Story Dated: Friday, December 12, 2014 01:52
കൊച്ചി: മാനസിക രോഗിയായി മുദ്രകുത്തി കൊച്ചി നാവികാസ്‌ഥാനത്ത്‌ ആശുപത്രിയിലാക്കിയ നാവികന് സുനില്‍കുമാര്‍ സാഹുവിനെ മോചിപ്പിക്കാന്‍ ഹൈക്കോടതി ഉത്തരവിട്ടു. നാവികന് മാനസിക രോഗമില്ലെന്ന ബംഗളുരു 'നിംഹാന്‍സി'ന്റെ മെഡിക്കല്‍ റിപ്പോര്‍ട്ട്‌ പരിഗണിച്ചാണ്‌ ജസ്‌റ്റിസുമാരായ വി.കെ. മോഹനന്‍, കെ. ഹരിലാല്‍ എന്നിവരടങ്ങുന്ന ഡിവിഷന്‍ ബെഞ്ചിന്റെ നടപടി. ഇയാള്‍ക്ക്‌ 26 ദിവസത്തെ അവധി അനുവദിക്കാനും അവധിക്കുശേഷം തിരുനെല്‍വേലിയിലെ ഐ.എന്‍.എസ്‌. കട്ടബൊമ്മന്‍ നാവിക കേന്ദ്രത്തില്‍ ജോലിയില്‍ പ്രവേശിക്കാന്‍ അനുവദിക്കണമെന്നും കോടതി നാവിക സേനക്കു നിര്‍ദേശം നല്‍കി.
മാനസിക രോഗിയാണെന്നാരോപിച്ച്‌ തന്റെ ഭര്‍ത്താവിനെ തടങ്കലില്‍ വെച്ചിരിക്കുകയാണെന്നു ചൂണ്ടിക്കാട്ടി ഭാര്യ ആര്‍ത്തി സാഹു സമര്‍പ്പിച്ച ഹേബിയസ്‌ കോര്‍പസ്‌ ഹര്‍ജിയാണ്‌ കോടതി പരിഗണിച്ചത്‌. മേല്‍ ഉദ്യോഗസ്‌ഥര്‍ക്കെതിരേയുള്ള അഴിമതി ആരോപണങ്ങളില്‍ പ്രതികരിച്ചതിനാണ്‌ ഭര്‍ത്താവിനെ മനോരോഗിയെന്നു മുദ്രകുത്തി ആശുപത്രിയില്‍ പ്രവേശിപ്പിച്ചിരിക്കുന്നതെന്ന്‌ ഹര്‍ജിയില്‍ ചൂണ്ടിക്കാട്ടിയിരുന്നു. ഹര്‍ജിയില്‍ കോടതി പിന്നീട്‌ വിധി പറയും.
from kerala news edited
via IFTTT
