സുസ്ലോണില്‍ സാങ്വി 23 ശതമാനം ഓഹരി വാങ്ങി
ന്യൂഡല്‍ഹി: നഷ്ടത്തില്‍ പ്രവര്‍ത്തിക്കുന്ന സുസ്ലോണ്‍ എനര്‍ജിയില്‍ പ്രമുഖ വ്യവസായി ദിലീപ് സാങ്വിയുടെ കുടുംബം 13 ശതമാനം ഓഹരി സ്വന്തമാക്കി. 1,800 കോടി രൂപയാണ് ഇതിനായി നിക്ഷേപിക്കുന്നത്. മുന്‍ഗണനാ അടിസ്ഥാനത്തിലാണ് ഓഹരികള്‍ സ്വന്തമാക്കിയിരിക്കുന്നത്. പ്രമുഖ മരുന്നു കമ്പനിയായ സണ്‍ ഫാര്‍മയുടെ മേധാവിയാണ് ദിലീപ്. വ്യക്തിപരമായ നിലയിലാണ് നിക്ഷേപം നടത്തുന്നതെന്ന് ദിലീപ് സാങ്വി വ്യക്തമാക്കി.26 ശതമാനം ഓഹരികള്‍ക്കായി ഓപ്പണ്‍ ഓഫറും കമ്പനി പ്രഖ്യാപിച്ചിട്ടുണ്ട്. ഓഹരിയൊന്നിന് 18 രൂപ നിരക്കില്‍ 2,837 കോടിയാണ് ഇതിനായി ചെലവഴിക്കുക.
തുള്‍സി തന്തിയുടെ നേതൃത്വത്തിലുള്ള കാറ്റാടി യന്ത്ര നിര്‍മാണ കമ്പനിയാണ് സുസ്ലോണ്‍. 1,075.25 കോടി രൂപയുടെ നഷ്ടത്തിലാണ് കമ്പനി. ഈ സാമ്പത്തിക വര്‍ഷവും ഉയര്‍ന്ന നഷ്ടം ഉണ്ടാക്കിയിട്ടുണ്ട്. കമ്പനിയില്‍ തുള്‍സി തന്തിക്കും കുടുംബത്തിനും കൂടി 30.94 ശതമാനം ഓഹരികളാണ് നിലവിലുള്ളത്. ഓഹരി കൈമാറ്റം പൂര്‍ത്തിയാകുന്നതോടെ ഇത് 24 ശതമാനമായി കുറയും. എങ്കിലും അദ്ദേഹത്തിന് തന്നെയാവും കമ്പനിയുടെ മാനേജ്‌മെന്റ് നിയന്ത്രണം.
ഓഹരി വില്പന സംബന്ധിച്ച വാര്‍ത്ത പുറത്തുവന്നതോടെ സുസ്ലോണിന്റെ ഓഹരി വില തിങ്കളാഴ്ച 20 ശതമാനം ഉയര്‍ന്ന് 22.95 രൂപയിലെത്തി.
from kerala news edited
via IFTTT
