Story Dated: Friday, March 6, 2015 03:01
പുതുക്കാട്‌: പീച്ചി ഡാമില്‍നിന്നും ഇടതുകര കനാലിലേക്ക്‌ വെള്ളം തുറന്നു വിടാത്തതുമൂലം മൂന്നു പഞ്ചായത്തുകളില്‍ ജലക്ഷാമം രൂക്ഷം. ഫെബ്രുവരി 23ന്‌ പീച്ചി ഡാമില്‍നിന്നും തുറന്നുവിട്ട വെള്ളം പൂത്തൂര്‍, കല്ലൂര്‍ ബ്രാഞ്ച്‌ കനാലുകളിലേക്കാണ്‌ എത്തിയത്‌. എന്നാല്‍ ഇടതുകര കനാലിലെ വെള്ളത്തെ ആശ്രയിക്കുന്ന അഗളപ്പനഗര്‍, തൃക്കൂര്‍, വരന്തരപ്പിള്ളി എന്നീ പഞ്ചായത്തുകളിലുള്ളവര്‍ക്ക്‌ വെള്ളമെത്താത്തതുകാരണം വളരെ ബുദ്ധിമുട്ടാണ്‌ നേരിടുന്നത്‌.
അളഗപ്പനഗര്‍ പഞ്ചായത്തിന്റെ വിവിധ ഭാഗങ്ങളിലുള്ള നെല്‍കൃഷിയും മറ്റു പഞ്ചായത്തുകളിലെ ഇതര കൃഷിയിടങ്ങളും നാശത്തിന്റെ വക്കിലാണ്‌. മുന്‍ വര്‍ഷങ്ങളില്‍ ഇടതുകര കനാലില്‍ വെള്ളം തുറന്നുവിട്ടതിനു ശേഷമാണ്‌ മറ്റ്‌ കനാലുകളിലേക്ക്‌ വെള്ളം എത്തിക്കാറുള്ളത്‌. രാഷ്‌ട്രീയകക്ഷികളുടെ നിര്‍ബന്ധപ്രകാരമാണ്‌ പൂത്തൂര്‍-കല്ലൂര്‍ ബ്രാഞ്ച്‌ കനാലിലൂടെ ഈ വര്‍ഷം വെള്ളം തുറന്നുവിടാനുള്ള കാരണമെന്ന്‌ കര്‍ഷകര്‍ ആരോപിക്കുന്നു. വെള്ളം തുറന്നുവിട്ടുകൊണ്ടിരിക്കുന്ന കനാലില്‍ പലയിടങ്ങളിലും അനധികൃത തടയണകള്‍ കെട്ടി വെള്ളം സംഭരിക്കുന്നുണ്ട്‌. വട്ടക്കൊട്ടായി ഭാഗത്തുള്ള കര്‍ഷകര്‍ അനധികൃത തടയണകള്‍ മാറ്റുകയും അധികൃതര്‍ക്ക്‌ പരാതി നല്‌കുകയും ചെയ്‌തു. മാര്‍ച്ച്‌ 15 വരെയാണ്‌ ഡാമില്‍നിന്നും വെള്ളം തുറന്നുവിടുന്നത്‌. എത്രയുംവേഗം ഇടതുകര കനാലിലേക്ക്‌ വെള്ളം എത്തിക്കണമെന്നാണ്‌ കര്‍ഷകരുടെ ആവശ്യം.
from kerala news edited
via IFTTT
