സിനിമയുടെ വാര്‍ഷിക കണക്കെടുപ്പ് നടത്തുമ്പോള്‍ 2014 ലെ താരം നിവിന്‍ പോളി തന്നെ. കഴിഞ്ഞ വര്‍ഷം അഭിനയിച്ച എല്ലാ ചിത്രങ്ങളും വിജയമാക്കിയതിന്റെ ക്രെഡിറ്റ് മറ്റാര്‍ക്കുമില്ല. 1983, ഓംശാന്തി ഓശാന, ബാംഗ്ലൂര്‍ഡേയ്‌സ്, വിക്രമാദിത്യന്‍ എന്നിവയാണ് നിവിന്റേതായി കഴിഞ്ഞ വര്‍ഷം പുറത്തിറങ്ങിയ ചിത്രങ്ങള്‍. ഇതില്‍ 1983 ഉം ബാംഗ്ലൂര്‍ഡേയ്‌സും വന്‍ വിജയങ്ങളായി. ഓംശാന്തി ഓശാന, വിക്രമാദിത്യന്‍ എന്നിവ നിര്‍മ്മാതാക്കള്‍ക്ക് ലാഭം നേടിക്കൊടുത്ത് ഹിറ്റ് ലിസ്റ്റില്‍ ഇടംപിടിച്ചു.
'1983' വിഷയം ക്രിക്കറ്റാണെങ്കിലും അത് മലയാളിക്ക് സ്വന്തം തന്നെ. തനിക്കാവാന്‍ കഴിയാത്തത് തന്റെ മകനെക്കൊണ്ട് നിവര്‍ത്തിക്കുക എന്ന 'വിശ്വപൗരവിശ്വാസം' നിറവേറുന്ന ഒരു കഥാഗതി ആ ചിത്രത്തിന്റെ ദര്‍ശനത്തെ സാര്‍വലൗകികമാക്കി. നിവിന്‍ ഒരു നല്ല മലയാളി അച്ഛനായി നടത്തിയ പകര്‍ന്നാട്ടം '1983' എന്ന ചിത്രത്തിന്റെ ദേശസമഗ്രതയെ പൂര്‍ണമാക്കി.
'ഓംശാന്തി ഓശാന' ഒരു റൊമാന്റിക് കോമഡിയാണെങ്കിലും പ്രണയാഭ്യര്‍ഥനയെ തലതിരിച്ചിട്ട്, പെണ്ണിനെ ആണാക്കി നടത്തിയ ഒരു പരീക്ഷണമാണ്. വളരെ ഈസിയായി ഒഴുകുന്ന സംഭവപരമ്പരകളായിരുന്നു ആ ചിത്രത്തിന്റെ ആകര്‍ഷണം. മലയാളിയുടെ കുടുംബ ഘടനയ്ക്കകത്തുനിന്ന് കൊണ്ടുതന്നെ അതിനെ തമാശയാക്കുകയാണ് 'ഓം ശാന്തി ഓശാന'.
അഞ്ജലി മേനോന്‍ ഒരുക്കിയ ബാംഗ്ലൂര്‍ ഡേയ്‌സാണ് കഴിഞ്ഞ വര്‍ഷത്തെ റിലീസുകളിലെ ഏറ്റവും വലിയ ഹിറ്റ്. യുവതാരസംഗമമായി മാറിയ സിനിമ യുവത ഏറ്റെടുത്തു. ദുല്‍കറും ഫഹദും ഉണ്ടെങ്കിലും നിവിന്റെ കുട്ടന്‍ എന്ന കഥാപാത്രം സിനിമയുടെ പ്രധാന ഹൈലൈറ്റായി. വിക്രമാദിത്യനിലേക്കെത്തുമ്പോള്‍ ദുല്‍കറും ഉണ്ണി മുകുന്ദനും നായകരായി തിളങ്ങുമ്പോഴും അതിഥി വേഷത്തില്‍ നിവിന്‍ സാന്നിധ്യമറിയിച്ചു.
from kerala news edited
via IFTTT
