ആണ്‍കുട്ടിക്ക്‌ ജന്മം നല്‍കാനായില്ല: മൂന്ന്‌ പെണ്‍മക്കളെ കൊന്ന് അമ്മ ജീവനൊടുക്കാന്‍ ശ്രമിച്ചു

Story Dated: Tuesday, March 10, 2015 11:44

ന്യൂഡല്‍ഹി: ആണ്‍കുട്ടിയെ പ്രസവിച്ചില്ലെന്ന ഭര്‍ത്താവിന്റെ ശാസനയെ തുടര്‍ന്ന്‌ മൂന്ന്‌ പെണ്‍മക്കളെ കൊന്ന ശേഷം അമ്മ ജീവനൊടുക്കാന്‍ ശ്രമിച്ചു. ഇന്നലെ രാത്രി ഡല്‍ഹി അംബേദ്‌ക്കര്‍ നഗറിലാവണ്‌ സംഭവം നടന്നത്‌. സുലേന(എട്ട്‌), ഗ്വാലിനി(മൂന്ന്‌), പുനീത(എട്ട്‌) എന്നീ പെണ്‍കുട്ടികളെയാണ്‌ മരിച്ചനിലയില്‍ കണ്ടെത്തിയത്‌.

പെണ്‍കുട്ടികളെ കൊന്ന്‌ ജീവനൊടുക്കാന്‍ പോകുന്നുവെന്ന്‌ അമ്മ രാധ ഭര്‍ത്താവായ രാജു സിങിനെ ഫോണ്‍ ചെയ്‌ത് അറിയിച്ചിരുന്നു. ജോലി സ്‌ഥലത്തായിരുന്ന രാജു വൈകാതെ വീട്ടിലെത്തിയെങ്കിലും മരിച്ചുകിടക്കുന്ന കുട്ടികളെയാണ്‌ കണ്ടത്‌. എന്നാല്‍ കുട്ടികളെ കൊന്ന ശേഷം ജീവനൊടുക്കാന്‍ ശ്രമിച്ച രാധയെ ഉടന്‍തന്നെ സമീപത്തുള്ള സ്വകാര്യ ആശുപത്രിയില്‍ പ്രവേശിപ്പിച്ചെന്നും പോലീസ്‌ പറഞ്ഞു. രാധയുടെ നില തൃപ്‌തികരമാണെന്ന്‌ ഡോക്‌ടര്‍ അറിയിച്ചു.

മൂന്നാം തവണയും പെണ്‍കുട്ടിക്ക്‌ ജന്മം നല്‍കിയതോടെ ആണ്‍കുട്ടിക്ക്‌ ജന്മം നല്‍കാന്‍ കഴിയാഞ്ഞതിനെ ചൊല്ലി രാജു നിരന്തരം ശാസിച്ചിരുന്നു. ഇതാണ്‌ രാധയെ ഇത്തരമൊരു തീരുമാനം എടുക്കാന്‍ പ്രേരിപ്പിച്ചതെന്നും പോലീസ്‌ അറിയിച്ചു. ഇരുവരുടെയും വിവാഹം പത്ത്‌ വര്‍ഷം മുമ്പാണ്‌ നടന്നത്‌.

from kerala news edited

via IFTTT