Story Dated: Monday, March 23, 2015 06:51
ഛണ്ഡിഗഢ്‌: സ്വാതന്ത്ര സമര സേനാനി ഭഗത്‌ സിങിന്റെയും മറ്റ്‌ രണ്ടുപേരുടെയും രക്‌തസാക്ഷി ദിനമായ ഇന്ന്‌ ഛണ്ഡിഗഢ്‌ നഗരസഭ പൊതുനിരത്തില്‍ സ്‌ഥാപിച്ച പോസ്‌റ്ററുകളില്‍ യു.എസ്‌. സൈനികരുടെ ചിത്രങ്ങള്‍. രാജ്യത്തിനു വേണ്ടി പോരാടുന്ന ഇന്ത്യന്‍ സൈനികരുടെ സ്‌മരണ മാര്‍ച്ച്‌ 23ന്റെ മഹത്വത്തിനൊപ്പം ജനങ്ങളിലെത്തിക്കാനുള്ള ശ്രമത്തിന്‌ ഇടയിലാണ്‌ നഗരസഭയ്‌ക്ക് അമളി പറ്റിയത്‌. എന്നാല്‍ വിവാദ പോസ്‌റ്ററുകളെ കുറിച്ച്‌ പ്രതികരിക്കാന്‍ ഛണ്ഡിഗഢ്‌ മേയര്‍ പൂനം ശര്‍മ ഇതുവരെ തയ്യാറായിട്ടില്ല.
1931 മാര്‍ച്ച്‌ 23ന്‌ രാജ്യത്തിനു വേണ്ടി രക്‌തസാക്ഷിത്തം വഹിച്ച ഭഗത്‌ സിങ്‌, രാജ്‌ ഗുരു, സുഖ്‌ ദേവ്‌ എന്നിവരുടെ രക്‌തസാക്ഷി ദിനത്തിലാണ്‌ വിവാദ പോസ്‌റ്ററുകള്‍ നിരത്തുകളില്‍ പ്രത്യക്ഷപ്പെട്ടത്‌. രക്‌തസാക്ഷികളുടെ പോസ്‌റ്ററുകള്‍ക്ക്‌ സമീപമായിരുന്നു നഗരസഭ ഇന്ത്യന്‍ സൈനികരുടേതെന്ന്‌ കരുതി യു.എസ്‌ സൈനികരുടെ പോസ്‌റ്ററുകള്‍ സ്‌ഥാപിച്ചത്‌. എന്നാല്‍ ചിത്രങ്ങളിലെ സൈനികരുടെ യൂണിഫോമുകളിലെ യു.എസ്‌. പതാക ചിലരുടെ ശ്രദ്ധയില്‍ പെട്ടതോടെ പോസ്‌റ്റര്‍ വിവാദങ്ങള്‍ക്ക്‌് വഴിതെളിച്ചു.
പോസ്‌റ്ററുകളെ കുറിച്ച്‌ പ്രതികരിക്കാന്‍ തയ്യാറാകാതിരുന്ന മേയര്‍ താന്‍ തിരക്കിലാണെന്ന്‌ കൗന്‍സിലര്‍ മുഖേന മാധ്യമങ്ങളെ അറിയിക്കുകയായിരുന്നു. നഗരസഭയുടെ കലാ സാംസ്‌കാരിക വിഭാഗത്തിനെതിരെ നടപടിയെടുക്കുമെന്ന്‌ നഗരസഭാ കൗണ്‍സിലര്‍ വ്യക്‌തമാക്കി.
from kerala news edited
via IFTTT
