Story Dated: Tuesday, December 16, 2014 07:26
നെയ്യാറ്റിന്‍കര: നെയ്യാറ്റിന്‍കര ഡി.വൈ.എസ്‌.പി. ഓഫീസ്‌ അടക്കം സ്‌ഥിതി ചെയ്യുന്ന മിനി ഓഫീസ്‌ കോംപ്ലക്‌സില്‍ മദ്യപാനം പൊടിപൊടിക്കുന്നതായി ആക്ഷേപം. കൈക്കൂലിയും കോഴയും നടമാടുന്നുവെന്ന്‌ ആക്ഷേപമുള്ള റീജിയണല്‍ ട്രാന്‍സ്‌പോര്‍ട്ട്‌ ഓഫീസ്‌, താലൂക്ക്‌ റേഷനിംഗ്‌ ഓഫീസ്‌ എന്നിവയുടെ മുകളിലെത്ത നിലയില്‍ മദ്യപിച്ച ശേഷമുള്ള കാലിക്കുപ്പികള്‍ നിരന്നു കിടക്കുന്നു. ഡിവൈ.എസ്‌.പി ഓഫീസ്‌ സ്‌ഥിതിചെയ്യുന്ന സുരക്ഷിത മേഖലയില്‍ സുരഷിതമായി മദ്യപിക്കാമെന്ന അവസ്‌ഥയാണെന്ന ആക്ഷേപമുയരുന്നു.
ന്യൂസ്‌ പേപ്പര്‍ വിരിച്ച്‌ പടികളിലിരുന്ന്‌ കുടിയും പുകവലിയും ഒപ്പം അരങ്ങേറുന്നു. സിഗററ്റ്‌ കുറ്റികള്‍, വാട്ടര്‍ ബോട്ടിലുകള്‍ തുടങ്ങി ചേരുംപടി ഇനങ്ങളും സുലഭം. പോലീസ്‌ വകുപ്പിലെ ചില ജീവനക്കാര്‍ സുരക്ഷിതരായി മുകളിലെത്തി മദ്യപിക്കുന്നതായി ആരോപണമുണ്ട്‌. റേഷന്‍ വിഭാഗത്തിലും ആര്‍.ടി. ഓഫീസിലുമെത്തുന്നവര്‍ കാര്യ സാധ്യത്തിനായി മുകളില്‍ മദ്യസേവയും നടത്താറുണ്ടെന്ന അഭ്യൂഹമുണ്ട്‌. ഓഫീസിനകവും പുറവും പൊതുവെ വികൃതമാണ്‌. ജീവനക്കാര്‍ സംഘടനകളുടെ പോസ്‌റ്ററുകള്‍ വെളിച്ചം കടന്നുവരാനുള്ള ജനാലകളില്‍ പതിച്ചു പോലും വൃത്തികേടാക്കിയിരിക്കുന്നു.
ഭിത്തികളിലാകെ പോസ്‌റ്ററുകള്‍ക്കു പുറമെ പരസ്യ ബോര്‍ഡുകളും സ്‌ഥാനം പിടിച്ചിട്ടുണ്ട്‌. നാഥനില്ലാകളരി പോലെയായ ഓഫീസ്‌ ഭിത്തികളില്‍ റിയല്‍ എസ്‌റ്റേറ്റുകാരുടെ പരസ്യവുമുണ്ട്‌. ഓഫീസു മുറ്റമാകെ ഇലകള്‍ വീണ്‌ ഇഴജന്തുക്കള്‍ക്കഭയം നല്‍കുന്നു. കൂറ്റന്‍ മരങ്ങളുടെ ചില്ലകള്‍ ഉണങ്ങി ഏതുനിമിഷവും വീഴാവുന്ന അവസ്‌ഥയിലാണ്‌. പോലീസ്‌ സേന പിടിച്ചെടുക്കുന്ന വാഹനങ്ങളുടെ ശ്‌മശാനമാണ്‌ ഡിവൈ.എസ്‌.പി. ഓഫീസിന്‌ സമീപമാകെ. മഴക്കാലമായാല്‍ അവിടെ വെള്ളം കെട്ടിനിന്ന്‌ ചെറിയകുളങ്ങളുടെ പ്രതീതി സൃഷ്‌ടിക്കുന്നു. മഴവെള്ളവും മുട്ടോളമെത്തുന്ന ചെളിയും വന്‍വഴുക്കലുണ്ടാക്കുന്നു.
ഓഫീസുകളിലെ സേവന അതിനെത്തുന്നവര്‍ ഈ മലിനജലത്തില്‍ നീന്തിവേണം സഞ്ചരിക്കാന്‍. ഏറ്റവുംവലിയ ദുരിത പര്‍വ്വമെന്ന്‌ വിശേഷിപ്പിക്കുന്നത്‌ ദിനംപ്രതിയെത്തുന്ന നൂറുകണക്കിന്‌ പൊതുജനങ്ങള്‍ക്ക്‌ ശൗചാലയ സൗകര്യമൊരുക്കാത്തതാണ്‌. വിശാലമായ ടോയ്‌ലെറ്റുകളും മറ്റും കെട്ടി സമുച്ചയം ഉയര്‍ന്നപ്പോള്‍ മുറ്റത്ത്‌ പണിതെങ്കിലും ശുചീകരിക്കാത്തതിനാല്‍ ദുര്‍ഗന്ധപൂരിതമാണ്‌. ഈ മൂത്രപ്പുരകളില്‍ നിന്നുള്ള രോഗവാഹികളായ ജലം മറ്റത്ത്‌ കെട്ടിക്കിടക്കുന്ന ജലുമായി സന്ധിക്കുന്നു.ഇതു മാരകമായ ത്വക്ക്‌ രോഗങ്ങള്‍ മാത്രമല്ല പകര്‍ച്ച വ്യാധികള്‍ക്കും വേദിയൊരുക്കുമെന്ന ആശങ്ക പരക്കെയുണ്ട്‌.
from kerala news edited
via IFTTT
