വെള്ളാനകളുടെ നാടിനെ അനുസ്മരിപ്പിച്ചു; റോഡ്‌ റോളര്‍ മതില്‍ തകര്‍ത്തു

Story Dated: Saturday, March 14, 2015 09:24

വേളമാനൂര്‍: നിയന്ത്രണം വിട്ട റോഡ് റോളര്‍ സാധുവായ ഒരു റോഡ് കോണ്‍ട്രാക്ടറുടെ ജീവിതത്തില്‍ വഴിത്തിരിവാകുന്ന രംഗം ‘വെള്ളാനകളുടെ നാട് ’ എന്ന മോഹന്‍ലാല്‍ ചിത്രത്തിലായിരുന്നു കണ്ടത്. പ്രിയദര്‍ശന്‍ സംവിധാനം ചെയ്ത സിനിമയിലെ ഏറ്റവും തമാശാരംഗവും ഇതു തന്നെയായിരുന്നു. സമാനമായ രംഗം കൊല്ലം ജില്ലയിലെ വേളമാനൂറില്‍ അരങ്ങേറിയപ്പോള്‍ വഴിയരികിലെ വീടു തകരാതെയും ആളപായമുണ്ടാകാതെയും രക്ഷപ്പെട്ടത് തലനാരിഴയ്ക്ക്.

റോഡു പണിക്കായി കൊണ്ടുവന്ന റോളര്‍ ബ്രേക്ക് തകര്‍ന്നതിനെ തുടര്‍ന്ന് ഇറക്കത്തിലുടെ ഉരുണ്ട് റോഡരികിലെ കലുങ്കും മതിലും തകര്‍ത്ത്‌ എട്ട്‌ അടിയോളം താഴ്‌ചയിലേക്ക് മൂക്കുകുത്തുകയായിരുന്നു. വഴിയോട് ചേര്‍ന്നുള്ള വേളമാനൂര്‍ സ്വദേശി ആര്‍.ഡി.ലാലിന്റെ വീട്ടിന്റെ മതില്‍ തകര്‍ത്താണ്‌ റോളര്‍ മുറ്റത്തേക്കു പതിച്ചത്‌. കഴിഞ്ഞ ദിവസം രാവിലെ ആറരയോടെ വേളമാനൂര്‍ പ്രാഥമികാരോഗ്യ ഉപകേന്ദ്രത്തിനു മുമ്പിലായിരുന്നു അപകടം.

വേളമാനൂര്‍-കുളക്കുടി റോഡിന്റെ അറ്റകുറ്റപ്പണിക്കായി എത്തിച്ച വര്‍ക്കല സ്വദേശിയായ കരാറുകാരന്റെ ബ്രേക്ക്‌ തകരാറിലായ റോളര്‍ അതിവേഗതയില്‍ കലുങ്കും വീട്ടുമതിലും തകര്‍ത്താണു വീട്ടുമുറ്റത്തേക്കു കൂപ്പുകുത്തിയത്‌. ഇന്നലെ ഉച്ചയോടെ റിക്കവറി വാഹനങ്ങള്‍ എത്തിച്ച്‌ നാട്ടുകാരുടെ സഹായത്തോടെ റോളര്‍ കരയ്‌ക്കുകയറ്റി. വെള്ളാനകളുടെ നാട്ടില്‍ കേടു പറ്റിയ റോളര്‍ താഴ്ചയിലേക്ക് ഉരുണ്ട് ശോഭനയുടെ വീടിന്റെ മതില്‍ തകര്‍ത്തു നില്‍ക്കുന്നതാണ് രംഗം.

from kerala news edited

via IFTTT