Story Dated: Sunday, March 1, 2015 02:49
വടക്കഞ്ചേരി: വള്ളിയോട്‌ ആശുപത്രിക്ക്‌ സമീപം നിയന്ത്രണം വിട്ട ടെമ്പോ മരത്തിലിടിച്ച്‌ മറിഞ്ഞ്‌ രണ്ടുപേര്‍ക്ക്‌ പരുക്കേറ്റു. ഒരാളുടെ നിലഗുരുതരമാണ്‌. ടെമ്പോ ഡ്രൈവര്‍ തൃശൂര്‍ വെള്ളിക്കുളങ്ങര സ്വദേശി എയ്‌ഞ്ചല്‍(32), ക്ലീനര്‍ പറപ്പൂക്കര തണ്ടാശ്ശേരി വീട്ടില്‍ ഗിരീഷിന്റെ മകന്‍ കിരണ്‍(23) എന്നിവര്‍ക്കാണ്‌ പരുക്കേറ്റത്‌. ഇവരെ തൃശൂരിലെ സ്വകാര്യ ആശുപത്രിയില്‍ പ്രവേശിപ്പിച്ചു. കിരണിന്‌ ഗുരുതര പരുക്കുണ്ട്‌.
വെള്ളിയാഴ്‌ച രാത്രി 12 മണിയോടെയാണ്‌ അപകടം. മരത്തിലിടിച്ച്‌ റോഡിലേക്ക്‌ മറിഞ്ഞ ടെമ്പോയില്‍ നിന്നും എയ്‌ഞ്ചല്‍ റോഡിലേക്ക്‌ തെറിച്ചുവീണു. കിരണ്‍ ക്യാബിനുള്ളില്‍ കുടുങ്ങി. ഇവരുടെ നിലവിളികേട്ട്‌ സമീപത്തെ ആശുപത്രി അധികൃതരും നാട്ടുകാരും എത്തിയെങ്കിലും കിരണിനെ പുറത്തെടുക്കാന്‍ കഴിഞ്ഞില്ല. ഫയര്‍ഫോഴ്‌സ് എത്തി ക്യാബിന്‍ മുറിച്ചാണ്‌ കിരണിനെ പുറത്തെടുത്തത്‌. മുടപ്പല്ലൂരില്‍ നിന്നും തൃശൂരിലേക്ക്‌ പോവുകയായിരുന്നു ടെമ്പോ.
from kerala news edited
via IFTTT
