ്റുവണ്ടികള്‍ കടത്തും. വലിയ റിസ്‌കുണ്ട് ഈ കടത്തിന്.
കടയ്ക്കുള്ളിലെത്തിയാല്‍ എല്ലാം ഭദ്രം. അവിടെ ആരും കണക്കു പരിശോധിക്കാനെത്തില്ല. അതിനൊട്ടനുവദിക്കുകയുമില്ല. പാലക്കാട്ടെ ഒളവപ്പാറ ചെക്‌പോസ്റ്റില്‍ ഉദ്യോഗസ്ഥരിരിക്കുന്നത് റോഡിനു മുകളില്‍. താഴെ റോഡുവഴി നിര്‍ബാധം സാധനങ്ങളുമായി വണ്ടിപോകും. ഒന്നും ചെയ്യാനാവില്ല. തൃശ്ശൂരില്‍ കോഴിക്കടത്ത് തടയാന്‍ ശ്രമിച്ച ഉദ്യോഗസ്ഥന് ഇന്നും സ്വന്തം ജില്ലയിലെത്തുമ്പോള്‍ ഗണ്‍മാന്റെ സംരക്ഷണമുണ്ട്. അത്രമാത്രം ശക്തമാണ് സംസ്ഥാനത്ത് ലോബികള്‍.
തലസ്ഥാനത്തിരുന്ന് പ്രവര്‍ത്തനംകൊണ്ട് 'പൊറുതിമുട്ടിച്ച' ഒരുദ്യോഗസ്ഥനെ വ്യാപാരികള്‍ കൊല്ലത്തേക്കു മാറ്റിച്ചു. സര്‍ക്കാറിലേക്കെത്തേണ്ട നികുതി കണ്ടെത്തുന്നതിലും നോട്ടീസുകൊടുക്കുന്നതിലും ജാഗ്രതയുള്ള അദ്ദേഹം അവിടെയെത്തിയപ്പോള്‍ കശുവണ്ടിവ്യവസായികള്‍ക്കായി പരാതി. എങ്കില്‍, ഇവര്‍വിചാരിച്ച് തന്നെ തിരിച്ചു നാട്ടിലേക്കു സ്ഥലംമാറ്റിത്തരട്ടെയെന്നുകരുതി അദ്ദേഹം അത് ഊര്‍ജിതമാക്കി. അപ്പോഴാണ് അഴിമതിക്കാരനല്ലാത്ത ആ ഉദ്യോഗസ്ഥന് ഞെട്ടലോടെ അറിയുന്നത്, ഒരുവിഭാഗം അതൊരു നല്ല വിളവെടുപ്പുള്ള കൃഷിയാക്കിയത്. അദ്ദേഹം നോട്ടീസ് കൊടുക്കുന്നു, അടുത്തദിവസംതന്നെ ഇടനിലക്കാരിടപെട്ട് അതിന് സ്‌റ്റേ വാങ്ങിക്കൊടുക്കും. അതോടെ സ്ഥലംമാറ്റപ്രതീക്ഷയും പോയി, സര്‍ക്കാറിന്റെ വരുമാനവും പോയി എന്ന സ്ഥിതിയിലാണദ്ദേഹം.
എന്നാല്‍, ആളോഹരി ഉപഭോക്തൃസൂചികയുള്ള കേരളത്തിന് വില്പനനികുതിവരുമാനം പ്രധാന ആശ്രയംതന്നെയാണ്. ഇനി സേവനങ്ങളും നികുതിപരിധിയില്‍ വരുന്ന ചരക്കുസേവനനികുതി നടപ്പാക്കാനൊരുങ്ങുമ്പോള്‍ പഴുതുകളടച്ചുള്ള പിരിവിലൂടെമാത്രമേ സര്‍ക്കാറിന് പിടിച്ചുനില്‍ക്കാനാവൂ.
from kerala news edited
via IFTTT
