Story Dated: Saturday, March 14, 2015 11:35
തിരുവനന്തപുരം : ധനമന്ത്രി കെ.എം മാണിയുടെ ബജറ്റ്‌ അവതരണത്തിനിടെ പ്രതിപക്ഷം സഭയില്‍ നടത്തിയ പ്രതിഷേധത്തിനിടെ പൊതുമുതല്‍ നശിപ്പിക്കപ്പെട്ട സംഭവത്തില്‍ കമ്മിഷണര്‍ക്ക്‌ പരാതി കൈമാറി. നിയമസഭാ സെക്രട്ടേറിയേറ്റാണ്‌ ഡി.ജി.പിയ്‌ക്ക് ഇതു സംബന്ധിച്ച പരാതി നല്‍കിയത്‌. ഡി.ജി.പി സിറ്റി പോലീസ്‌ കമ്മിഷണര്‍ക്ക്‌ പരാതി കൈമാറി.
പരാതിയുടെ അടിസ്‌ഥാനത്തില്‍ കേസെടുക്കേണ്ട കാര്യമുണ്ടോ എന്നത്‌ തിങ്കളാഴ്‌ച തീരുമാനിക്കും. ധനമന്ത്രിയുടെ ബജറ്റ്‌ അവതരണം തടസപ്പെടുത്താനുള്ള ശ്രമത്തിനിടെ സ്‌പീക്കറുടെ ഡയസിലേയ്‌ക്ക് ഇരച്ചു കയറിയ പ്രതിപക്ഷാംഗങ്ങള്‍ സ്‌പീക്കറുടെ ഇരിപ്പിടവും കമ്പ്യൂട്ടറും മൈക്കും തകര്‍ക്കുകയും അദ്ദേഹത്തിന്റെ കസേര എടുത്ത്‌ എറിയുകയും ചെയ്‌തിരുന്നു.
ഉപകരണങ്ങള്‍ നശിപ്പിക്കപ്പെട്ട സംഭവത്തില്‍ നിയമസഭാ സെക്രട്ടേറിയേറ്റ്‌ നല്‍കിയ പരാതിയില്‍ ആരുടെയും പേരുകള്‍ പരാമര്‍ശിച്ചിട്ടില്ല. വെള്ളിയാഴ്‌ച നിയമസഭയില്‍ നടന്ന അനിഷ്‌ട സംഭവങ്ങള്‍ ഉള്‍പ്പെട്ട വീഡിയോ ദൃശ്യങ്ങള്‍ പരിശോധിച്ച ശേഷം മാത്രമേ പേരുകള്‍ വ്യക്‌തമാകൂ.
from kerala news edited
via IFTTT
