വിയന്ന: ഓസ്ട്രിയയിലെ ഇന്ത്യന്‍ കാത്തോലിക് കമ്മ്യൂണിറ്റിയുടെ കീഴിലുള്ള കൈരളി നികേതന്‍ സ്‌കൂളില്‍ കുട്ടികളും മാതാപിതാക്കളും അധ്യാപകരും ചേര്‍ന്ന് സംഘടിപ്പിച്ച ക്രിസ്മസ് ആഘോഷം ശ്രദ്ധേയമായി. ഫാ. തോമസ് താണ്ടപ്പിള്ളിയുടെ നേതൃത്വത്തില്‍ നടത്തിയ പ്രാരംഭപ്രാര്‍ഥന നടത്തി.കുട്ടികള്‍ അവതരിപ്പിച്ച വിവിധ കലാപരിപാടികളോടെ കൈരളി ക്രിസ്മസ് ഫെസ്റ്റ് ആരംഭിച്ചു. ചടങ്ങില്‍ ഐ സി സി വിയന്നയുടെ ചാപ്ലൈന്‍ ഫാ. തോമസ് താണ്ടപ്പിള്ളി അധ്യക്ഷത വഹിച്ചു. ആഫ്രോ ഏഷ്യന്‍ ഇന്‍സ്റ്റിറ്റിയൂട്ട് ജനറല്‍ സെക്രട്ടറി അലക്‌സാണ്ടര്‍ ക്രജിക്, ഐ സി സി ജനറല്‍ കണ്‍വീനര്‍ തോമസ് പടിഞ്ഞാറെക്കാലയില്‍ തുടങ്ങിയവര്‍ സന്നിഹിതരായിരുന്നു. സ്‌കൂള്‍ പ്രസിഡന്റും ആഘോഷ പരിപാടികളുടെ കോര്‍ഡിനേറ്ററുമായ ജോഷിമോന്‍ എറണാകേരില്‍ സ്വാഗതം പറഞ്ഞു.
റിയ മാളിയംപുരയ്ക്കല്‍, അരുണ്‍ പള്ളിക്കുന്നേല്‍, ആന്‍ മരിയ നിലവൂര്‍, ഹിമ വെങ്ങാലില്‍, ജസ്റ്റിന്‍ സ്രാമ്പിക്കല്‍, നവീന പാലാട്ടി എന്നീ കുട്ടികളും സംഘവും ക്രിസ്മസ് ഗാനലാപനം നടത്തി. തുടര്‍ന്ന് സ്‌കൂളിലെ നൃത്ത അദ്ധ്യാപികയായ കുമുദിനി കൈന്തല്‍ പഠിപ്പിച്ച ക്ലാസിക്കല്‍ ഡാന്‍സിന്റെ അവതരണം ഏറെ ഹൃദ്യമായി. ഐ സി സി വിയന്നയുടെ ചാപ്ലൈന്‍ ക്രിസ്മസ് സന്ദേശം നല്‍കി. ആഫ്രോ ഏഷ്യന്‍ ഇന്‍സ്റ്റിറ്റിയൂട്ട് ജനറല്‍ സെക്രട്ടറി, ഐ സി സി ജനറല്‍ കണ്‍വീനര്‍ എന്നിവര്‍ കുട്ടികള്‍ക്ക് ആശംസകള്‍ നേര്‍ന്ന് സംസാരിച്ചു. കുട്ടികളുടെ ഭാഗത്തുനിന്നും ഷെറിന്‍ ചെരിയന്‍ക്കാലായില്‍ സംസാരിച്ചു.
കൈനിറയെ സമ്മാനങ്ങളുമായി ക്രിസ്മസ് പാപ്പയുടെ ആഗമനം കുട്ടികള്‍ക്കും മുതിര്‍ന്നവര്‍ക്കും ഏറെ കൗതുകം പകര്‍ന്നു. സ്‌കൂളില്‍ പഠിപ്പിക്കുന്ന അദ്ധ്യാപകര്‍ക്കുള്ള പാരിതോഷികം ഫാ. തോമസ് താണ്ടപ്പള്ളി നിര്‍വ്വഹിച്ചു. സ്‌കൂള്‍ സെക്രട്ടറി ജോമി സ്രാമ്പിക്കല്‍ പരിപാടിയുടെ പങ്കെടുത്ത എല്ലാവര്‍ക്കും, കുട്ടികള്‍ക്കും, വിവിധ ഘട്ടങ്ങളില്‍ സ്‌കൂളിനെ സഹായിക്കുന്ന വ്യക്തികള്‍ക്കും നന്ദി പറഞ്ഞു.
മാതാപിതാക്കള്‍ തയ്യാറാക്കി കൊണ്ടുവന്ന വിഭവങ്ങള്‍ ഉള്‍പ്പെടുത്തിയ സ്‌നേഹവിരുന്നോടെ ആഘോഷങ്ങള്‍ക്ക് സമാപനമായി. പി ടി എ കമ്മിറ്റി അംഗങ്ങളും, മാതാപിതാക്കളും ക്രിസ്മസ് ആഘോഷത്തിനും ക്രമീകരണങ്ങള്‍ക്കും നേതൃത്വം നല്‍കി. ഈ വര്‍ഷത്തെ ക്രിസ്മസ് ആഘോഷത്തോടെ സ്‌കൂളിലെ ആദ്യ സെമസ്റ്റര്‍ അവസാനിച്ചു. അടുത്ത സെമസ്റ്റര്‍ 2015 ജനുവരി 10ന് ആരംഭിക്കും.
വാര്‍ത്ത അയച്ചത്: ജോബി ആന്റണി
from kerala news edited
via IFTTT
