Story Dated: Friday, March 6, 2015 09:20
തിരുവനന്തപുരം: നിയമസഭയുടെ ബജറ്റ്‌ സമ്മേളനത്തിന്‌ ബഹളത്തോടെ തുടക്കം. ഗവര്‍ണറുടെ നയപ്രഖ്യാപനം ബഹിഷ്‌ക്കരിച്ച്‌ പ്രതിപക്ഷം നിയമസഭയില്‍ നിന്നും ഇറങ്ങിപ്പോയി. പ്രതിപക്ഷ നേതാവ്‌ വി എസ്‌ അച്യുതാനന്ദന്റെ നേതൃത്വത്തില്‍ കെ എം മാണി രാജിവെയ്‌ക്കണം, മാണി ബജറ്റ്‌ അവതരിപ്പിക്കരുത്‌ തുടങ്ങിയ ആവശ്യം ഉന്നയിച്ചാണ്‌ പ്രതിപക്ഷം ഇറങ്ങിപ്പോക്ക്‌ നടത്തിയത്‌.
പ്രതിഷേധ പ്‌ളക്കാര്‍ഡുകളുമായാണ്‌ പ്രതിപക്ഷം സഭയില്‍ എത്തിയത്‌ തന്നെ. ഗവര്‍ണര്‍ എത്തിയപ്പോള്‍ പ്രതിപക്ഷാംഗങ്ങള്‍ മുദ്രാവാക്യം മുഴക്കുകയും ബഹളംവെയ്‌ക്കുകയും ചെയ്‌തു. ഇതിനിടെ പ്രതിപക്ഷത്തിന്റെ ആവശ്യം പരിഗണിക്കാമെന്ന്‌ ഗവര്‍ണര്‍ പറഞ്ഞത്‌ പുതിയ കീഴ്‌വഴക്കമായി പ്രതിപക്ഷം എടുത്തുകാട്ടി. കേരള നിയമസഭയുടെ ചരിത്രത്തില്‍ ആദ്യമായാണ്‌ അഴിമതിയാരോപിതനായൊരു മന്ത്രിയെ പുറത്താക്കുന്ന കാര്യം പരിഗണിക്കാമെന്ന്‌ ഒരു ഗവര്‍ണര്‍ ഉറപ്പു നല്‍കുന്നത്‌ എന്നായിരുന്നു പ്രതിപക്ഷത്തിന്റെ വ്യാഖ്യാനം. ഇതിനിടയില്‍ നയപ്രഖ്യാപന പ്രസംഗം ഗവര്‍ണര്‍ തുടരുന്നതിനിടയില്‍ പ്രതിപക്ഷം സഭ ബഹിഷ്‌ക്കരിച്ച്‌ ഇറങ്ങിപ്പോക്ക്‌ നടന്നിരുന്നു. പിന്നീട്‌ സഭയ്‌ക്ക് പുറത്തെത്തി പ്രതിഷേധിച്ചു.
കോഴക്കേസില്‍ ഉള്‍പ്പെട്ട മന്ത്രികൂടി ചേര്‍ന്ന്‌ സമര്‍പ്പിച്ച നയപ്രഖ്യാപനം സഭയില്‍ വായിക്കാന്‍ പാടില്ലെന്ന്‌ പ്രതിപക്ഷം പറഞ്ഞു. മാണിക്കൊപ്പം അഴിമതിക്കാരായ മന്ത്രിമാരെയെല്ലാം പുറത്താക്കണമെന്നും പ്രതിപക്ഷനേതാവ്‌ വിഎസ്‌ അച്യൂതാനന്ദന്‍ വ്യക്‌തമാക്കി. ബജറ്റ്‌ അവതരണത്തില്‍ നിന്നും മാണിയെ മാറ്റി നിര്‍ത്തിയില്ലെങ്കില്‍ വലിയ പ്രക്ഷോഭം ആരംഭിക്കുമെന്നും പ്രതിപക്ഷം വ്യക്‌തമാക്കി. ബജറ്റ്‌ അവതരിപ്പിക്കുന്ന 13 ാം തീയതി വലിയ പ്രക്ഷോഭം അരങ്ങേറുമെന്നൂള്ള സൂചനയും പ്രതിപക്ഷം നല്‍കി.
from kerala news edited
via IFTTT
