Story Dated: Thursday, March 26, 2015 02:17
തിരുവനന്തപുരം: കോടതിയില്‍ ഹാജരാക്കാന്‍ കൊണ്ടുപോകുംവഴി തടവുകാരന്‍ രക്ഷപ്പടാന്‍ ശ്രമിച്ചു. പൂജപ്പുര സെട്രല്‍ ജയിലില്‍ നിന്ന്‌ കാട്ടാക്കട കോടതിയില്‍ ഹാജരാക്കാന്‍ കൊണ്ടുപോയ പറക്കുംതളിക ബൈജു എന്ന ബൈജു (35)വാണ്‌ ഓടിരക്ഷപ്പെടാന്‍ ശ്രമിച്ചത്‌. ഇന്നലെ രാവിലെ 11.30നാണ്‌ സംഭവം. കോടതിയിലെത്തിക്കാന്‍ ചുമതലയുണ്ടായിരുന്ന എ.ആര്‍ ക്യാമ്പിലെ രണ്ടുപോലീസുകാരുമായി പൂജപ്പുര ജംഗ്‌ഷനില്‍ ബസ്‌ കാത്തുനില്‍ക്കുമ്പോഴാണ്‌ പ്രതിയുടെ രക്ഷപ്പെടല്‍ ശ്രമം.
ഇയാളോടൊപ്പമുണ്ടായിരുന്ന പോലീസുകാര്‍ ഓടിച്ചിട്ട്‌ പ്രതിയെ പിടികൂടുകയായിരുന്നു. തുടര്‍ന്ന്‌ ആക്രമാസക്‌തനായ പ്രതി പോലീസുകാര്‍ക്കെതിരെ തിരിഞ്ഞു. സമീപത്ത്‌ പാര്‍ക്കുചെയ്‌തിരുന്ന കാറിന്റെ ചില്ലുകള്‍ ഇയാള്‍ കല്ലുപയോഗിച്ച്‌ ഇടിച്ചുതകര്‍ത്തു. നാട്ടുകാരും പോലീസും ചേര്‍ന്ന്‌ കീഴടക്കിയ പ്രതിയെ പൂജപ്പുര പോലീസിന്‌ കൈമാറി. പോലീസ്‌ ഇയാള്‍ക്കെതിരെ കേസെടുത്തു. നിരവധി മാല മോഷണക്കേസിലെ പ്രതിയാണ്‌ ഇയാളെന്ന്‌ പൂജപ്പുര പോലീസ്‌ പറഞ്ഞു. വൈകിട്ടോടെ പ്രതിയെ പുജപ്പുര സെട്രല്‍ ജയിലിലെ റിമാന്റ്‌ സെല്ലിലേക്ക്‌ മാറ്റി.
from kerala news edited
via IFTTT
