Story Dated: Tuesday, December 23, 2014 02:52
തൃശൂര്‍ : ശാസ്‌ത്രീയമായി റോഡുപണി പൂര്‍ത്തിയാക്കാതേയും കരാറില്‍ പറയുന്ന യാതൊരു സുരക്ഷയും ഉറപ്പാക്കാതേയും മൂന്നുകൊല്ലമായി ടോള്‍ പിരിവ്‌ തുടരുന്ന പാലിയേക്കര ടോള്‍ പ്ലാസയില്‍ നിയമം നോക്കുകുത്തിയാകുന്നതായി പരാതി. ഇന്ത്യ ടോള്‍ ആക്‌ടുപ്രകാരം മൂന്ന്‌ വാഹനങ്ങളേക്കാള്‍ കൂടുതല്‍ ഒരു നിരയില്‍ വന്നാല്‍ ടോള്‍ പിരിവ്‌ നിര്‍ത്തിവച്ച്‌ ഗതാഗത തടസം സൃഷ്‌ടിക്കാതെ വാഹനങ്ങള്‍ കടത്തി വിടണം എന്നാണ്‌ നിയമം. എന്നാല്‍ മിക്ക ദിവസവും പ്രത്യേകിച്ച്‌ വൈകുന്നേരങ്ങളില്‍ വാഹനങ്ങളുടെ വലിയ നിരയാണ്‌ ഇവിടെ ഉണ്ടാകുന്നത്‌. അതുണ്ടാക്കുന്നത്‌ വലിയ ഗതാഗത തടസമാണെങ്കിലും നിയമമനുശാസിക്കുന്നതനുസരിച്ച്‌ പിരിവ്‌ നിര്‍ത്തി വാഹനങ്ങള്‍ കടത്തിവിടാന്‍ ടോള്‍പ്ലാസ അധികൃതര്‍ തയ്യാറാകുന്നില്ല. ടോള്‍ പ്ലാസക്കെതിരായ സമരത്തേയും മാവോയിസ്‌റ്റ് ഭീഷണിയെന്ന വാര്‍ത്തയേയും തുടര്‍ന്ന്‌ നിരവധി പോലീസുകാര്‍ ഇവിടെ കാവലുണ്ട്‌. നിയമലംഘനത്തിനാണ്‌ അവര്‍ കാവല്‍ നില്‍ക്കുന്നതെന്ന്‌ നാട്ടുകാര്‍ പറയുന്നു.
ചട്ടങ്ങളനുസരിച്ചും ശാസ്‌ത്രീയമായും പാത നിര്‍മിക്കാത്തതാണ്‌ ഗതാഗതകുരുക്ക്‌ വര്‍ദ്ധിക്കാന്‍ അടിസ്‌ഥാനകാരണമെന്നും ചൂണ്ടികാട്ടപ്പെടുന്നു. വേണ്ടത്ര ഓവര്‍ ബ്രിഡ്‌ജുകളോ ബസ്‌ബേകളോ കാല്‍നടക്കാര്‍ക്ക്‌ റോഡു മുറിച്ചുകടക്കാനുള്ള സൗകര്യങ്ങളോ പലയിടത്തുമില്ല. ഏറെ തിരക്കുള്ള അങ്കമാലിയില്‍പോലും ഓവര്‍ ബ്രിഡ്‌ജില്ല. അതിനാല്‍തന്നെ വലിയ വാഹനകുരുക്കാണ്‌ അവിടെയുണ്ടാകുന്നത്‌. നേരത്തെ നിലനിന്നിരുന്ന പാത വീതികൂട്ടുകമാത്രം ചെയ്‌ത് വന്‍തോതില്‍ ടോള്‍ പിരിക്കുന്ന കമ്പനി തിരിച്ച്‌ യാത്രക്കാരോട്‌ മിനിമം മര്യാദപോലും കാണിക്കുന്നില്ല എന്നും ചൂണ്ടികാട്ടപ്പെടുന്നു.
from kerala news edited
via IFTTT
