ബൈക്കില്‍ നിന്ന്‌ തെന്നി വീണ യുവാവ്‌ കാറ്‌ കയറി മരിച്ചു

Story Dated: Tuesday, March 17, 2015 10:23

തിരൂരങ്ങാടി: ബൈക്കില്‍ നിന്നു തെന്നിവീണ യുവാവിനെ പിറകില്‍വന്ന കാറിടിച്ചു മരിച്ചു. കിഴിശേരിക്കു സമീപമാണു ദുരന്തം സംഭവിച്ചത്‌. കഴിഞ്ഞ ദിവസം രാത്രി 7.45നാണ്‌ സംഭവം. തിരൂരങ്ങാടി ചെറുമുക്ക്‌ സുന്നത്ത്‌ നഗര്‍ സ്വദേശി മനരിക്കല്‍ മുസ്‌തഫയുടെ മകന്‍ അബുബക്കറാണ്‌ (29) ദാരുണമായി മരണപ്പെട്ടത്‌. ഈ മാസം പന്ത്രണ്ടാം തീയതിയാണു ജിദ്ദയില്‍ നിന്ന്‌ നാട്ടിലെത്തിയത്‌. രണ്ടുവര്‍ഷമായി സൗദി അറേബ്യയിലെ ഫൂട്ട്‌കോ കമ്പനിയില്‍ ജോലി ചെയ്‌തു വരികയായിരുന്നു. കമ്പനിയില്‍ കൂടെ ജോലി ചെയ്ുന്നയ കിഴിശേരി സ്വദേശിയുടെ തന്നു വിട്ട പാഴ്‌സല്‍ വീട്ടില്‍ ഏല്‍പ്പിച്ചശേഷം തിരികെ വരുന്ന വഴിക്കാണ്‌ അപകടം. സംഭവസമയത്ത്‌ ചെറിയ ചാറല്‍ മഴ ഉണ്ടായിരുന്നു. ബൈക്കില്‍ നിന്ന്‌ യുവാവ്‌ തെന്നി വീഴുന്നതു കണ്ട ദൃക്‌സാക്ഷികള്‍ യുവാവിന്റെ അടുത്തേക്ക്‌ നീങ്ങുന്ന അവസരത്തിലാണ്‌ പിറകെ വന്ന കാറ്‌ കയറി ഇറങ്ങിയത്‌. ഉടന്‍തന്നെ കോഴിക്കോട്‌ മെഡിക്കല്‍ കോളജില്‍ എത്തിച്ചെങ്കിലും താമസിയാതെ മരണപ്പെടുകയായിരുന്നു. മാതാവ്‌: കദീജ. ഭാര്യ: അഫ്‌സത്ത്‌. മകന്‍: മുഹമ്മദ്‌ അഫ്‌ലഹ്‌. സഹോദരങ്ങള്‍: സമീറ, മുഫീദ്‌, സുമയ്യത്ത്‌, സെമീല്‍. തിരൂരങ്ങാടി താഴെച്ചിന ജുമാ മസ്‌ജിദില്‍ മയ്യത്ത്‌ നിസ്‌ക്കാരത്തിനു ശേഷം വൈകിട്ടു 3.15ഓടെ മൃതദേഹം ഖബറടക്കി.

from kerala news edited

via IFTTT