Story Dated: Monday, January 19, 2015 02:42
ന്യുഡല്‍ഹി: ഡല്‍ഹി നിയമസഭാ തെരഞ്ഞെടുപ്പില്‍ രാഷ്ട്രീയ സ്വാധീനമുറപ്പിക്കാന്‍ ശ്രമിക്കുന്ന കോണ്‍ഗ്രസ് ആം ആദ്മി പാര്‍ട്ടി നേതാവ് അരവിന്ദ് കെജ്‌രിവാളിന്റെ നിലപാട് മാറ്റം വ്യക്തമാക്കുന്ന ലഘുലേഖ പുറത്തുവിട്ടു. കെജ്‌രിവാള്‍ മുഖ്യമന്ത്രിയായിരുന്ന 49 ദിവസം നടത്തിയ യു ടേണുകളാണ് കോണ്‍ഗ്രസ് പുറത്തുവിടുന്നത്. കെജ്‌രിവാള്‍ നേരത്തെ നല്‍കിയ 16 വാഗ്ദാനങ്ങള്‍ മുഖ്യമന്ത്രിയിരിക്കേ പൂര്‍ത്തികരിച്ചിട്ടില്ലെന്ന് ബുക്ക്‌ലെറ്റില്‍ പറയുന്നു. കോണ്‍ഗ്രസിന്റെ തെരഞ്ഞെടുപ്പ് പ്രചാരണ ചുമതലക്കാരന്‍ അജയ് മാക്കനാണ് ലഘുലേഖ പുറത്തുവിട്ടത്.
കെജ്‌രിവാള്‍ മുഖ്യമന്ത്രിയായി ചുമതലയേല്‍ക്കും മുന്‍പ് നല്‍കിയ സത്യവാങ്മൂലവും ശേഷം നല്‍കിയ കള്ള വാഗ്ദാനങ്ങളുടെ പട്ടികയും കോണ്‍ഗ്രസ് പുറത്തുവിട്ടു. റെഡ് ബീക്കണ്‍ കാര്‍ ഉപയോഗിക്കില്ലെന്നായിരുന്നു കെജ്‌രിവാളിന്റെ വാഗ്ദാനം. അദ്ദേഹം ഉപയോഗിച്ചില്ലെങ്കിലും അദ്ദേഹത്തെ അടുപ്പക്കാരെല്ലാം റെഡ് ബീക്കന്‍ ലൈറ്റ് ഘടിപ്പിച്ച കാര്‍ ഉപയോഗിച്ചു. സുരക്ഷാ ഉദ്യോഗസ്ഥരുടെ ആവശ്യമില്ലെന്നായിരുന്നു മറ്റൊരു വാഗ്ദാനം. എന്നാല്‍ ഭീഷണി ഉയര്‍ത്തിക്കാട്ടി സുരക്ഷ വര്‍ധിപ്പിച്ചു. മുഖ്യമന്ത്രിയുടെ ഔദ്യോഗിക ബംഗ്ലാവ് ഉപയോഗിക്കില്ലെന്നു പറഞ്ഞ കെജ്‌രിവാള്‍ എട്ടു മുറികളുള്ള ആഡംബര വസതി ഉപയോഗിച്ചുവെന്നും കോണ്‍ഗ്രസ് ചൂണ്ടിക്കാട്ടി.
കെജ്‌രിവാള്‍ ഞാറയാഴ്ച നടത്തിയ തെരഞ്ഞെടുപ്പ് റാലിക്കെതിരെ പരാതി നല്‍കുമെന്നും കോണ്‍ഗ്രസ് വ്യക്തമാക്കി. കോണ്‍ഗ്രസില്‍ നിന്നും ബി.ജെ.പിയില്‍ നിന്നും പണം വാങ്ങിക്കാനും വോട്ട് തന്റെ പാര്‍ട്ടിക്കു നല്‍കണമെന്നുമാണ് കെജ്‌രിവാള്‍ പറഞ്ഞത്. കെജ്‌രിവാളിന്റെ പ്രസ്താവന നിരുത്തരവാദപരമായിപോയി എന്നു മാത്രമല്ല, ഡല്‍ഹിയിലെ ജനങ്ങളെ അപമാനിക്കുന്നതാണെന്നും മാക്കന്‍ പറഞ്ഞു.
from kerala news edited
via IFTTT
