Story Dated: Tuesday, December 2, 2014 01:52
കോഴിക്കോട്‌: ക്രിസ്‌മസ്‌, പുതുവത്സരാഘോഷങ്ങളുടെ ഭാഗമായി എട്ടു മുതല്‍ ജനുവരി ഏഴുവരെ സ്‌പെഷ്യല്‍ ഡ്രൈവ്‌ പിരീയഡായി പ്രഖ്യാപിച്ച്‌ പരിശോധന കര്‍ശനമാക്കാന്‍ എക്‌സൈസ്‌ വകുപ്പ്‌ തീരുമാനിച്ചു. വ്യാജമദ്യവിതരണവും ഉത്‌പാദനവും പൊതുജനപങ്കാളിത്തത്തോടെ തടയുന്നതിനായി രൂപീകരിച്ച ജില്ലാതല ജനകീയ കമ്മിറ്റി യോഗത്തിലാണ്‌ ഈ തീരുമാനം.
സ്‌പെഷ്യല്‍ ഡ്രൈവിനോടനുബന്ധിച്ച്‌ ജില്ലയില്‍ ഡിവിഷന്‍ ഓഫീസ്‌ കേന്ദ്രീകരിച്ച്‌ 24 മണിക്കൂറും പ്രവര്‍ത്തിക്കുന്ന ജില്ലാതല കണ്‍ട്രോള്‍ റൂമും താലൂക്ക്‌ അടിസ്‌ഥാനത്തില്‍ മൂന്ന്‌ സ്‌ട്രൈക്കിങ്‌ ഫോഴ്‌സുകളും ഏര്‍പ്പെടുത്തും. റോഡ്‌ പട്രോളിങ്ങും പരിശോധനയും രഹസ്യവിവരശേഖരവും സ്‌ഥിരം കുറ്റവാളികള്‍ക്കെതിരെയുളള നടപടികളും ഊര്‍ജിതപ്പെടുത്തും. പഞ്ചായത്ത്‌ തലത്തിലുളള കമ്മിറ്റികള്‍ യഥാസമയം വിളിച്ചുചേര്‍ക്കാന്‍ പഞ്ചായത്തില്‍നിന്ന്‌ കുറേകൂടി സഹകരണം ലഭിക്കണമെന്ന്‌ യോഗത്തില്‍ അഭിപ്രായമുയര്‍ന്നു. ഇതിന്റെ അടിസ്‌ഥാനത്തില്‍ പഞ്ചായത്ത്‌ തലത്തില്‍ കമ്മിറ്റികള്‍ വിളിച്ചുകൂട്ടാനും സെക്രട്ടറിമാര്‍ക്ക്‌ കത്തയയ്‌ക്കാനും കമ്മിറ്റി നിര്‍ദേശിച്ചു.
വ്യാജമദ്യത്തിന്റെ ഉത്‌പാദനം നടക്കാന്‍ സാധ്യതയുളള സ്‌ഥലങ്ങളുടെ പട്ടിക മുന്‍കൂട്ടി തയ്ാറാക്കി യപോലീസ്‌, ഫോറസ്‌റ്റ്, റവന്യു, ട്രൈബല്‍ വകുപ്പുകളുമായിച്ചേര്‍ന്ന്‌ റെയിഡുകള്‍ നടത്താന്‍ എക്‌സൈസ്‌ ഉദ്യോഗസ്‌ഥര്‍ക്ക്‌ നിര്‍ദേശം നല്‍കി. മാഹിയില്‍ നിന്നുളള വിദേശമദ്യക്കടത്ത്‌ തടയുന്നതിന്‌ അഴിയൂര്‍ എക്‌സൈസ്‌ ചെക്ക്‌പോസ്‌റ്റില്‍ വാഹനപരിശോധന കര്‍ശനമാക്കും. ക്ലീന്‍ ക്യാമ്പസ്‌ സേഫ്‌ ക്യാമ്പസ്‌ പദ്ധതി ആരോഗ്യ വിദ്യാഭ്യാസ വകുപ്പുകളും പോലീസുമായിച്ചേര്‍ന്ന്‌ നടത്തുന്നതിന്റെ ആവശ്യകതയും യോഗം ചര്‍ച്ച ചെയ്‌തു. ജില്ലാ കലക്‌ടര്‍ സി.എ. ലത അധ്യക്ഷത വഹിച്ചു. എ.ഡി.എം. കെ. രാധാകൃഷ്‌ണന്‍, അസി. എക്‌സൈസ്‌ കമ്മീഷണര്‍ എസ്‌.ടി. റാഫേല്‍, നാര്‍ക്കോട്ടിക്‌ സെല്‍ ഡി.വൈ.എസ്‌.പി. സി. അരവിന്ദാക്ഷന്‍ എന്നിവര്‍ പങ്കെടുത്തു.
from kerala news edited
via IFTTT
