Story Dated: Wednesday, February 18, 2015 01:58
മെല്‍ബണ്‍: ഇന്ത്യന്‍ ക്രിക്കറ്റിലെ ഇതിഹാസ താരം സച്ചിന്‍ തെണ്ടുല്‍ക്കര്‍ക്കൊപ്പം സിഡ്‌നിയില്‍ അത്താഴ വിരുന്നിന് അവസരം. സിഡ്‌നിയിലെ പ്രമുഖ ഹോട്ടലാണ് ഈ ഓഫറുമായി മുന്നോട്ടുവന്നത്. എന്നാല്‍ വിരുന്ന് സൗജന്യമല്ല. 1,500 മുതല്‍ 3,000 ഓസ്‌ട്രേലിയന്‍ ഡോളര്‍ വരെ മുടക്കാന്‍ തയ്യാറുള്ളവര്‍ക്കാണ് ഈ അസുലഭ അവസരം ലഭിക്കുക. ഇന്ത്യ- ദക്ഷിണാഫ്രിക്ക മത്സരത്തിനു ശേഷം ഈ മാസം 26നായിരിക്കും വി.ഐ.പി ഡിന്നര്‍ നടക്കുന്നത്. 60 പേര്‍ക്ക് മാത്രമായിരിക്കും ചടങ്ങില്‍ പ്രവേശനം ലഭിക്കുക.
ഇന്ത്യ- ദക്ഷിണാഫ്രിക്ക മത്സരം കാണാന്‍ സച്ചിന്‍ ഓസ്‌ട്രേലിയയില്‍ എത്തുന്നുണ്ട്. ഈ അവസരം മുതലാക്കിയാണ് ഹോട്ടല്‍ അത്താഴ വിരുന്ന് സംഘടിപ്പിക്കുന്നത്. എട്ടു പേര്‍ക്കു വീതം ഇരിക്കാവുന്ന മേശകളാണ് വിരുന്നിനായി ഒരുക്കുന്നത്. അതിഥികളുടെ ഇഷ്ടമനുസരിച്ചായിരിക്കും വിഭവങ്ങള്‍. മുന്തിയ ഇനം മദ്യവും വൈനും ഭക്ഷണത്തിനൊപ്പം ലഭിക്കും.
പന്ത്രണ്ടു പേരെ ഉള്‍ക്കൊള്ളുന്ന മേശയിലായിരിക്കും സച്ചിന്‍ വിരുന്നിനിരിക്കുക. ഈ മേശയില്‍ നിന്നും വിരുന്നില്‍ പങ്കുചേരണമെങ്കില്‍ 3,000 ഓസ്‌ട്രേലിയന്‍ ഡോളര്‍ നല്‍കണം. അരമണിക്കൂര്‍ നീളുന്ന വിരുന്നിനിടെ സച്ചിനുമായി ഇടപഴകുന്നതിനും ചോദ്യങ്ങള്‍ ഉന്നയിക്കാനും അതിഥികള്‍ക്ക് അവസരം ലഭിക്കും.
വിരുന്നിനിടെ സച്ചിന്‍ ഉപയോഗിച്ചിരുന്ന ചില സാധനങ്ങളുടെ ലേലം സംബന്ധിച്ച കരാറിലും ഒപ്പുവയ്ക്കും. സച്ചിന്റെ ഒപ്പുപതിച്ച ആത്മകഥയും അതിഥികള്‍ക്ക് ലഭിക്കും. വിരുന്നില്‍ നിന്ന് ലഭിക്കുന്ന പണം സച്ചിന്‍ ഫൗണ്ടേഷന്റെ പ്രവര്‍ത്തനത്തിന് ഉപയോഗിക്കും. ലോകകപ്പ് ഫൈനല്‍ നടക്കുന്ന ദിവസം മെല്‍ബണിലും ഇത്തരമൊരു വിരുന്ന് സംഘടിപ്പിക്കാന്‍ സംഘാടകര്‍ ആലോചിക്കുന്നുണ്ട്.
from kerala news edited
via IFTTT
