Story Dated: Friday, January 16, 2015 03:19
ഒറ്റപ്പാലം: സി.പി.എം ജില്ലാ സമ്മേളനത്തിന്‌ ഒറ്റപ്പാലത്ത്‌ തുടക്കമായി. ഒറ്റപ്പാലം ബസ്‌ സ്‌റ്റാന്‍ഡിന്‌ സമീപത്തുള്ള സമ്മേളന മൈതാനിയില്‍ എം.ഹംസ എം.എല്‍.എ പതാക ഉയര്‍ത്തി. ജില്ലാ സെക്രട്ടേറിയറ്റംഗം പി.കെ. ശശി നയിച്ച പതാക ജാഥയില്‍ ആര്‍. ചിന്നക്കുട്ടന്റെ നേതൃത്വത്തിലുള്ള കൊടിമര ജാഥയും പി.കെ. നാരായണദാസും എ. പ്രഭാകരന്‍ ക്യാപറ്റന്മാരായ ദീപശിഖാ ജാഥകളും ഇന്നലെ വൈകീട്ട്‌ ആറരയോടെ ഒറ്റപ്പാലത്ത്‌ സംഗമിച്ചു. ഇതിനു ശേഷമാണ്‌ പതാക ഉയര്‍ത്തല്‍ ചടങ്ങ്‌ നടന്നത്‌. ജില്ലാ സെക്രട്ടറി സി.കെ. രാജേന്ദ്രന്‍, സെക്രട്ടേറിയറ്റ്‌ അംഗങ്ങളായ പി. ഉണ്ണി, പി.കെ. സുധാകരന്‍, ഒറ്റപ്പാലം ഏരിയാ സെക്രട്ടറി കെ. സുരേഷ്‌ എന്നിവര്‍ പങ്കെടുത്തു. ഫ്‌ളാഗ്‌ സല്യുട്ടുമുണ്ടായിരുന്നു.
ഇന്ന്‌ രാവിലെ സി.എന്‍.എന്‍ ഓഡിറ്റോറിയത്തില്‍ സജ്‌ജമാക്കിയ വാമനന്‍ നഗറില്‍ പ്രതിനിധി സമ്മേളനം ആരംഭിക്കും. സംസ്‌ഥാന സെക്രട്ടറി പിണറായി വിജയന്‍, കേന്ദ്ര കമ്മിറ്റിയംഗവും പ്രതിപക്ഷ നേതാവുമായ വി.എസ്‌. അച്യുതാനന്ദന്‍, പാലൊളി മുഹമ്മദ്‌കുട്ടി, ഇ.പി. ജയരാജന്‍, പി.കെ. ശ്രീമതി, വി.വി. ദക്ഷിണാമൂര്‍ത്തി, എ.കെ. ബാലന്‍, എളമരം കരീം, ബേബി ജോണ്‍ എന്നിവര്‍ മൂന്ന്‌ ദിവസവും സമ്മേളനത്തില്‍ പങ്കെടുക്കും. സമ്മേളനം 18 ന്‌ സമാപിക്കും. ഇതോടനുബന്ധിച്ച്‌ വൈകീട്ട്‌ മൂന്നിന്‌ കണ്ണിയംപുറം സെവന്‍ത്ത്‌ ഡേയില്‍ നിന്ന്‌ അരലക്ഷത്തോളം പേര്‍ അണിനിരക്കുന്ന വളണ്ടിയര്‍ മാര്‍ച്ചുമുണ്ടാകും. സമ്മേളനത്തോടനുബന്ധിച്ചുള്ള പൊതുപ്രകടനം ഒഴിവാക്കിയിട്ടുണ്ട്‌.
from kerala news edited
via IFTTT
