Story Dated: Saturday, December 20, 2014 08:04
വാഴൂര്‍: പരമ്പരാഗത തൊഴില്‍ മേഖലയ്‌ക്കു കരുത്തു പകര്‍ന്നു വാഴൂര്‍ ബ്ലോക്ക്‌ പഞ്ചായത്തിനു കീഴില്‍ നെയ്‌തുശാല പ്രവര്‍ത്തനത്തിന്റെ ഉദ്‌ഘാടനം എന്‍.ജയരാജ്‌ എം.എല്‍.എ നിര്‍വഹിച്ചു. നെയ്‌ത്തുശാല പദ്ധതിയിലൂടെ വാഴൂര്‍ ബ്ലോക്ക്‌ പഞ്ചായത്ത്‌ മറ്റ്‌ തദ്ദേശ സ്വയംഭരണം സ്‌ഥാപനങ്ങള്‍ക്കു മാതൃകയായിരിക്കുകയാണെന്ന്‌ അദ്ദേഹം പറഞ്ഞു. ചിറക്കടവ്‌ ചെറുവള്ളി ഡിവിഷനിലാണ്‌ നെയ്‌ത്തുശാല പ്രവര്‍ത്തനം തുടങ്ങിയത്‌. ബ്ലോക്ക്‌ പഞ്ചായത്ത്‌ വൈസ്‌ പ്രസിഡന്റ്‌ ഷാജി പാമ്പൂരിയാണ്‌ നെയ്‌തുശാല പ്രവര്‍ത്തനങ്ങള്‍ക്ക്‌ നേതൃത്വം നല്‍കിയത്‌.
സര്‍ക്കാര്‍ അനുവദിച്ച എട്ട്‌ നെയ്‌ത്തു യന്ത്രങ്ങള്‍ ഉപയോഗിച്ചാണു പ്രവര്‍ത്തനം. ഖാദി ബോര്‍ഡ്‌ പദ്ധതിയുമായി സഹകരിക്കുന്നുണ്ട്‌. ബ്ലോക്ക്‌ പഞ്ചായത്തിന്റെ മേല്‍നോട്ടത്തില്‍ നെയ്‌ത്ത്‌ശാലയിലെ ജീവനക്കാരായ ഇരുപത്തിയഞ്ച്‌ പേര്‍ക്കു പ്രത്യേക പരിശീലനം നല്‍കും. ഇതില്‍ പതിനാറ്‌ പേര്‍ സ്‌ത്രീകളാണ്‌. പരിശീലനം പൂര്‍ത്തിയാകുന്നതോടെ വ്യവസായിക അടിസ്‌ഥാനത്തില്‍ നെയ്‌ത്ത്‌ ആരംഭിക്കാനാണു പദ്ധതി. ലാഭത്തിന്റെ മൂന്നിലൊന്നു തുക ഗുണഭോക്‌താക്കള്‍ക്കു നല്‍കും.
നെയ്‌ത്തു യന്ത്രങ്ങള്‍ ലഭിച്ചതോടെ തങ്ങളുടെ തൊഴില്‍ സാധ്യത വര്‍ദ്ധിച്ചതായും സ്വന്തം നാട്ടില്‍ തന്നെ സ്‌ഥിരം വരുമാനം ലഭിക്കുന്നതില്‍ സന്തോഷമുണ്ടെന്നും പരിശീലന പരിപാടിയില്‍ പങ്കെടുക്കുത്തവര്‍ അഭിപ്രായപ്പെട്ടു. അവധി ദിവസങ്ങളില്‍ വിദ്യാര്‍ത്ഥികള്‍ക്കും നെയ്‌ത്ത്‌ പരീശിലനം നല്‍കാനും ആലോചനയുണ്ട്‌. ബ്ലോക്ക്‌ പഞ്ചായത്ത്‌ പ്രസിഡന്റ്‌ എസ്‌. ശൈലജാ കുമാരി അധ്യക്ഷത വഹിച്ചു.
from kerala news edited
via IFTTT
